ఈ రోజుల్లో, బస్ స్టాప్.. మళ్ళీ అలాంటి మారుతి..

రెబల్ స్టార్ ప్రభాస్ తో 'ది రాజాసాబ్' అవకాశం దక్కించుకున్నప్పుడు దర్శకుడు మారుతి కెరీర్ పీక్స్ కు వెళ్తుందని అంతా అనుకున్నారు. కానీ బాక్సాఫీస్ దగ్గర ఆ భారీ ప్రయోగం దారుణమైన డిజాస్టర్ గా మిగిలింది. భారీ బడ్జెట్, హారర్ కామెడీ సెటప్ ఏదీ ఆడియన్స్ ను మెప్పించలేకపోయింది. దీంతో పాన్ ఇండియా డైరెక్టర్ గా నిలబడాలన్న మారుతి ఆశలపై నీళ్లు చల్లినట్లయింది. ఆ పరాజయం ఇచ్చిన షాక్ నుంచి తేరుకోవడానికి ఆయనకు చాలా సమయమే పట్టింది.

ఆ ప్లాప్ తర్వాత స్టార్ హీరోల నుంచి మారుతికి డేట్లు దక్కే పరిస్థితులు దాదాపు మూసుకుపోయాయి. టైర్ 1 హీరోలను పక్కనపెడితే, మీడియం రేంజ్ హీరోలు కూడా ఆయనతో ప్రాజెక్ట్ చేయడానికి ఒకటికి రెండుసార్లు ఆలోచించే పరిస్థితి ఏర్పడింది. ఇలాంటి టైమ్ లో పెద్ద హీరోల డేట్ల కోసం ఏళ్ల తరబడి ఎదురుచూస్తూ కూర్చుంటే కెరీర్ మరింత ప్రమాదంలో పడుతుందని మారుతి గ్రహించారు. అందుకే అనూహ్యంగా తన పాత దారిలోకి యూ టర్న్ తీసుకున్నారు.

లేటెస్ట్ గా వస్తున్న టాక్ ప్రకారం, మారుతి తన తర్వాతి ప్రాజెక్ట్ ను పూర్తిగా కొత్త నటీనటులతో ప్లాన్ చేసుకుంటున్నట్లు తెలుస్తోంది. వచ్చే నవంబర్ లో షూటింగ్ మొదలుపెట్టి, మార్చి నాటికల్లా గుమ్మడికాయ కొట్టేలా పక్కా షెడ్యూల్ రెడీ చేసుకున్నారట. నాలుగు నెలల గ్యాప్ లోనే పని పూర్తి చేయాలనే ఈ నిర్ణయం చూస్తుంటే, ఆయన కెరీర్ ప్రారంభంలో వచ్చిన 'ఈ రోజుల్లో', 'బస్ స్టాప్' నాటి వర్కింగ్ స్టైల్ ను మళ్లీ రీ క్రియేట్ చేయాలని చూస్తున్నట్లు అర్థమవుతుంది.

నిజానికి మారుతికి బలమైన మార్కెట్ ను, క్రేజ్ ను తెచ్చిపెట్టింది ఇలాంటి లో బడ్జెట్ కాన్సెప్ట్ చిత్రాలే. తక్కువ ఖర్చుతో పక్కా యూత్ ఫుల్ ఎంటర్ టైనర్లను తీసి భారీ లాభాలు అందించడంలో ఆయనకు మంచి ట్రాక్ రికార్డ్ ఉంది. భారీ గ్రాఫిక్స్, స్టార్ హీరోల ఇమేజ్ భారం లేకుండా కేవలం కంటెంట్, కామెడీ మీదే నడిచే సినిమాల్లో ఆయన మార్క్ స్పష్టంగా కనిపిస్తుంది. ఆ కంఫర్ట్ జోన్ కు తిరిగి రావడం ప్రస్తుత పరిస్థితుల్లో చాలా అవసరమైన స్టెప్.

ట్రేడ్ పరంగా చూసినా ఇది మారుతి వేసిన చాలా ప్రాక్టికల్ గేమ్‌ప్లాన్. కొత్త వాళ్లతో తీసే సినిమాకు బడ్జెట్ రిస్క్ అసలే ఉండదు. నాన్ థియేట్రికల్ మార్కెట్ ద్వారానే నిర్మాతలు చాలావరకు సేఫ్ జోన్ లోకి వచ్చేస్తారు. రాజాసాబ్ ఇచ్చిన నెగెటివ్ టాక్ ను పోగొట్టుకోవాలంటే, మళ్లీ బాక్సాఫీస్ దగ్గర ఒక ఫ్రెష్ హిట్ తో తన డైరెక్షన్ పవర్ ను నిరూపించుకోవాల్సిందే. అందుకు తక్కువ సమయంలో వచ్చే ఇలాంటి చిన్న ప్రయత్నం సరైందే.

పెద్ద దర్శకులైనా సరే భారీ ఎదురుదెబ్బలు తగిలినప్పుడు మళ్లీ తమ మూలాల్లోకి వెళ్లి హిట్ కొట్టిన చరిత్రలు ఇండస్ట్రీలో చాలా ఉన్నాయి. మారుతి కూడా ఆ పంథాలోనే మళ్లీ తన బలాన్ని నమ్ముకుని గ్రౌండ్ లెవెల్ కు వచ్చారు. వినోదాన్ని నమ్ముకుని, సరైన కంటెంట్ తో ఆడియన్స్ ను మెప్పిస్తే ఆయనకు పూర్వవైభవం రావడం కష్టమేమీ కాదు.