బ్యానర్‌లో కాదు.. ఆయనతోనే సినిమా చేయాలనుంది: మౌళి

టాలీవుడ్ యంగ్ హీరో మౌళి తనూజ్ ప్రశాంత్ యూట్యూబర్‌గా మొదలై, 'నైంటీస్' వెబ్ సిరీస్, 'లిటిల్ హార్ట్స్' సినిమాలతో నటుడిగా తనకంటూ మంచి గుర్తింపు తెచ్చుకున్నాడు. ఎలాంటి సినీ బ్యాక్‌గ్రౌండ్ లేకుండా స్వయంకృషితో ఎదుగుతున్న ఈ కుర్ర హీరో, ఇప్పుడు ‘దొంగ నా కొడుకు’ సినిమాతో ప్రేక్షకుల ముందుకు వస్తున్నాడు. ఈ సినిమా ప్రమోషన్లలో భాగంగా ఇటీవల ఇచ్చిన ఓ ఇంటర్వ్యూలో నేచురల్ స్టార్ నాని గురించి మౌళి చేసిన కామెంట్స్ ఇప్పుడు సోషల్ మీడియాలో ఆసక్తికరంగా మారాయి. ఆ వివరాలు ఇలా వున్నాయి..

నానికి డై హార్డ్ ఫ్యాన్:

మౌళి తనూజ్ తనకు నేచురల్ స్టార్ నాని అంటే విపరీతమైన అభిమానమని, తాను నానికి 'డై హార్డ్ ఫ్యాన్' అని చాలా సందర్భాల్లో ఓపెన్‌గానే చెప్పాడు. ఎలాంటి బ్యాక్‌గ్రౌండ్ లేకుండా వచ్చి నాని ఇండస్ట్రీలో ఎదిగిన తీరు, ఆయన సినిమాలు తనకు ఎంతో బలాన్ని ఇచ్చాయని మౌళి ఎప్పుడూ చెబుతుంటాడు.

నానిని డైరెక్ట్ చేయాలనేదే నా కోరిక!:

మౌళికి 'పిల్ల జమీందార్' సినిమా రోజుల నుంచే హీరో నాని అంటే విపరీతమైన అభిమానం. అయితే, నాని సొంత బ్యానర్ 'వాల్ పోస్టర్ సినిమా'లో నటించే అవకాశం వస్తే చేస్తావా అని ఇంటర్వ్యూలో అడిగితే మౌళి ఆసక్తికర సమాధానం ఇచ్చాడు. తనకు నాని బ్యానర్‌లో సినిమా చేయడం కంటే, ఏకంగా నాని తోనే ఓ సినిమా డైరెక్ట్ చేయాలని ఉందని చెప్పాడు. ఇది వినడానికి పెద్ద స్టేట్‌మెంట్‌లా అనిపించినా, అదే తన అసలు కోరిక అని మనసులో మాట బయటపెట్టాడు.

అభిమానిలా కాకుండా గుర్తింపుతో కలవాలని!:

నాని బ్యానర్‌లో పనిచేయడం ఇష్టం లేక మౌళి ఇలా అనలేదు. ఒక సాధారణ నటుడిగా కాకుండా, ముందు తనకంటూ ఒక ప్రత్యేక గుర్తింపు తెచ్చుకుని నాని మనసు గెలుచుకోవాలనేది అతని ఆశ. ఇక ఒక సాధారణ అభిమానిలా నానిని కలవడం తనకు ఇష్టం లేదని, నాని గర్వపడే స్థాయికి ఎదిగిన తర్వాతే ఆయనతో కలిసి పనిచేయాలని లక్ష్యంగా పెట్టుకున్నట్లు మౌళి గతం లోను చెప్పుకొచ్చాడు.

‘దొంగ నా కొడుకు’తో నవంబర్ 13న సందడి! :

ప్రముఖ నిర్మాణ సంస్థ మైత్రీ మూవీ మేకర్స్ నిర్మిస్తున్న ఈ చిత్రంతో శ్రీను కంబాల దర్శకుడిగా పరిచయమవుతున్నారు. నవంబర్ 13న ఈ సినిమా థియేటర్లలో విడుదల కానుంది. ఇప్పటికే రిలీజైన ఫస్ట్ లుక్, టీజర్, పాటలు సినిమాపై మంచి అంచనాలను పెంచాయి. ఇందులో అలీ, రజిత, రఘుబాబు, గుండు సుదర్శన్ ముఖ్య పాత్రల్లో నటించారు.

ఒక యూట్యూబర్ స్థాయి నుంచి స్టార్ ప్రొడక్షన్ హౌస్‌లో హీరోగా చేసే వరకు మౌళి ప్రయాణం ఎంతోమందికి స్ఫూర్తిగా నిలుస్తోంది. మరి నవంబర్ 13న రాబోతున్న 'దొంగ నా కొడుకు'తో మౌళి ఎలాంటి హిట్ అందుకుంటాడో, భవిష్యత్తులో నానితో సినిమా చేసే తన కలను ఎప్పుడు నెరవేర్చుకుంటాడో చూడాలి.