లేడీస్ తో స్పై వ‌ర్కౌట్ అవ్వ‌డం లేదే

స్పై థ్రిల్లర్లకు ఉన్న క్రేజ్ గురించి ప్రత్యేకంగా చెప్పాల్సిన ప‌నిలేదు. మేల్ హీరోలతో వచ్చే స్పై సినిమాలు బాక్సాఫీస్ వద్ద కాసుల వర్షం కురిపిస్తుండటంతో? అదే ఫార్ములాను లేడీ ఓరియెంటెడ్ స్పై సినిమాలకు కూడా వర్తింపజేయాలని దర్శకులు ప్రయత్నిస్తున్నారు. అయితే ఈ ప్రయోగాలు ఆశించిన స్థాయిలో ప్రేక్షకులను మెప్పించలేకపోతున్నాయి. ఏ.ఆర్. మురుగదాస్ `స్పైడర్` వంటి భారీ బడ్జెట్ చిత్రాల్లో మహిళా పాత్రలకు స్పై ఇమేజ్ ఇచ్చి చేసిన ప్రయత్నాలు విఫలం కావడం.. తాజాగా `ఆల్ఫా ` వంటి చిత్రాలకు కూడా అదే గతి పట్టడం పరిశ్రమలో చర్చనీయాంశంగా మారింది.

ఈ వైఫల్యాలకు ప్రధాన కారణం పాత్రల చిత్రీకరణలో ఉన్న లోపమేనని విశ్లేషకులు భావిస్తున్నారు. స్పై సినిమా అంటే? కేవలం గన్‌లు పట్టుకోవడం, విలన్లను వేటాడటం మాత్రమే కాదు. అందులో లోతైన మేధస్సు, క్లిష్టమైన వ్యూహరచన , అత్యున్నత స్థాయి పోరాట నైపుణ్యం ఉండాలి. కానీ దర్శకులు చాలా సందర్భాల్లో నాయికలను యాక్షన్ బొమ్మలుగా చూపించడానికి ప్రయత్నిస్తున్నారు. పాత్ర బావోద్వేగాలను, ప్రయాణాన్ని పట్టించుకోకుండా కేవలం స్టైలిష్ విజువల్స్ మీద ఫోకస్ చేయడం వల్ల ప్రేక్షకులు ఆ పాత్రలతో కనెక్ట్ కాలేకపోతున్నారు.

పితృస్వామ్య ఛాయలు ఇంకా సినిమాల్లో బలంగా ఉండటమే కొన్ని ర‌కాల ఇబ్బందులకు కారణమవుతోంది. మేల్ హీరోలను స్పైలుగా చూపించేటప్పుడు వారి మెదడుకు, శారీరక శ్రమకు ప్రాధాన్యత ఇస్తారు. కానీ హీరోయిన్ల విషయంలో మాత్రం గ్లామర్‌కే ఎక్కువ ప్రాముఖ్యత ఇస్తున్నారు. దుస్తుల ఎంపిక నుంచి వారు చేసే యాక్షన్ సీన్ల వరకు అన్నీ హైపర్-సెక్సువలైజ్డ్ గా ఉండటం వల్ల ఆ సినిమా సీరియ‌స్ స్పై థ్రిల్లర్‌గా కాకుండా కమర్షియల్ హంగుల ప్రదర్శనగా మిగిలిపోతోంది. ఇది పాత్ర గాంభీర్యాన్ని దెబ్బతీస్తోంది.

సాంకేతికంగా కూడా ఈ సినిమాలు వెనుకబడుతున్నాయి. ఒక స్పై సినిమాకు అవసరమైన అంతర్జాతీయ ప్రమాణాలు, స్క్రీన్ ప్లేలోని ఉత్కంఠ , స‌రైన‌ యాక్షన్ సీన్లు లేకపోవడం ప్రధాన లోపం. `ఆల్ఫా` వంటి చిత్రాల్లో కథనం కంటే కాస్ట్యూమ్స్ మీద చూపిన శ్రద్ధ కథలోని లోతును తగ్గించింది. ప్రేక్షకులు ఇప్పుడు ఎంతో పరిణతి చెందారు. అద్భుతమైన యాక్షన్ సన్నివేశాలతో పాటు, కథలో బలమైన లాజిక్‌ను కూడా ఆశిస్తున్నారు. కేవలం హీరోయిన్లతో స్పై సినిమా తీస్తే సరిపోదు. దానిని హుందాతనంతో తెరకెక్కించాలి.

ఇకపై దర్శకులు లేడీ ఓరియెంటెడ్ స్పై సినిమాల గురించి ఆలోచించాలంటే? కథలో కొత్తదనంతో పాటు వాస్త వికతకు పెద్దపీట వేయాలి. హుమా ఖురేషీ వంటి నటీమణులు లేవనెత్తినట్టు పాత్రను గ్లామర్ కోణంలో కాకుండా ఒక నిజమైన ఏజెం ట్‌గా తీర్చిదిద్దినప్పుడే ప్రేక్షకులు ఆదరిస్తారు. ఫిక్షన్ , ఫాంటసీకి అతీతంగా క్షేత్రస్థాయిలో గూఢచారులు పడే కష్టాలను, వారి మానసిక సంఘర్షణను ఆవిష్క రించే కథలు కావాలి. బలమైన స్క్రిప్ట్ ఉంటే తప్ప మరే ఇతర హంగులు స్సై జాన‌ర్ ను కాపాడలేవు.

గూఢచారి సినిమాల్లో స్త్రీ పాత్రలు ఒక ప్రయోగంగా మిగిలిపోకుండా బలమైన కథాంశంతో రావాల్సిన అవసరం ఉంది. భారీ బడ్జెట్‌తో స్పై సినిమాలను తీయడం కంటే పాత్రల స్వభావానికి అనుగుణంగా చిత్రీకరించడం మేలు. ఇప్పటికైనా దర్శకులు పాత పద్ధతులను వదిలి ప్రేక్షకుల నాడిని అర్థం చేసుకుని కొత్త తరం స్పై సినిమాలను రూపొందించాలని ఆశిద్దాం. అప్పుడే లేడీ ఓరియెంటెడ్ స్పై సినిమాలు బాక్సాఫీస్ వద్ద ధీమాగా నిలబడగలవు.