కొత్త ఏడాదిలో నాగవంశీ బోణీ.. ఇక 'సితార' మరో లెక్క!

యంగ్ ప్రొడ్యూసర్ సూర్యదేవర నాగవంశీకి కొత్త సంవత్సరం మంచి శుభారంభంతో మొదలైంది. గత ఏడాది ఎదురైన ఫ్లాపులు, విమర్శల తర్వాత సితార ఎంటర్టైన్మెంట్స్ బ్యానర్ మళ్లీ సక్సెస్ ట్రాక్ లో అడుగు పెట్టినట్టు కనిపిస్తోంది. సంక్రాంతి పండుగ సందర్భంగా విడుదలైన చిత్రం అనగనగా ఒక రాజు సాధించిన విజయం నాగ వంశీకి మాత్రమే కాదు, ఆయన నిర్మాణ సంస్థకు కూడా పెద్ద ఊరటనిచ్చింది.

దీంతో ఇప్పుడు సినీ వర్గాల్లో ఇక సితార సంస్థ మళ్లీ దూసుకుపోనుందని అంతా మాట్లాడుకుంటున్నారు. నిజానికి గత ఏడాది నాగవంశీకి నిరాశ మిగిల్చింది. కింగ్‌ డమ్, మాస్ జాతర వంటి సినిమాలు బాక్సాఫీస్ వద్ద పూర్తిగా విఫలమయ్యాయి. భారీ అంచనాలతో తెరకెక్కిన వార్ 2 విషయంలో కూడా సోషల్ మీడియాలో తీవ్ర ట్రోలింగ్ ఎదురైంది. అలా మంచి ఫలితాలు రాలేదని చెప్పాలి.

ఆ పరిస్థితులపై ఇటీవల ఇచ్చిన ఇంటర్వ్యూల్లో నాగ వంశీ స్పందిస్తూ, గత ఏడాది తన బ్యానర్‌ కు అనుకున్నంత మంచి ఫలితాలు రాలేదని అంగీకరించారు. ఇలాంటి పరిస్థితుల్లో కొత్త ఏడాదికి వచ్చిన తొలి విజయం నాగ వంశీకి కొత్త ఉత్సాహాన్ని ఇచ్చింది. యంగ్ హీరో నవీన్ పోలిశెట్టిని నమ్మి నిర్మించిన అనగనగా ఒక రాజు సంక్రాంతి బరిలో నిలిచి మంచి ఫలితాన్ని అందుకుంది.

పెద్ద హీరోల సినిమాలు, భారీ బడ్జెట్ చిత్రాల మధ్య విడుదలైనా.. మూవీ ప్రేక్షకుల మనసు గెలుచుకుంది. స్టోరీ, కామెడీ, కుటుంబ ప్రేక్షకులకు నచ్చే అంశాలు ఈ సినిమాకు కలిసి వచ్చాయి. థియేటర్లలో ఆ చిత్రం మంచి వసూళ్లు సాధించడంతో పాటు, ట్రేడ్ వర్గాల్లో కూడా సానుకూల స్పందన తెచ్చుకుంది. ముఖ్యంగా నవీన్ పోలిశెట్టికి ఉన్న మార్కెట్ కారణంగా సినిమా విడుదలకు ముందే ఓటీటీ, శాటిలైట్ హక్కులు మంచి ధరలకు అమ్ముడయ్యాయి.

దీంతో థియేట్రికల్ వసూళ్లతో పాటు నాన్- థియేట్రికల్ ఆదాయం కూడా నిర్మాతకు లాభాలు తెచ్చిపెట్టే అవకాశాలు కనిపిస్తున్నాయి. ఆ విజయం సితార ఎంటర్టైన్మెంట్స్‌ కు మళ్లీ నమ్మకాన్ని తీసుకొచ్చింది. ఆ హిట్‌ తో నాగ వంశీ ఫ్యూచర్ ప్లాన్స్ పై కూడా ఆసక్తి పెరిగింది. 2026లో సితార బ్యానర్‌ పై రూపొందుతున్న పలు కీలక సినిమాలు విడుదలకు సిద్ధమవుతున్నాయి.

కొత్త దర్శకులు, యువ హీరోలతో పాటు స్టార్ హీరోలతో కూడా ప్రాజెక్టులు లైన్‌ లో ఉన్నాయని సమాచారం. మొత్తానికి కొత్త ఏడాదిలో వచ్చిన తొలి హిట్ నాగ వంశీకి బోణీలా మారింది. వరుస పరాజయాల తర్వాత అనగనగా ఒక రాజు మూవీతో వచ్చిన హిట్ ఆయనలో జోష్ నింపింది. ఇప్పుడు సితార ఎంటర్టైన్మెంట్స్ పై రూపొందుతున్న అప్ కమింగ్ మూవీస్ ఎలా ఉంటాయో.. నాగవంశీకి ఎలాంటి హిట్స్ అందుతాయో వేచి చూడాలి.