యంగ్ హీరో స‌క్సెస్ ను కంటిన్యూ చేస్తాడా?

గ‌త కొన్ని సినిమాలుగా ఫ్లాపుల్లో ఉన్న అక్కినేని నాగ‌చైత‌న్యకు తండేల్ సినిమా హిట్ తో చాలా పెద్ద ఊర‌ట ల‌భించింది. తండేల్ మూవీతో చైతూ కెరీర్లోనే బిగ్గెస్ట్ హిట్ అందుకున్నారు. ప్ర‌స్తుతం విరూపాక్ష ఫేమ్ కార్తీక్ దండు ద‌ర్శ‌క‌త్వంలో ఓ మిథిక‌ల్ థ్రిల్ల‌ర్ ను చేస్తున్నారు చైతూ. భారీ బ‌డ్జెట్ తో తెర‌కెక్కుతున్న ఈ సినిమా షూటింగ్ మొద‌లై ఇప్ప‌టికే ఆరు నెల‌లు దాటింది. మీనాక్షి చౌద‌రి హీరోయిన్ గా న‌టిస్తున్న ఈ మూవీని కూడా విరూపాక్ష త‌రహాలోనే తెర‌కెక్కిస్తున్నార‌ట డైరెక్ట‌ర్.

50% షూటింగ్ పూర్తి

విరూపాక్షతో డైరెక్ట‌ర్ గా అంద‌రినీ మెప్పించిన కార్తీక్ దండు, ఈ సినిమాతో మ‌రో మెట్టు ఎక్కాల‌ని చూస్తున్నారు. అందులో భాగంగానే ఈ సినిమా విష‌యంలో ఎంతో జాగ్ర‌త్త‌గా ఆచితూచి వ్య‌వ‌హ‌రిస్తూ, ఏ విష‌యంలో రాజీ ప‌డ‌టం లేద‌ని తెలుస్తోంది. చైతూ కెరీర్లో 24వ సినిమాగా తెర‌కెక్కుతున్న ఈ సినిమా షూటింగ్ శ‌ర‌వేగంగా జ‌రుగుతుండ‌గా, ఇప్ప‌టికే మూవీ 50% షూటింగ్ ను పూర్తి చేసుకున్న‌ట్టు తెలుస్తోంది.

NC24 కోసం భారీ గుహ సెట్

ఈ మిస్టిక్ థ్రిల్ల‌ర్ కోసం మేక‌ర్స్ హైద‌రాబాద్‌లోని అన్న‌పూర్ణ స్టూడియోస్ లో ఓ భారీ గుహ‌ను సెట్ వేయ‌గా, ప్ర‌స్తుతం అక్క‌డే ఈ మూవీ షూటింగ్ జ‌రుగుతుంది. అయితే న‌వంబ‌ర్ 16 నుంచి హీరో హీరోయిన్ల‌తో పాటూ వైవా హ‌ర్ష‌, జ‌య‌రాం తో ఆరు రోజుల పాటూ ఆ గుహ సెట్ లోనే షూటింగ్ చేయ‌నున్నార‌ట‌. దీంతో ఆ స్పెష‌ల్ సెట్ లో షూటింగ్ పూర్త‌వ‌నున్న‌ట్టు తెలుస్తోంది.

స‌మ్మ‌ర్ రిలీజ్ కు ప్లాన్

ఈ మిథిక‌ల్ థ్రిల్ల‌ర్ మూవీని బీవీఎస్ఎన్ ప్ర‌సాద్ తో క‌లిపి సుకుమార్ నిర్మిస్తుండ‌గా, కాంతార ఫేమ్ అజ‌నీష్ లోక‌నాథ్ సంగీతాన్ని అందిస్తున్నారు. నెక్ట్స్ ఇయ‌ర్ స‌మ్మ‌ర్ లో NC24ను రిలీజ్ చేసేందుకు మేక‌ర్స్ ప్లాన్ చేస్తుండ‌గా, చైత‌న్య ఈ జాన‌ర్ లో సినిమా చేయ‌డం ఇదే మొద‌టిసారి. తండేల్ సినిమా త‌ర్వాత కెరీర్ ను జాగ్ర‌త్తగా ప్లాన్ చేసుకుంటున్న చైతూ, ఈ మూవీతో మ‌రో హిట్ అందుకుని, ఆ స‌క్సెస్ స్ట్రీక్ ను కంటిన్యూ చేయాల‌ని చూస్తున్నారు. మ‌రి ఏమ‌వుతుందో చూడాలి.