నాని మైండ్ గేమ్ ప్యారడైజ్ కి కలిసొచ్చేనా?

సౌత్ సినిమాలు నార్త్‌లో నిలవాలంటే కేవలం సినిమా కంటెంట్ మాత్రమే సరిపోదు, ప్రమోషన్ వ్యూహం ఎంత అగ్రెసివ్‌గా ఉందనేది చాలా కీలకం. న్యాచురల్ స్టార్ నాని, శ్రీకాంత్ ఓదెల కాంబినేషన్‌లో వస్తున్న ‘ది ప్యారడైజ్’ సినిమా విడుదల తేదీ దగ్గరపడుతున్న వేళ, నాని అమలు చేస్తున్న ప్రచార సరళి అందరి దృష్టిని ఆకర్షిస్తోంది. గ్లోబల్ లెవెల్ నుంచి బాలీవుడ్ వరకు ఆయన వేస్తున్న ప్రమోషన్ ప్లాన్ ఈ సినిమాపై అంచనాలను పెంచేస్తోంది. ఆ విశేషాలు చూద్దాం..

యుఎస్ కాన్సర్ట్స్ నుంచి నార్త్ ఇండియా వరకు:

పాన్-ఇండియా హీరోలు ముంబై వెళ్లి కొన్ని ప్రెస్ మీట్లు పెట్టి రావడం సాధారణం. కానీ నాని చాలా స్పష్టమైన ప్లానింగ్‌తో ఉన్నారు. మ్యూజిక్ సెన్సేషన్ అనిరుధ్ రవిచందర్‌తో కలిసి అమెరికా కాన్సర్ట్స్‌లో సందడి చేస్తూ ఓవర్సీస్‌లో ఇప్పటికే పెద్ద బజ్ క్రియేట్ చేశారు. ‘ఆయా షేర్’, ‘యెషనాగుల కట్ట మీద’ పాటలు చార్ట్‌బస్టర్స్ కావడం సినిమాకు కొండంత బలాన్ని ఇచ్చింది. ఇక అక్కడ ప్రచారం పూర్తికాగానే మహారాష్ట్ర, ఢిల్లీ, గుజరాత్ వంటి ఉత్తరాది రాష్ట్రాలపై నాని దృష్టి పెట్టబోతున్నారు.

బాలీవుడ్‌లో సోలో మార్కెట్ పై నాని దృష్టి:

దక్షిణాది సినిమాల్లోని రా, రస్టిక్ అండ్ మాస్ కంటెంట్‌ను ఉత్తరాది ఆడియన్స్ అమితంగా ఆదరిస్తున్నారు. సరైన ప్రమోషన్లు ఉంటే అక్కడ మొదటి రెండు రోజులే ఊహించని ఓపెనింగ్స్ వస్తున్నాయి. ఇప్పటివరకు సౌత్‌లో తిరుగులేని ఇమేజ్‌ను సంపాదించుకున్న నాని, ‘ది ప్యారడైజ్’ రూపంలో లభించిన అవకాశంతో హిందీలో సొంతంగా భారీ సోలో మార్కెట్‌ను స్థాపించాలని చూస్తున్నారు. ఇక కంటెంట్‌ను అక్కడ సరిగ్గా ప్రెజెంట్ చేస్తే వసూళ్ల వర్షం కురవడం ఖాయంగా కనిపిస్తోంది.

క్యారెక్టర్ల విశ్వరూపం – శ్రీకాంత్ ఓదెల మాస్ బొమ్మ:

'దసరా' వంటి భారీ హిట్ తర్వాత శ్రీకాంత్ ఓదెల ఈ సినిమాను దానికి పదిరెట్లు ఉండేలా తెరకెక్కించారని టాక్. ఈ సినిమాలో జడల్ పాత్రలో నాని పెర్ఫార్మన్స్ చాలా కాలం పాటు గుర్తుండిపోతుందని అంటున్నారు. ఇక మోహన్ బాబు, రాఘవ్ జుయెల్ విలన్లుగా నటిస్తుండగా, కయదు లోహర్ హీరోయిన్‌గా కనిపిస్తోంది. అలాగే సంపూర్ణేష్ బాబు ఒక షాకింగ్ రోల్‌లో అలరించబోతున్నారు.

కౌంట్‌డౌన్ స్టార్ట్ – పక్కా ప్లానింగ్‌తో రిలీజ్:

ఇక రిలీజ్‌కు సమయం తక్కువగా ఉండటంతో డబ్బింగ్, ప్యాచ్ వర్క్ పనులను త్వరగా ముగించి పబ్లిసిటీ ఈవెంట్లు, అవుట్‌డోర్ ప్రచారాన్ని వేగవంతం చేయడానికి చిత్ర యూనిట్ సిద్ధమవుతోంది. ఇక ప్రపంచవ్యాప్తంగా రిలీజ్ కానున్న ఈ సినిమాకు ముందు రోజు రాత్రే ప్రీమియర్లు వేసేందుకు ఏర్పాట్లు చేస్తున్నారు.

నాని కెరీర్‌లోనే అత్యంత భారీ బడ్జెట్‌తో వస్తున్న ‘ది ప్యారడైజ్’ ప్రమోషన్ గేమ్ సరికొత్తగా సాగుతోంది. గ్లోబల్ మార్కెట్ నుంచి బాలీవుడ్ దాకా నాని వేస్తున్న వ్యూహాత్మక అడుగులు ఫలిస్తే, ఆయన మార్కెట్ రేంజ్ మరో స్థాయికి వెళ్లడం ఖాయం. ఇక పక్కా కంటెంట్, అగ్రెసివ్ ప్రమోషన్లు తోడైన ఈ సినిమా బాక్సాఫీస్ వద్ద ఎలాంటి రికార్డులు సృష్టిస్తుందో చూడాలి.