K-ర్యాంప్: శనివారం రిలీజ్ వెనుక అసలు కథ
సాధారణంగా సినిమాలను శుక్రవారం విడుదల చేయడం ఇండస్ట్రీలో ఒక ఆనవాయితీ.
By: M Prashanth | 18 Oct 2025 10:10 AM IST
పండగ సీజన్ వచ్చిందంటే బాక్సాఫీస్ వద్ద సందడి మొదలవుతుంది. ఈ దీపావళికి కూడా థియేటర్లలో కొత్త సినిమాల హడావుడి కనిపిస్తోంది. ఇప్పటికే మిత్రమండలి, తెలుసు కదా, డ్యూడ్ సినిమాలు రిలీజ్ అయ్యాయి. ఇక ఈ పోటీలో యంగ్ హీరో కిరణ్ అబ్బవరం తన 'K-ర్యాంప్' చిత్రంతో బరిలోకి దిగుతున్నాడు. అయితే, ఈ సినిమా విడుదల విషయంలో టీమ్ తీసుకున్న ఒక నిర్ణయం హాట్ టాపిక్ గా మారింది.
సాధారణంగా సినిమాలను శుక్రవారం విడుదల చేయడం ఇండస్ట్రీలో ఒక ఆనవాయితీ. వారానికి సరిపడా రన్ ఉండేలా, వీకెండ్ కలెక్షన్లను క్యాష్ చేసుకునేలా మేకర్స్ ప్లాన్ చేసుకుంటారు. ఈ పండగకు వచ్చిన మిగిలిన సినిమాలు కూడా గురు, శుక్రవారాల్లోనే విడుదలయ్యాయి. అలాంటిది, కిరణ్ అబ్బవరం తన 'K-ర్యాంప్' చిత్రాన్ని శనివారం (అక్టోబర్ 18) బరిలోకి దించుతుండటం అందరిలోనూ క్యూరియాసిటీని పెంచుతోంది.
ఈ రిలీజ్ డేట్పై సోషల్ మీడియాలో ఒక అభిమాని కిరణ్ను ప్రశ్నించగా, ఆయన సింపుల్గా, సూటిగా సమాధానమిచ్చారు. "మా సినిమాను శనివారం విడుదల చేయడానికి మా వ్యక్తిగత సెంటిమెంట్ కారణం" అని కిరణ్ బదులిచ్చారు. గతంలో వినరో భాగ్యము విష్ణు కథ సినిమా కూడా శనివారం విడుదలై మంచి విజయాన్ని అందుకుంది.
దీంతో, ఈ నిర్ణయం వెనుక ఉన్న ప్రధాన కారణం సెంటిమెంట్ అని స్పష్టమైంది. అయితే, ఇది కేవలం సెంటిమెంట్ మాత్రమే కాదు, దీని వెనుక ఒక పక్కా కమర్షియల్ వ్యూహం కూడా దాగి ఉంది. ఈ ఏడాది దీపావళి పండుగ సోమవారం వస్తోంది. కాబట్టి, శనివారం సినిమాకు మంచి టాక్ వస్తే, ఆదివారం, సోమవారం (దీపావళి) సెలవులను పూర్తిగా వాడుకోవచ్చు. పాజిటివ్ మౌత్ టాక్తో లాంగ్ వీకెండ్లో మంచి నంబర్లను సాధించవచ్చనేది మేకర్స్ ప్లాన్గా కనిపిస్తోంది.
జైన్స్ నాని దర్శకత్వంలో తెరకెక్కిన ఈ రొమాంటిక్ కామెడీ ఎంటర్టైనర్లో యుక్తి తరేజా హీరోయిన్గా నటించింది. హాస్య మూవీస్, రుద్రాంశ్ సెల్యులాయిడ్ బ్యానర్లపై నిర్మించిన ఈ చిత్రంలో సాయి కుమార్, నరేష్, వెన్నెల కిషోర్ వంటి సీనియర్ నటులు కూడా ఉన్నారు. అయితే, ఈ సెంటిమెంట్, స్ట్రాటజీ వర్కవుట్ అవ్వాలంటే సినిమా కంటెంట్ చాలా కీలకం.
శనివారం రిలీజ్ అంటే, టాక్ స్ప్రెడ్ అవ్వడానికి ఎక్కువ సమయం ఉండదు. ఫస్ట్ షో నుంచే పాజిటివ్ టాక్ వస్తేనే ఈ ప్లాన్ సక్సెస్ అవుతుంది. మొత్తం మీద, కిరణ్ అబ్బవరం, 'K-ర్యాంప్' టీమ్ సెంటిమెంట్ను, పండగ సీజన్ స్ట్రాటజీని కలిపి ఒక లెక్క ప్రకారం అడుగు వేశారు. మరి వారి నమ్మకం, వారి ప్లాన్ ఎంతవరకు ఫలిస్తుందో, ఈ పండగ సీజన్లో కిరణ్ ఎలాంటి విజయాన్ని అందుకుంటాడో తెలియాలంటే ఇంకొన్ని గంటలు ఆగితే తెలిసిపోతుంది.