బ‌డ్జెట్ 1 కోటి.. వ‌సూళ్లు 100కోట్లు.. అంతా కృష్ణ మాయ‌!

ఈరోజుల్లో సినిమా ఆడ‌టానికి ప్రామాణిక‌త‌లు ఏమిటి? అంటే.. మొద‌ట‌గా క‌థాబ‌లం గురించి నిపుణులు మాట్లాడుతున్నారు. స్టార్ ప‌వ‌ర్ ని లీడ్ చేసేది క‌థాబ‌లం మాత్ర‌మే. మంచి క‌థ‌, క‌థ‌నం, దానికి త‌గ్గ పాత్ర‌లు కుదిరితే, ఎమోష‌న్స్ పండితే, మంచి సంగీతం జోడిస్తే ఆ సినిమా బాక్సాఫీస్ వ‌ద్ద మాయాజాలం సృష్టిస్తోంది. ఇప్పుడు క‌నీవినీ ఎరుగ‌ని రీతిలో గుజ‌రాతీ సినీప‌రిశ్ర‌మ‌లో ఒక రికార్డు న‌మోద‌వుతోంది. ప‌రిశ్ర‌మ‌ మొద‌టి 100కోట్ల క్ల‌బ్ ని అందుకోబోతోంది. ఏడు వారాల్లో 70 కోట్లు సంపాదించిన ఈ చిత్రం `లాలో: కృష్ణ సదా సహాయతే`.

ఈ గుజరాతీ చిత్రం 10 అక్టోబర్ 2025న విడుదలైంది. ఈ సినిమా విడుద‌లైన త‌ర్వాత కూడా చాలా గుజ‌రాతీ సినిమాలు వ‌చ్చి వెళ్లాయి. కానీ లాలో అన్ స్టాప‌బుల్ గా అద్భుత వ‌సూళ్ల‌తో ముందుకు సాగుతోంది. నిజానికి ఈ సినిమా మొద‌టి వారంలో కేవ‌లం ల‌క్ష‌ల్లో ఆర్జించింది. మూడు నాలుగు వారాల వ‌ర‌కూ ఇదే ప‌రిస్థితి. కానీ నాలుగో వారంలోనే అస‌లు క‌థ మొద‌లైంది. మంచి ప‌బ్లిక్ టాక్ తో ఈ సినిమా నెమ్మ‌దిగా వ‌సూళ్ల‌లో పుంజుకుంది. నెమ్మ‌దిగా వేగం పుంజుకుని గుజరాతీ సినిమా చరిత్ర రికార్డులను బద్దలు కొట్టింది.

గుజరాతీ సినిమా 'లాలో: కృష్ణ సదా సహాయతే' నేడు గుజరాతీ చరిత్రలో అత్యధిక వసూళ్లు సాధించిన చిత్రంగా నిలిచింది. లాలో సినిమా 3 ఫిబ్రవరి 2019న విడుదలైన `చాల్ జీవి లయే` సినిమా సాధించిన 50కోట్ల వ‌సూళ్ల రికార్డును బ్రేక్ చేసింది. లాలో గుజరాతీ బాక్సాఫీస్ వద్ద 52 కోట్ల రికార్డును అధిగ‌మించింది.

గుజరాతీ బాక్సాఫీస్ వద్ద లాలో సినిమా వసూళ్లు వ‌రుస క్ర‌మాన్ని ప‌రిశీలిస్తే.. మొదటి వారంలో - కేవలం 35 లక్షలు మాత్రమే ఆర్జించ‌గా, రెండవ వారంలో - 65 లక్షలు వ‌సూలు చేసింది. మూడవ వారంలో - 1 కోటి కంటే ఎక్కువ సంపాదించింది. నాలుగవ వారంలో - 10 కోట్లు వ‌సూలైంది. ఐదవ వారంలో లాలో సినిమా మరో రికార్డును బద్దలు కొట్టి 40 కోట్లు ఆర్జించింది. కేవ‌లం 7రోజులలో 40కోట్లు. ఇది నిజంగా హిందీ సినిమా వ‌సూళ్ల కంటే ఎక్కువ‌. అంటే సినిమా 3 వారాలలో నెమ్మదిగా కొన‌సాగినా, నాలుగో వారం తర్వాత కృష్ణుడి ఆశీస్సులు పొంది కోట్లు కొల్ల‌గొట్టింద‌ని ట్రేడ్ విశ్లేషిస్తోంది. ఐదు వారాల్లో 52 కోట్లకు పైగా వ‌సూలు చేసింది. లాలో: కృష్ణ సదా సహాయతే గుజరాత్‌లో అత్యధిక వసూళ్లు సాధించిన చిత్రంగా నిలిచింది. ఇప్పుడు ఏడో వారంలో 70కోట్లు వ‌సూలు చేసింద‌ని క‌థ‌నాలొచ్చాయి. ఆ త‌ర్వాత కూడా ఇది అన్ స్టాప‌బుల్ గా ముందుకు సాగుతోంది. ఇది నెమ్మ‌దిగా వ‌సూళ్ల‌ను పెంచుకుంటూ 100 కోట్ల వ‌సూళ్ల దిశ‌గా సాగుతోందని గుజ‌రాతీ మీడియా క‌థ‌నాలు ప్ర‌చురించింది.

'లాలో: కృష్ణ సదా సహాయతే` సినిమాను నిర్మించడానికి నిర్మాతలు చాలా రిస్కులే చేయాల్సి వ‌చ్చింది. కేవ‌లం 1 కోటి బడ్జెట్‌తో నిర్మించిన ఈ గుజరాతీ చిత్రం ఐదు వారాల్లో 50 కోట్ల మార్కును దాటుతుందని చిత్రనిర్మాతలు కలలో కూడా ఊహించలేరు. ప్రభుత్వం లాలో సినిమాను పన్ను మిన‌హాయింపులు ఇవ్వ‌క‌పోయినా, ఇప్పుడు ఈ చిత్రం అద్భుత లాభాల‌ను అందించడానికి కృష్ణుడే స‌హ‌క‌రించాడ‌ని గుజ‌రాతీ మీడియా క‌థ‌నాలు ప్ర‌చురిస్తోంది. .

ఈ చిత్రానికి అంకిత్ స‌ఖియా ద‌ర్శ‌క‌త్వం వ‌హించారు. ఇది హిందీ సహా దేశ‌వ్యాప్తంగా ఈ నెల 28న‌ విడుద‌ల‌కు సిద్ధ‌మ‌వుతోంది. ఒక ఆటో రిక్షా డ్రైవ‌ర్ జీవితంలో వెత‌ల గురించి దిగులుగా ఉంటాడు. అత‌డు ఒక‌సారి ఒంట‌రిగా ఫామ్ హౌస్ లో చిక్కుకుపోయిన క్ర‌మంలో అత‌డికి అక్క‌డ కృష్ణుడి లీల‌లు ఆవిష్కృత‌మ‌వుతాయి. ఆ త‌ర్వాత అత‌డిలో ఎలాంటి మార్పు వ‌చ్చింది? అన్న‌దే ఈ సినిమా క‌థాంశం. దీనిని టెక్నిక‌ల్ గా తెర‌పై ఆవిష్క‌రించిన విధానం ప్ర‌జ‌ల‌కు క‌నెక్ట‌యింది.