అందాల ప్రమాణాలకు చెక్.. కాన్ఫిడెన్స్‌తో ట్రెండ్ సెట్ చేస్తున్న మృణాల్

హీరోయిన్లపై సైజ్ జీరో ముద్ర వేయాలనే ఒత్తిడి సినీ ఇండ‌స్ట్రీలో కొత్తదేమీ కాదు. కానీ ఆ ట్రెండ్‌కు భిన్నంగా తన స్వరాన్ని వినిపిస్తున్నారు మృణాల్ ఠాకూర్ . త‌న‌కు ఆరోగ్యం ముఖ్య‌మ‌ని, అవాస్తవమైన అందాల ప్రమాణాల‌ను మ్యాచ్ చేయ‌డం త‌న‌కు ముఖ్యం కాద‌ని ఆమె స్పష్టంగా చెప్పడం, కేవలం వ్యక్తిగత అభిప్రాయంగా మాత్రమే కాకుండా బాడీ పాజిటివిటీపై ఒక స్ట్రాంగ్ స్టేట్‌మెంట్ గా మారింది.

య‌ధాత‌థంగా స్వీక‌రించారు

తెలుగు ఆడియ‌న్స్ త‌న గ్లామ‌ర్ ను, స్క్రీన్ ప్రెజెన్స్ ను య‌ధాత‌థంగా స్వీక‌రించార‌ని ఆమె చెప్ప‌డం చూస్తుంటే బాలీవుడ్ లో మృణాల్ త‌న బ‌రువు విష‌యంలో ప్ర‌శ్న‌లు ఎదుర్కొన్నారేమో అనిపిస్తోంది. బాలీవుడ్ లో హీరోయిన్ల‌కు స‌న్న‌గా, ఒక నిర్దిష్ట శ‌రీరాకృతితో క‌నిపించాల‌నే అంచనాలు ఎక్కువ‌గా ఉంటాయ‌నే సంగ‌తి తెలిసిందే. ఈ నేప‌థ్యంలో మృణాల్ చేసిన వ్యాఖ్య‌లు రెండు ఇండ‌స్ట్రీల మ‌ధ్య ఉన్న మైండ్‌సెట్ తేడాను చాలా స్ప‌ష్టంగా చూపిస్తున్నాయి.

ఫిట్ గా ఉండ‌ట‌మంటే స‌న్న‌గా ఉండ‌టం కాదు

ఇది కేవలం ప్రాంతీయ పోలిక మాత్ర‌మే కాదు, మహిళలపై ఉండే అందాల ప్రమాణాలపై పెద్ద చర్చకు దారి తీసే అంశం. ఫిట్‌గా ఉండట‌మంటే క‌చ్ఛితంగా సన్నగా ఉండటం కాదని మృణాల్ చెప్తున్న విష‌యం, యువతకు ఆరోగ్యకరమైన దృక్పథాన్ని అందిస్తుంది. శరీరాన్ని మార్చుకోవడం కంటే, దాన్ని అంగీకరించి సంరక్షించుకోవడం ముఖ్యమనే భావన ఆమె మాటల్లో స్పష్టంగా కనిపిస్తుంది. సోషల్ మీడియా కాలంలో బాడీ షేమింగ్ కామెంట్లు సాధారణమైపోయిన నేపథ్యంలో, ఒక ప్రముఖ నటి ఇలాంటి స్పష్టమైన స్టాండ్ తీసుకోవడం ప్రాముఖ్యతను సంతరించుకుంది.

డెకాయిల్ సాంగ్ లో మృణాల్ లుక్స్ కు మంచి ప్ర‌శంస‌లు

రీసెంట్ గా రిలీజైన డెకాయిట్ సినిమాలోని సాంగ్ లో కూడా మృణాల్ లుక్‌కు విపరీతమైన రెస్పాన్స్ వచ్చింది. అడివి శేష్ తో కలిసి ఆమె కనిపించిన ఆ సాంగ్ సోషల్ మీడియాలో ట్రెండ్ అయింది. అభిమానులు ఆమె అందాన్ని, సహజమైన ఆకర్షణను, ఆత్మవిశ్వాసాన్ని ప్రశంసిస్తూ కామెంట్లు చేస్తున్నారు. నేచురల్ బ్యూటీ, ఎఫర్ట్‌లెస్ చార్మ్, రియల్ గ్లామర్ లాంటి పదాలతో ఫ్యాన్స్ ఆమెను పొగిడేస్తున్నారు. ఇది ప్రేక్షకుల అభిరుచుల్లో కూడా మార్పు వస్తోందనే సంకేతంగా చూడొచ్చు.

అవేవీ ఇప్పుడు ప్ర‌భావితం చేయ‌లేవు

కాగా మృణాల్ తన శరీరాన్ని తాను అంగీకరించిన తర్వాత మరింత కాన్ఫిడెంట్ గా మారాన‌ని చెప్పారు. కెరీర్ ప్రారంభ దశలో ఉన్న అనుమానాలు, బాహ్య విమర్శలు ఇప్పుడు తనను ప్రభావితం చేయవని ఆమె చెప్తున్నారు. ఈ మార్పు ఆమె వ్యక్తిగత ఎదుగుదలకు కూడా నిదర్శనం. నటిగా మాత్రమే కాకుండా, ఒక మహిళగా తన నిర్ణయాలను గౌరవించడాన్ని నేర్చుకున్నానని ఆమె చెప్తున్న మాటలు ఇన్‌స్పైరింగ్ గా ఉన్నాయి. మృణాల్ తీసుకున్న ఈ స్పష్టమైన వైఖరి, ఇతర నటీమణులకు కూడా ధైర్యం ఇచ్చేలా ఉంది. మొత్తానికి, ఇది ఒక హీరోయిన్ లుక్ గురించి వచ్చిన ప్రశంసల కథ మాత్రమే కాదు. ఇది బాడీ పాజిటివిటీ, ఇండస్ట్రీ మైండ్‌సెట్ మార్పు, ఫ్యాన్ సపోర్ట్, మరియు ముఖ్యంగా ఒక మహిళ తనను తాను అంగీకరించుకున్న ఆత్మవిశ్వాస ప్రయాణం గురించి చెప్పే కథ అని చెప్పొచ్చు.