వాల్ పోస్టర్ నుంచి మరో కంటెంట్ బాంబ్!

టాలీవుడ్‌లో హీరోగా వరుస విజయాలతో తనకంటూ ప్రత్యేక గుర్తింపు సంపాదించుకున్న నేచురల్ స్టార్ నాని, నిర్మాతగానూ అదే స్థాయిలో ప్రత్యేకమైన గుర్తింపును నిర్మించుకుంటున్నారు. ఆయన స్థాపించిన వాల్ పోస్టర్ సినిమా బ్యానర్ గత కొన్నేళ్లుగా కమర్షియల్ ఫార్ములాలకు భిన్నంగా కంటెంట్‌కు ప్రాధాన్య‌మున్న‌ సినిమాలను ప్రేక్షకులకు అందిస్తూ వస్తోంది. తాజాగా ఇదే దారిలో మరో ఆసక్తికరమైన ప్రాజెక్ట్‌ను నాని నిర్మించేందుకు సిద్ధమవుతున్నట్లు తెలుస్తోంది.

ఈ కొత్త సినిమాకు విమర్శకుల ప్రశంసలు అందుకున్న దండోరా ఫేమ్ మురళీకాంత్ దేవసోత్ దర్శకత్వం వహించనున్నారు. ప్రస్తుతం ఈ ప్రాజెక్ట్‌కు సంబంధించిన ప్రీ ప్రొడక్షన్ పనులు వేగంగా సాగుతున్నాయి. కథ, పాత్రలు, సాంకేతిక బృందం ఎంపికపై డైరెక్ట‌ర్ స్పెష‌ల్ కేర్ తీసుకుంటున్నట్లు తెలుస్తోంది. ముఖ్యంగా కమర్షియల్ హంగులకు అతీతంగా బలమైన కథతో ప్రేక్షకులను ఆకట్టుకునే ప్రయత్నం జరుగుతోందని సమాచారం.

ఈ ప్రాజెక్ట్‌లో హీరోయిన్‌గా రుక్మిణి వసంత్‌ను ఎంపిక చేసినట్లు తెలిసింది. ఇప్పటికే ఆమె కథ విని గ్రీన్ సిగ్నల్ ఇచ్చినట్లు సమాచారం. దీంతో ఈ సినిమాపై సినీ వర్గాల్లో ఆసక్తి పెరిగింది. ఇటీవల సౌత్ సినీ ఇండ‌స్ట్రీలో వరుస అవకాశాలు అందుకుంటున్న రుక్మిణి వసంత్‌కు ఇది మరో కీలక ప్రాజెక్ట్‌గా మారే అవకాశాలు కనిపిస్తున్నాయి. ముఖ్యంగా తెలుగు ప్రేక్షకుల్లో ఆమెకు మంచి గుర్తింపు పెరుగుతున్న సమయంలో నాని బ్యానర్‌లో అవకాశం రావడం విశేషంగా మారింది.

అయితే ప్రస్తుతం ఈ ప్రాజెక్ట్‌కు సంబంధించిన అత్యంత ఆసక్తికర అంశం హీరో ఎంపికే. కథకు సరిపోయే నటుడి కోసం చిత్ర బృందం అన్వేషణ కొనసాగిస్తున్నట్లు తెలుస్తోంది. స్టార్ హీరోను తీసుకుంటారా? లేక కొత్త ఫేస్ కు ఛాన్స్ ఇస్తారా? అనే అంశంపై ఇండస్ట్రీలో చర్చ సాగుతోంది. హీరో ఎంపిక పూర్తయిన తర్వాతే ఈ ప్రాజెక్టుకు సంబంధించిన అఫీషియ‌ల్ అనౌన్స్‌మెంట్ రిలీజ్ చేయాల‌ని నిర్మాతలు భావిస్తున్నట్లు సమాచారం. ఇక వాల్ పోస్టర్ సినిమాస్ బ్యానర్‌ను పరిశీలిస్తే నాని ఎప్పుడూ కంటెంట్ ఓరియెంటెడ్ కథలకే ప్రాధాన్యం ఇచ్చిన విషయం స్పష్టమవుతుంది. కొత్త డైరెక్ట‌ర్లు, కొత్త ఆలోచనలు, విభిన్న కథాంశాలకు అవకాశం కల్పిస్తూ ఈ బ్యానర్ ప్రత్యేక గుర్తింపు సంపాదించింది. కమర్షియల్ స‌క్సెస్‌తో పాటు నాణ్యమైన కథలకు వేదికగా నిలవడం ఈ సంస్థ ప్రధాన బలంగా మారింది. అందుకే ఇప్పుడు మురళీకాంత్ దేవసోత్ వంటి టాలెంటెడ్ డైరెక్ట‌ర్‌తో నాని చేతులు కలపడం కూడా అదే వ్యూహంలో భాగంగా కనిపిస్తోంది.

ఇక ఆగస్టు నెలలో ఈ సినిమా రెగ్యులర్ షూటింగ్ ప్రారంభమయ్యే అవకాశం ఉందని సమాచారం. ప్రస్తుతం డైరెక్ట‌ర్ స్క్రిప్ట్‌కు తుది మెరుగులు దిద్దడంతో పాటు నటీనటులు, సాంకేతిక నిపుణుల ఎంపికపై దృష్టి సారిస్తున్నారు. హీరో ఎంపిక పూర్తైన వెంటనే సినిమాకు సంబంధించిన పూర్తి వివరాలు అధికారికంగా వెల్లడయ్యే అవకాశాలున్నాయి. మొత్తంగా చూస్తే, కంటెంట్ సినిమాలపై తన నమ్మకాన్ని మరోసారి నిరూపించేందుకు నాని సిద్ధమవుతున్నట్లు కనిపిస్తోంది. ఒకవైపు టాలెంటెడ్ డైరెక్ట‌ర్, మరోవైపు క్రేజ్‌లో ఉన్న రుక్మిణి వసంత్, అలాగే వాల్ పోస్టర్ సినిమాస్ బ్యానర్ ట్రాక్ రికార్డ్ కలిసి ఈ ప్రాజెక్ట్‌పై ఇప్పటి నుంచే ఆసక్తిని పెంచుతున్నాయి. అధికారిక ప్రకటన ఎప్పుడు వస్తుందా అనే ఆసక్తితో సినీ అభిమానులు ఎదురుచూస్తున్నారు.