భారీ బడ్జెట్.. తక్కువ టైమ్.. మెగా 158పై పెరుగుతున్న టెన్షన్!

చిరంజీవి- బాబీ కొల్లి కాంబినేషన్‌లో రూపొందుతున్న మెగా158పై టాలీవుడ్‌లో అంచనాలు రోజురోజుకీ పెరుగుతున్నాయి. వాల్తేరు వీరయ్య లాంటి బ్లాక్‌బస్టర్ తర్వాత ఈ ఇద్దరి కాంబోలో వస్తున్న సినిమా కావడంతో ఫ్యాన్స్‌తో పాటు ట్రేడ్ వర్గాలు కూడా ఈ ప్రాజెక్ట్‌ను అత్యంత ఆసక్తిగా గమనిస్తున్నాయి. అయితే ఈసారి డైరెక్ట‌ర్ బాబీ ముందున్న అసలు సవాలు కథ లేదా స్టార్ క్యాస్ట్ మాత్రమే కాదు, టైమ్ తో ఆయ‌న చేయాల్సిన పోరాటం.

సంక్రాంతి 2027ను టార్గెట్‌గా పెట్టుకున్న ఈ భారీ మాస్ ఎంటర్‌టైనర్‌ను కేవలం కొన్ని నెలల్లో పూర్తి చేసి ప్రేక్షకుల ముందుకు తీసుకురావ‌టం కుదురుతుందా అనేది ఇప్పుడు ఇండస్ట్రీలో హాట్ టాపిక్‌గా మారింది. ఈ సినిమా మొదట మార్చి మొద‌టి వారంలోనే షూటింగ్ ప్రారంభం కావాల్సి ఉన్నా, వివిధ కారణాలతో ఆలస్యం జరిగింది. ఇప్పుడు మే చివరి వారం నుంచి రెగ్యులర్ షూటింగ్ ప్రారంభం కానుండగా, టీమ్ మొత్తం ఫాస్ట్‌ట్రాక్ మోడ్‌లోకి వెళ్లినట్లు సమాచారం.

ఈ పరిస్థితుల్లో బాబీకి ఇది కెరీర్‌లోనే అతిపెద్ద పరీక్షగా మారింది. ఒకవైపు కెవిఎన్ ప్రొడ‌క్ష‌న్స్ భారీ బడ్జెట్‌తో ఎలాంటి రాజీ లేకుండా సినిమాను నిర్మించేందుకు సిద్ధమవుతుండగా, మరోవైపు సంక్రాంతి రిలీజ్ డెడ్‌లైన్ మాత్రం డైరెక్ట‌ర్ పై తీవ్రమైన ఒత్తిడిని పెంచుతోంది. ముఖ్యంగా మెగాస్టార్ సినిమా అంటే భారీ సెట్స్, మాస్ యాక్షన్ ఎపిసోడ్స్, సాంగ్స్, స్టార్ క్యాస్ట్ కాంబినేషన్స్, పండుగ వాతావరణాన్ని టార్గెట్ చేసే కమర్షియల్ ఎలిమెంట్స్ అన్నీ ఉండాల్సిందే. వీట‌న్నింటినీ ఫాస్ట్ గా షూట్ చేయడమే కాదు, క్వాలిటీ తగ్గకుండా ప్రేక్షకులకు అందించాల్సిన బాధ్యత కూడా బాబీపై ఉంది. ఈ నేప‌థ్యంలో నటీనటుల కాల్షీట్స్, ప్లానింగ్‌లో చిన్న పొరపాటు జరిగినా రిలీజ్ డేట్‌పై ప్రభావం పడే అవకాశం ఉందని ట్రేడ్ వర్గాలు భావిస్తున్నాయి.

ఇక అసలు చర్చ మాత్రం పోస్ట్ ప్రొడక్షన్ విషయంలోనే జరుగుతోంది. ఒక భారీ కమర్షియల్ సినిమా కోసం సాధారణంగా నెలల తరబడి జరిగే ఎడిటింగ్, రీరికార్డింగ్, వీఎఫ్ఎక్స్ లాంటి పనులను ఈసారి చాలా తక్కువ సమయంలో పూర్తి చేయాల్సి రావొచ్చు. ఇదే ఇప్పుడు ఇండస్ట్రీలో ప్రధాన చర్చగా మారింది. ఇటీవల కొన్ని పెద్ద సినిమాలు డెడ్‌లైన్ ఒత్తిడి కారణంగా విజువల్ క్వాలిటీ విషయంలో విమర్శలు ఎదుర్కొన్న ఉదాహరణలు ఉన్నాయి. అందుకే మెగా158 విషయంలో కూడా అదే రిస్క్ ఉంటుందా అనే సందేహాలు వ్యక్తమవుతున్నాయి. అయితే మరోవైపు బాబీ గతంలో వాల్తేరు వీరయ్యతో మాస్ ఆడియన్స్ పల్స్ బాగా అర్థం చేసుకున్న డైరెక్ట‌ర్ గా తన సామర్థ్యాన్ని నిరూపించుకున్నారు. అదే నమ్మకంతోనే చిరంజీవి ఈ ప్రాజెక్ట్‌ను వేగంగా ముందుకు తీసుకెళ్లేందుకు గ్రీన్ సిగ్నల్ ఇచ్చినట్లు తెలుస్తోంది. అయితే బాబీ ఈ భారీ ఒత్తిడిని విజయంగా మార్చి మరోసారి వాల్తేరు వీరయ్య మ్యాజిక్‌ను రిపీట్ చేస్తాడా లేదా అనే దానిపైనే ఇప్పుడంద‌రి చూపు ఉంది.