టాలీవుడ్ లో నెంబ‌ర్ వ‌న్ అసాధ్య‌మేనా?

ఒకప్పుడు టాలీవుడ్‌లో నెంబర్ వన్ హీరోయిన్ ఎవరనే? ప్రశ్నకు స్పష్టమైన సమాధానాలు దొరికేవి. ఇండస్ట్రీని ఏలే అగ్ర కథానాయికల హవా కొన్నేళ్ల పాటు నిరంతరాయంగా సాగేది. కానీ ప్రస్తుత టాలీవుడ్ బాక్సాఫీస్ సమీకరణాలను గమనిస్తే ఇక్కడ నెంబర్ వన్ హీరోయిన్ కుర్చీ చాలా కాలంగా ఖాళీగా దర్శనమిస్తోంది. ఒక భారీ సక్సెస్ రాగానే ఒక భామ టాప్‌లోకి రావడం, అంతలోనే మరో కొత్త ముఖం ఆ స్థానాన్ని భర్తీ చేయడం ఇక్కడ సర్వసాధారణంగా మారిపోయింది. స్థిరమైన స్టార్‌డమ్‌తో పరిశ్రమను శాసించే ఒకే ఒక్క సుప్రీమ్ క్వీన్ ఇండస్ట్రీకి కరువైందనేది ట్రేడ్ వర్గాల్లో వినిపిస్తున్న వాస్తవం.

గతంలో అనుష్క శెట్టి, సమంత, తమన్నా, కాజల్ అగర్వాల్ వంటి స్టార్ హీరోయిన్లు దాదాపు దశాబ్ద కాలం పాటు టాలీవుడ్‌ను గుప్పిట్లో పెట్టుకున్నారు. స్టార్ హీరోలందరి సరసన నటిస్తూనే లేడీ ఓరియెంటెడ్ చిత్రాలతో మార్కెట్‌ను శాసించే స్థాయికి ఎదిగారు. వారి పేర్లు చెబితేనే థియేటర్లకు వచ్చే ప్రేక్షకులు ఉండేవారు. కానీ ప్రస్తుత రోజుల్లో ఇండస్ట్రీకి వస్తున్న భామలు వాళ్లలా సుదీర్ఘ కాలం పాటు నిలదొక్కుకోవడం కష్టంగా మారుతోంది. నేటితరం హీరోయిన్ల కెరీర్ స్పాన్ చాలా వేగంగా తగ్గిపోతుండటం ఇండస్ట్రీలో స్పష్టమైన మార్పుకు సంకేతంగా నిలుస్తోంది.

దీనికి ప్రధాన కారణం పరిశ్రమలో పెరిగిన విపరీతమైన పోటీ. ప్రతి ఏటా నార్త్ నుంచి, సోషల్ మీడియా వేదికల నుంచి డజన్ల కొద్దీ కొత్త హీరోయిన్లు టాలీవుడ్‌లోకి ఎంట్రీ ఇస్తున్నారు. ఒక సినిమా హిట్ అవ్వగానే మేకర్స్ అందరూ కొత్త భామల వైపే మొగ్గు చూపుతున్నారు. దీనివల్ల ఒక హీరోయిన్ వరుసగా మూడు నాలుగు భారీ ప్రాజెక్టులు దక్కించుకుని స్థానాన్ని సుస్థిరం చేసుకునే లోపే మరో కొత్త క్రేజీ బ్యూటీ తెరపైకి వస్తోంది. ఈ తీవ్రమైన పోటీ నడుమ గతంలోలా ఏళ్ల తరబడి నెంబర్ వన్ చైర్‌ను కాపాడుకోవడం నేటి తరం హీరోయిన్లకు అసాధ్యంగానే కనిపిస్తోంది.

ప్రస్తుత జనరేషన్‌లో ఆ నెంబర్ వన్ స్థానాన్ని అందుకునే సత్తా క్రేజ్ ఉన్న రేసు గుర్రాలు రష్మిక మందన్న, సాయిపల్లవి వంటి వారు కనిపిస్తారు. రష్మికకు కమర్షియల్ మార్కెట్, గ్లోబల్ రీచ్ ఉన్నాయి. అలాగే సాయిపల్లవికి అపారమైన నటన ప్రతిభ, విపరీతమైన లేడీ ఫాలోయింగ్ ఉన్నాయి. అయితే వీరు టాలీవుడ్‌లోనే స్థిరంగా ఉంటూ ఇక్కడి కుర్చీని సొంతం చేసుకునే అవకాశం ఉన్నప్పటికీ ఫోకస్ మారడం ఇండస్ట్రీకి మైనస్‌గా మారింది. ఇద్దరు భామలు ప్రస్తుతం బాలీవుడ్‌తో పాటు ఇతర భాషా చిత్రాలపై ఎక్కువ దృష్టి పెట్టడం వల్ల టాలీవుడ్‌లో కొంత మార్కెట్‌ను కోల్పోతున్నారనేది వాస్తవం.

హిందీ బెల్ట్‌లో లభిస్తున్న భారీ క్రేజ్, వైవిధ్యమైన పాత్రల కారణంగా మన టాప్ హీరోయిన్లు ముంబై ఫ్లైట్ ఎక్కేందుకే ఎక్కువ ఆసక్తి చూపిస్తున్నారు. అక్కడ వరుస ప్రాజెక్టులతో బిజీగా ఉండటం వల్ల, టాలీవుడ్‌లో క్రేజీ ఆఫర్లు వచ్చినా డేట్స్ సర్దుబాటు చేయలేక వదులుకోవాల్సి వస్తోంది. దీనివల్ల తెలుగులో ఒకే హీరోయిన్ వరుసగా పెద్ద సినిమాలు చేసే అవకాశం లేకుండా పోతోంది. ఫలితంగా బాక్సాఫీస్ వద్ద వారి ప్రభావం క్రమంగా తగ్గుతుంది. ఇది నెంబర్ వన్ రేసులో వెనుకబడిపోవడానికి దారితీస్తోంది.

టాలీవుడ్‌లో నెంబర్ వన్ హీరోయిన్ అనే హోదా ఇప్పుడు స్థిరమైన పీఠంలా కాకుండా మారుతున్న ట్రెండ్‌కు అనుగుణంగా చేతులు మారే కిరీటంలా మారిపోయింది. పెరిగిన పాన్-ఇండియా సంస్కృతి, బాలీవుడ్ వ్యామోహం, నిరంతరాయంగా వస్తున్న కొత్త తరం నటీమణుల పోటీ వల్ల భవిష్యత్తులో కూడా ఒకే హీరోయిన్ సుదీర్ఘ కాలం ఇండస్ట్రీని ఏలడం అసాధ్యంగానే కనిపిస్తోంది. మరి ఈ ట్రెండ్‌ను బ్రేక్ చేసి టాలీవుడ్ ఖాళీ కుర్చీని శాశ్వతంగా అధిష్టించే ఆ ఒక్క స్టార్ క్వీన్ ఎవరో కాలమే నిర్ణ‌యించాలి.