ట్రెండీ టాక్: 'స్వ‌యంభు' ఎక్క‌డా త‌గ్గ‌ట్టు లేడు

సౌత్ ఇండియాలో బాహుబలి, ఆర్‌ఆర్‌ఆర్, కాంతార, పుష్ప, కేజీఎఫ్ వంటి పాన్-ఇండియా చిత్రాలు సృష్టించిన సంచలన విజయాలు మిగతా హీరోల్లోనూ భారీ అంచనాలను పెంచాయి. ముఖ్యంగా యువ హీరో నిఖిల్ తన కెరీర్‌లో అత్యంత ప్రతిష్టాత్మకంగా భావిస్తున్న `స్వయంభు` చిత్రం కోసం ఏకంగా మూడేళ్ల విలువైన కాలాన్ని కేటాయించడంపై టాలీవుడ్‌లో తీవ్రమైన చర్చ జరుగుతోంది. బాక్సాఫీస్ వద్ద సరికొత్త రికార్డులను సృష్టిస్తూ పెద్ద‌ స్థాయి ప్రభంజనాన్ని సృష్టించాలనే పట్టుదలతో నిఖిల్ ఈ ప్రాజెక్ట్ కోసం శ్రమిస్తున్నారు.

ఈ భారీ చారిత్రాత్మక చిత్రంలో గ్రాఫిక్స్ - విజువల్ ఎఫెక్ట్స్‌కు అత్యంత ప్రాధాన్యతనిచ్చారు. ఇందులో భాగంగా సినిమా కోసం ఏకంగా 175 రోజుల పాటు సుదీర్ఘమైన షూటింగ్ షెడ్యూల్‌ను పూర్తి చేయగా.. చిత్రంలో సుమారు 2,500 గ్రాఫిక్స్ (VFX) షాట్లు ఉండటం విశేషం. పాన్-ఇండియా స్థాయిలో సినిమాను దృశ్య కావ్యంగా మలచడానికి దర్శకనిర్మాతలు ఎక్కడా రాజీ పడకుండా ఈ భారీ వీఎఫ్‌ఎక్స్ వర్క్‌ను చేపట్టినట్లు తెలుస్తోంది.

ఇలాంటి భారీ విజువల్ గ్రాండియర్ చిత్రాలతో పోల్చి చూసినప్పుడు.. ఇతర పాపుల‌ర్ పాన్-ఇండియా సినిమాలలో ఉపయోగించిన వీఎఫ్‌ఎక్స్ షాట్ల వివరాలు ప‌రిశీలించాలి. రాజమౌళి దర్శకత్వంలో వచ్చిన చారిత్రాత్మక విజయం సాధించిన `బాహుబలి 2: ది కన్‌క్లూజన్` చిత్రంలో దాదాపు 2,250 నుండి 2,400 వరకు వీఎఫ్‌ఎక్స్ షాట్లను ఉపయోగించారు. అదేవిధంగా రాజమౌళి మరో అద్భుత సృష్టి అయిన `ఆర్.ఆర్.ఆర్`(RRR) చిత్రంలో సుమారు 2,800 వీఎఫ్‌ఎక్స్ షాట్లను 18 చోట్ల‌ స్టూడియోల సహకారంతో తెరకెక్కించారు.

ఇక రిషబ్ శెట్టి తెరకెక్కించిన సంచలన చిత్రం `కాంతార` ప్రీక్వెల్ అయిన `కాంతార: చాప్టర్ 1` చిత్రంలో ఏకంగా 3,000కి పైగా వీఎఫ్‌ఎక్స్ షాట్లను వినియోగించినట్లు చిత్ర బృందం తెలిపింది. అదేరీతిలో ప్రశాంత్ నీల్ దర్శకత్వంలో వచ్చిన బాక్సాఫీస్ రికార్డుల కొల్లగొట్టిన `కేజీఎఫ్ `.. సుకుమార్ తెరకెక్కించిన భారీ పాన్-ఇండియా చిత్రం `పుష్ప 2` వంటి చిత్రాలు కూడా తమ విజువల్ వండర్స్ కోసం వేల సంఖ్యలో వీఎఫ్‌ఎక్స్ షాట్లను, అత్యాధునిక కంప్యూటర్ గ్రాఫిక్స్ టెక్నాలజీని ఉపయోగించి ప్రేక్షకులకు అద్భుతమైన థియేట్రికల్ అనుభూతిని అందించాయి.

ఈ నేపథ్యంలో నిఖిల్ `స్వయంభు` చిత్రంలో సుమారు 2500 వీఎఫ్‌ఎక్స్ షాట్లను వాడుతుండటం ఈ సినిమా ఏ స్థాయిలో రూపుదిద్దుకుంటుందో స్పష్టం చేస్తోంది. బాహుబలి వంటి బాక్సాఫీస్ రికార్డుల స్థాయిని టార్గెట్ చేస్తూ.. ఒక యోధుడి కథాంశంతో వస్తున్న ఈ పాన్-ఇండియా చిత్రంపై అంచనాలు తారాస్థాయికి చేరాయి. త్వరలోనే విడుదల కానున్న ట్రైలర్ - సినిమాతో నిఖిల్ ఎలాంటి సంచలనం సృష్టిస్తారనే ఉత్కంఠ సర్వత్రా నెలకొంది.