35 ఏళ్లు దూరంగా ఉన్నా విడాకులు తీసుకోలేదు..

నానా పటేకర్ మరణంతో ఆయన వ్యక్తిగత జీవితానికి సంబంధించిన ఎన్నో విషయాలు ఇప్పుడు వైరల్ అవుతున్నాయి. ముఖ్యంగా ఆయన పెళ్లి, భార్యతో ఉన్న బంధం గురించిన ఒక విషయం అందరినీ ఆశ్చర్యపరుస్తోంది. నానా పటేకర్ తన భార్య నీలకంటి పటేకర్‌తో దాదాపు 35 ఏళ్లుగా వేర్వేరుగా జీవించినా, వారిద్దరూ ఎప్పుడూ విడాకులు తీసుకోలేదు. కలిసి ఉండలేకపోయినా చట్టపరంగా బంధాన్ని పూర్తిగా తెంచుకోకపోవడం వెనుక ఉన్న కారణాన్ని గతంలో నానా స్వయంగా వివరించారు.

వారిద్దరి ఆలోచనలు, వ్యక్తిత్వాలు పూర్తిగా భిన్నంగా ఉండేవని నానా ఒక ఇంటర్వ్యూలో చెప్పారు. ఒకే ఇంట్లో ఉంటూ మనస్పర్థలతో రోజూ అసౌకర్యంగా జీవించడం కన్నా, వేర్వేరుగా ప్రశాంతంగా ఉండటమే ఇద్దరికీ మంచిదని వారు భావించారు. ఈ నిర్ణయం కూడా ఏదో గొడవల మధ్య కోపంతో తీసుకున్నది కాదని, ఇద్దరూ కూర్చుని మాట్లాడుకుని మ్యూచువల్ గా తీసుకున్న నిర్ణయం అని ఆయన స్పష్టం చేశారు.

అలా ఒక అంగీకారంతో విడిపోవడం వల్లే వారికి అధికారికంగా విడాకులు తీసుకోవాల్సిన అవసరం అనిపించలేదు. వేర్వేరుగా జీవిస్తున్నప్పటికీ భార్య నీలకంటిపై తనకున్న గౌరవం ఏమాత్రం తగ్గలేదని నానా పలుమార్లు బహిరంగంగానే చెప్పారు. నానా, నీలకంటి ఇద్దరి పరిచయం థియేటర్ నాటకాల రోజుల నుంచే మొదలైంది. కలిసి పని చేస్తూ స్నేహితులైన వీరు, ఆ తర్వాత ప్రేమలో పడి 1978లో పెళ్లి చేసుకున్నారు.

నీలకంటి కూడా ఇండస్ట్రీకి చెందిన వ్యక్తే. ఆరేళ్ల వయసులోనే చైల్డ్ ఆర్టిస్ట్‌గా కెరీర్ మొదలుపెట్టి, పలు మరాఠీ సినిమాల్లో నటించారు. రచయిత్రిగా నేషనల్ అవార్డు కూడా అందుకున్న ఆమె, రీసెంట్ గా విక్కీ కౌశల్ 'ఛావా' సినిమాతో మళ్లీ నటన వైపు అడుగులు వేశారు. వీరి జీవితంలో అత్యంత విషాదకరమైన ఘటన పెద్ద కుమారుడు దుర్వాస మరణం. పుట్టినప్పటి నుంచే ఆరోగ్య సమస్యలతో బాధపడిన దుర్వాస కేవలం రెండున్నరేళ్ల వయసులోనే కన్నుమూశాడు.

ఆ తీవ్రమైన బాధను ఇద్దరూ కలిసి ఎదుర్కొన్నారు. ఆ తర్వాత పుట్టిన చిన్న కుమారుడు మల్హార్ పటేకర్ కూడా సినిమా రంగంలోకి వచ్చినా, కెమెరా వెనుక అసిస్టెంట్ డైరెక్టర్‌గా పని చేయడానికి మాత్రమే ఇష్టపడ్డారు. నానా పటేకర్ ఎంత పెద్ద స్టార్ అయినా తన కుటుంబం, వ్యక్తిగత విషయాలను ఎప్పుడూ మీడియాకు దూరంగా చాలా ప్రైవేట్‌గా ఉంచడానికే ఇష్టపడేవారు.