మైత్రి కొత్త స్ట్రాటజీ వెనుక అసలు గేమ్ ప్లాన్ ఇదేనా?

తెలుగు చిత్ర పరిశ్రమలో థియేటర్ల వ్యవస్థ వేగంగా రూపాంతరం చెందుతోంది. సింగిల్ స్క్రీన్లు ఒక్కొక్కటిగా మూతపడుతున్నాయనే ఆందోళనల నడుమ, ప్రముఖ నిర్మాణ సంస్థ మైత్రి మూవీ మేకర్స్ ఎగ్జిబిషన్ రంగంలోకి అడుగుపెట్టింది. పాత థియేటర్లను అల్ట్రా-మోడర్న్ స్క్రీన్లుగా తీర్చిదిద్దుతోంది. మైత్రి విమల్, గంగ లాంటి ఐకానిక్ సింగిల్ స్క్రీన్లకు కార్పొరేట్ స్పర్శ అందిస్తూ ప్రేక్షకాదరణ పొందుతోంది. నిర్మాతలు నేరుగా థియేటర్ ఎగ్జిబిషన్‌ను చేతుల్లోకి తీసుకోవడం టాలీవుడ్ వ్యాపార సమీకరణాల్లో ఒక కొత్త అధ్యాయానికి తెరలేపింది.

ప్రొడక్షన్ టూ ఎగ్జిబిషన్: వర్టికల్ ఇంటిగ్రేషన్ వ్యూహం:

సినిమా నిర్మాణ దశ నుంచి థియేటర్ స్క్రీన్ వరకు జరిగే ప్రయాణంలో ఎగ్జిబిటర్ల పాత్ర చాలా కీలకం. మైత్రి లాంటి బడా నిర్మాణ సంస్థలు పాత థియేటర్లను లీజ్‌కు తీసుకుని ఆధునీకరించడం వెనుక పెద్ద వ్యూహమే ఉంది. ఇలా చేయడం ద్వారా ప్రొడక్షన్, డిస్ట్రిబ్యూషన్, ఎగ్జిబిషన్ అనే మూడు విభాగాాలపై పట్టు సాధిస్తున్నారు. ఇక దీనివల్ల తమ సినిమాలకు డోల్బీ అట్మాస్, 4K ప్రొజెక్షన్ వంటి టాప్ క్లాస్ సౌకర్యాలున్న మంచి స్క్రీన్లను సొంతంగా కేటాయించుకునే వెసులుబాటు లభిస్తుంది.

సామాన్యుడికి లగ్జరీ సినిమా: మల్టీప్లెక్స్‌లకు చెక్:

ప్రస్తుతం మల్టీప్లెక్స్‌లలో టికెట్ రేట్లు, పాప్‌కార్న్ ధరలు ఆకాశాన్నంటుతుండటంతో సామాన్య ప్రేక్షకుడు థియేటర్లకు రావడమే తగ్గించేశాడు. ఇలాంటి తరుణంలో పాత సింగిల్ స్క్రీన్లను అధునాతన సాంకేతికతతో రెనొవేట్ చేయడం పెద్ద ప్లస్ అయింది. ఇక తక్కువ ధరలోనే మల్టీప్లెక్స్ స్థాయి ప్రీమియం ఎక్స్‌పీరియన్స్‌ను అందించడం ద్వారా మైత్రి మోడల్ మల్టీప్లెక్స్ మోనోపోలీకి గట్టి పోటీనిస్తోంది. ఇది మాస్ ప్రేక్షకులను మళ్లీ థియేటర్ల వైపు రప్పించడంలో సక్సెస్ అవుతోంది.

చిన్న సినిమాలకు అవకాశమా? కష్టమా? :

బడా నిర్మాతల చేతికి థియేటర్ల నెట్‌వర్క్ వెళ్లడం వల్ల నాణ్యమైన స్క్రీన్లు అందుబాటులోకి వస్తున్నప్పటికీ, చిన్న సినిమాల విషయంలో కాస్త ఆందోళన ఉంది. పెద్ద ప్రొడక్షన్ హౌస్‌లు సొంతంగా థియేటర్లు కలిగి ఉంటే చిన్న సినిమాలకు స్క్రీన్లు దొరకడం కష్టమవుతుందనే చర్చ నడుస్తోంది. అయితే కంటెంట్ ఉన్న చిన్న చిత్రాలకు కూడా ఇలాంటి క్వాలిటీ స్క్రీన్స్ కేటాయిస్తే, బాక్సాఫీస్ వద్ద వాటి విజయావకాశాలు మరియు కలెక్షన్లు మరింత పెరిగే అవకాశం ఉంటుంది.

సినిమా వ్యాపారంలో ఎప్పటికప్పుడు సరికొత్త ట్రెండ్స్ వస్తుంటాయి. నిర్మాతలు ఎగ్జిబిషన్ రంగంలో పెట్టుబడులు పెట్టి థియేటర్లకు కొత్త ఊపిరి పోయడం నిజంగా ఆహ్వానించదగ్గ పరిణామం. ఇక సరికొత్త సాంకేతికతను జోడించి ప్రేక్షకుడికి తక్కువ ధరకే అత్యుత్తమ వీక్షణ అనుభూతిని అందిస్తే, ఓటీటీల హవా ఉన్నప్పటికీ థియేటర్ వ్యవస్థ ఎప్పటికీ కళకళలాడుతుందని మైత్రి మూవీ మేకర్స్ ఈ నయా ట్రెండ్‌తో నిరూపిస్తోంది.