నిఖిల్.. చరిత్ర నుంచి భవిష్యత్తు వరకు

టాలీవుడ్ లో ఒకప్పుడు లవర్ బాయ్ గా కనిపించిన నిఖిల్ సిద్ధార్థ్, ఇప్పుడు రూట్ పూర్తిగా మార్చేశాడు. 'కార్తికేయ 2' ఇచ్చిన పాన్ ఇండియా సక్సెస్ అతన్నీ మామూలు కథల వైపు చూడనివ్వడం లేదు. కేవలం హిట్టు కొట్టడమే కాదు, తనకంటూ ఒక ప్రత్యేకమైన బ్రాండ్ క్రియేట్ చేసుకోవాలనే కసి అతని లైనప్ లో స్పష్టంగా కనిపిస్తోంది. అనౌన్స్ చేసిన సినిమాలు చూస్తుంటే, ఏదో పెద్ద ప్లానింగే జరుగుతోందని అర్థమవుతోంది.

సాధారణంగా హీరోలు ఒక జానర్ హిట్ అయితే, అదే దారిలో వెళ్తుంటారు. కానీ నిఖిల్ మాత్రం ప్రతీ సినిమాకు ఒక కొత్త ప్రపంచాన్ని ఎంచుకుంటున్నాడు. ఇప్పుడు చేతిలో ఉన్న నాలుగు సినిమాలు, నాలుగు విభిన్నమైన జోనర్లు కావడం విశేషం. చరిత్ర నుంచి భవిష్యత్తు వరకు, డివోషనల్ నుంచి సైన్స్ ఫిక్షన్ వరకు అన్నింటినీ కవర్ చేసేస్తున్నాడు. ఆ లైనప్ వివరాలు తెలిస్తే ఎవరైనా ఆశ్చర్యపోవాల్సిందే.

ముందుగా 'స్వయంభు' సినిమాతో యుద్ధభూమిలో దిగుతున్నాడు. ఒక యోధుడిగా, చక్రవర్తిగా నిఖిల్ చేస్తున్న ఈ భారీ సినిమా ఫిబ్రవరి 13న రిలీజ్ కానుంది. ఆ వెంటనే 1905 నాటి లండన్ బ్యాక్ డ్రాప్ లో 'ది ఇండియా హౌస్' అనే పీరియాడిక్ సినిమా చేస్తున్నాడు. స్వాతంత్ర్యానికి ముందు జరిగిన ఒక విప్లవాత్మక కథతో ఇది తెరకెక్కుతోంది. రామ్ చరణ్, విక్రమ్ రెడ్డి నిర్మాతలుగా ఉండటం దీనికి మరో బలం.

ఇక దేశం మొత్తం ఎంతగానో ఎదురుచూస్తున్న 'కార్తికేయ 3' గురించి ఆసక్తికరమైన పాయింట్ లాక్ చేశారు. ఈసారి డాక్టర్ కార్తికేయ సముద్రం అడుగున ఉన్న ద్వారక నగర రహస్యాలను ఛేదించడానికి వెళ్తున్నాడు. ఈ పాయింట్ వింటూనే గూస్ బంప్స్ వస్తున్నాయి. దీనికి తోడు ఏషియన్ సినిమాస్ తో కలిసి ఒక కొత్త తరహా సైన్స్ ఫిక్షన్ సూపర్ హీరో సినిమాను కూడా నిఖిల్ లైన్లో పెట్టాడు.

ఈ లైనప్ గమనిస్తే నిఖిల్ కేవలం తెలుగు మార్కెట్ నే కాదు, నేషనల్ మార్కెట్ ను గట్టిగా టార్గెట్ చేశాడని అర్థమవుతోంది. ఒక పక్క భక్తి, మరో పక్క దేశభక్తి, ఇంకో పక్క టెక్నాలజీ.. ఇలా అన్ని వర్గాల ఆడియన్స్ ను కవర్ చేసేలా పక్కా స్కెచ్ వేశాడు. ఏ రెండు సినిమాలకు సంబంధం లేకుండా వైవిధ్యం చూపించడమే నిఖిల్ స్ట్రాటజీగా కనిపిస్తోంది.

మొత్తానికి టైర్ 2 హీరోల్లో నిఖిల్ సెలెక్షన్ ఇప్పుడు ఇండస్ట్రీలో హాట్ టాపిక్ గా మారింది. రిస్క్ ఉన్నా సరే, కంటెంట్ నమ్ముకుని భారీ బడ్జెట్ సినిమాలకు శ్రీకారం చుడుతున్నాడు. ఈ నాలుగు సినిమాలు కనుక బాక్సాఫీస్ దగ్గర క్లిక్ అయితే, నిఖిల్ స్టార్ డమ్ నెక్స్ట్ లెవెల్ కు వెళ్లడం ఖాయం. ఇక ఆ సినిమాలు బాక్సాఫీస్ వద్ద ఏ రేంజ్ లో సక్సెస్ అవుతాయో చూడాలి.