ప్లాప్స్ లో సీనియ‌ర్లు టాప్ చైర్ కోసం యువ ద‌ర్శ‌కులు!

దశాబ్దాల పాటు కోలీవుడ్ బాక్సాఫీస్‌ను ఏలిన శంకర్, మణిరత్నం, మురుగదాస్ వంటి దిగ్గజ దర్శకుల సినిమాలు ఇటీవల ఆశించిన స్థాయిలో మెప్పించలేకపోవడంతో ఇండస్ట్రీలో నాయకత్వ శూన్యత ఏర్పడింది. ఒకప్పుడు తమ పేర్లతోనే కోట్లాది రూపాయల బిజినెస్ చేసిన సీనియర్ మాస్టర్స్ తడబడుతుండటంతో వారి స్థానంలో ఉన్న టాప్ చైర్ ను సొంతం చేసుకునేందుకు యువ దర్శకులు పోటీపడుతున్నారు. ఇండియన్ సినిమాను వరల్డ్ వేదికపై నిలిపిన శంకర్ విజన్స్, మణిరత్నం క్లాసిక్ స్టోరీ టెల్లింగ్, మురుగదాస్ సోషల్ యాక్షన్ ప్లాట్‌ఫామ్‌లు ఒకప్పుడు తిరుగులేని బెంచ్ మార్క్‌లు.

అయితే మారుతున్న ప్రేక్షకుల అభిరుచికి అనుగుణంగా సరికొత్త కంటెంట్‌ను అందించడంలో ఆధునిక స్క్రీన్‌ప్లే ట్రెండ్స్‌ను అందుకోవడంలో వీరి తాజా ప్రాజెక్ట్‌లు కొంత నిరాశపరిచాయనేది విశ్లేషకుల అభిప్రాయం. దీంతో కోలీవుడ్‌లో నంబర్ వన్ దర్శకుడి సీటు ఖాళీ అయిందనే సంకేతాలు పక్కాగా వెళ్లాయి. ఈ ఖాళీని భర్తీ చేయడానికి కోలీవుడ్ నుంచి ముగ్గురు యువ దర్శకులు ప్రధానంగా రేసులో నిలిచారు. వారే లోకేష్ కనగరాజ్, అట్లీ , నెల్సన్ దిలీప్‌కుమార్. ఈ ముగ్గురు దర్శకులు తమిళనాడుకే పరిమితం కాకుండా మాస్ ఎలివేషన్స్, గ్రిప్పింగ్ స్క్రీన్‌ప్లే, అల్ట్రా-స్టైలిష్ మేకింగ్‌తో పాన్-ఇండియా వ్యాప్తంగా భారీ మార్కెట్‌ను ..క్రేజ్‌ను సొంతం చేసుకున్నారు.

వారు తీసే ప్రతి సినిమాతో బాక్సాఫీస్ వద్ద వందల కోట్ల వసూళ్లను సాధిస్తూ ఇండస్ట్రీని తమవైపు తిప్పు కున్నారు.ఎల్ సీ యు అనే కాన్సెప్ట్‌తో లోకేష్ కనగరాజ్ సృష్టించిన ప్రభంజనం భారతీయ సినిమాలో ఓ కొత్త చరిత్రకు శ్రీకారం చుట్టింది. `విక్రమ్`, `లేఓ` వంటి చిత్రాలతో దక్షిణాది బాక్సాఫీస్‌ను షేక్ చేసిన లోకేష్, మాస్ ప్రేక్షకులను థియేటర్లకు ఎలా ర‌ప్పించాలో? పక్కాగా నిరూపించారు. అలాగే `జైలర్` సినిమాతో సూపర్ స్టార్ రజనీకాంత్‌కు సరికొత్త విజయాన్ని అందించి బాక్సాఫీస్ వ‌ద్ద విధ్వంసం సృష్టించిన నెల్సన్ దిలీప్‌కుమార్ డార్క్ కామెడీ .. పవర్ ఫుల్ యాక్షన్‌ను మిక్స్ చేసి సరికొత్త కల్ట్ ఫాలోయింగ్‌ను ఏర్పరచుకున్నారు.

మరోవైపు దళపతి విజయ్‌తో వరుస హిట్లు కొట్టిన అట్లీ బాలీవుడ్‌లోకి అడుగుపెట్టి షారుఖ్ ఖాన్‌తో `జవాన్` తో 1000 కోట్ల ఇండస్ట్రీ హిట్‌ను అందించి గ్లోబల్ రేంజ్‌కు ఎదిగారు. బౌండరీలు దాటి సినిమాలు తీసే సత్తా తనకు ఉందని అట్లీ నిరూపించడంతో కోలీవుడ్‌లోనే కాకుండా ఇండియన్ సినిమాలోనే డిమాండ్ ఉన్న దర్శకుడిగా మారారు. వీరితో పాటు ప్రశాంత్ నీల్, కార్తీక్ సుబ్బరాజ్ వంటి మరికొందరు యంగ్ మేకర్స్ కూడా ఈ రేసులో ఉనికిని చాటుకుంటున్నారు.

సీనియర్ దర్శకుల ప్లాప్‌లు కోలీవుడ్‌కు ఓ రకంగా పాఠం నేర్పితే యువ దర్శకుల దూకుడు తమిళ సినిమాను సరికొత్త ఎత్తులకు తీసుకెళ్తోంది. అగ్ర‌ హీరోలు కూడా ఇప్పుడు పాత సంప్రదాయ దర్శకుల కంటే యంగ్ జెనరేషన్ మాస్ మేకర్స్‌తో సినిమాలు చేసేందుకే మొగ్గు చూపుతున్నారు. ఫలితంగా కోలీవుడ్‌లో టాప్ చైర్ కోసం జరుగుతున్న సమరం రాబోయే రోజుల్లో ఎలాంటి సంచలనాలకు వేదికవుతుందో చూడాలి.