లవర్ బాయ్ ఇమేజ్ తెచ్చుకోవడం టాలీవుడ్‌లో ఒక శాపమా..?

తెలుగు సినిమా ఇండస్ట్రీలో హీరోలకు ఒక్కో సమయంలో ఒక్కో ఇమేజ్ ఉంటుంది. కొందరు మాస్ హీరోలుగా గుర్తింపు తెచ్చుకుంటే, మరికొందరు క్లాస్ హీరోలుగా ప్రేక్షకుల మనసు గెలుచుకుంటారు. అయితే లవర్ బాయ్ ఇమేజ్‌తో మాత్రం ఎక్కువ కాలం కొనసాగిన హీరోలు చాలా తక్కువ. ప్రేమకథలతో మంచి క్రేజ్ సంపాదించి నప్పటికీ, కొంతకాలం తర్వాత ఆ ఇమేజ్ నుంచి బయటకు రావాల్సిన పరిస్థితి చాలామంది హీరోలకు ఎదురైంది.

ఈ పరిస్థితి ఇప్పటిది కాదు. ఎన్టీఆర్ కాలంలో కూడా కొంతమంది హీరోలు ప్రేమకథలతో ప్రేక్షకులను ఆకట్టుకున్నారు. కొన్ని విజయవంతమైన సినిమాలు చేసిన తర్వాత వారు క్రమంగా ఇండస్ట్రీకి దూరమయ్యారు. ఆ తర్వాత హరీష్, వడ్డే నవీన్ వంటి హీరోలు కూడా లవ్ స్టోరీలతో మంచి గుర్తింపు తెచ్చుకున్నారు. కానీ వారు కూడా ఎక్కువ కాలం అదే క్రేజ్‌ను కొనసాగించ లేకపోయారు.

ఇక తరుణ్, ఉదయ్ కిరణ్ గురించి ప్రత్యేకంగా చెప్పుకోవాలి. వీరిద్దరూ తమ ప్రేమకథలతో అప్పట్లో యువతలో విపరీతమైన క్రేజ్ సంపాదించారు. అందమైన లుక్స్, సహజమైన నటనతో అమ్మాయిల మనసులు గెలుచుకున్నారు. లవర్ బాయ్స్‌గా మంచి గుర్తింపు తెచ్చుకున్నారు. అయితే వీరి కెరీర్లు ఆశించిన స్థాయిలో ఎక్కువ కాలం కొనసాగలేదు. దీంతో టాలీవుడ్‌లో లవర్ బాయ్ ఇమేజ్‌పై ఒక రకమైన సెంటిమెంట్ ఏర్పడింది.

ఇప్పుడు ఈ ప్రభావం కొత్త తరం హీరోలపై కూడా కనిపిస్తోంది. రామ్ మొదట్లో ప్రేమకథలతో యువతకు దగ్గరయ్యాడు. కానీ ఆ తర్వాత మాస్, యాక్షన్ సినిమాల వైపు అడుగులు వేశాడు. నాని, శర్వానంద్, సిద్ధు జొన్నలగడ్డ వంటి హీరోలు కూడా ఒకే తరహా పాత్రలకు పరిమితం కాకుండా కొత్త కథలను ఎంచుకుంటున్నారు.

హీరోలు ఒకే ఇమేజ్‌లో ఉండిపోతే ప్రేక్షకులకు బోర్ కొట్టే అవకాశం ఉంటుంది. అందుకే విభిన్నమైన కథలు, మాస్ పాత్రలు, యాక్షన్ సినిమాలు చేయడానికి ఆసక్తి చూపిస్తున్నారు.

అయితే ప్రేమకథలకు ఆదరణ తగ్గిపోయిందని దీని అర్థం కాదు. మంచి ప్రేమకథ వస్తే ప్రేక్షకులు ఇప్పటికీ ఆదరిస్తారు. కాకపోతే ఒకే ఇమేజ్‌ను నమ్ముకోకుండా ఎప్పటికప్పుడు కొత్తగా కనిపించడం హీరోలకు అవసరంగా మారింది. అందుకే టాలీవుడ్ హీరోలు లవర్ బాయ్ ఇమేజ్‌ను దాటి తమ కెరీర్‌ను ఎక్కువ కాలం కొనసాగించాలని ప్రయత్నిస్తున్నారు.

కానీ అప్పటినుంచి ఇప్పటివరకు కొనసాగుతున్న ట్రెండ్ చూస్తే లవర్ బాయ్ ఇమేజ్ తెచ్చుకుంటే మాత్రం అది ఒక శాపమేమో అన్నట్లు చాలామంది ఫీల్ అవుతున్నారు.