విజ‌య్ TVK పాలనపై మ్యాడీ, టాప్- 10 త‌మిళ స్టార్ల ప్ర‌శంస‌లు

తమిళనాడు రాజకీయాల్లో సరికొత్త అధ్యాయాన్ని ప్రారంభించి తమిళగ వెట్రి కళగం (TVK) పార్టీ ద్వారా ముఖ్యమంత్రి పీఠాన్ని అధిరోహించిన దళపతి విజయ్ పాలనపై సర్వత్రా ప్రశంసలు కురుస్తున్నాయి. తాజాగా ప్రముఖ నటుడు ఆర్. మాధవన్ (మ్యాడీ) విజయ్ పాలనా తీరును కొనియాడారు. విజయ్ నాయకత్వంలో రాష్ట్రం అభివృద్ధి పథంలో పయనిస్తుందనే ఆశాభావాన్ని వ్యక్తం చేస్తూ.. తమ మధ్య ఉన్న పాత స్నేహాన్ని గుర్తు చేసుకున్నారు. ఇప్పుడు ఆయన్ను సాధారణ స్నేహితుడిలా కాకుండా గౌరవంగా `సీఎం విజయ్` అని పిలవాల్సి వస్తోందని సరదాగా వ్యాఖ్యానించిన మాధవన్, రాజకీయాల్లో ఎంత మంచి చేయడానికి ప్రయత్నించినా ఎక్కడో ఒకచోట విమర్శలు ఎదురవ్వడం సహజమని అభిప్రాయపడ్డారు.

ఈ క్రమంలోనే సినీ రంగానికి చెందిన టాప్ 10 కోలీవుడ్ స్టార్లు కూడా విజయ్ నాయకత్వాన్ని, ప్రజా సంక్షేమ విధానాలను ఏకగ్రీవంగా ప్రశంసించారు. సూర్య, కార్తి, విక్రమ్, విశాల్, శరత్‌కుమార్ వంటి ప్రముఖ కథానాయకులు విజయ్ సాధించిన రాజకీయాధికారాన్ని తమిళ సినీ పరిశ్రమకే గర్వకారణంగా అభివర్ణించారు. అదేవిధంగా నయనతార, త్రిష, సమంత, శివకార్తికేయన్, జయం రవి వంటి అగ్ర నటీనటులు విజయ్ తీసుకుంటున్న నిర్ణయాలు, ప్రజలకు ఇచ్చిన హామీలను నెరవేరుస్తున్న తీరుపై హర్షం వ్యక్తం చేశారు.

మరోవైపు నటుడు మాధవన్ తనపై వచ్చే రాజకీయ విమర్శలు `సంగీ` లేదా `ప్రొపగండా` మద్దతుదారుడనే ఆరోపణలపై స్పందిస్తూ స్పష్టత ఇచ్చారు. తనలోని దేశభక్తి చిన్నతనం నుంచే అలవడిందని.. తాను ఏ ఒక్క నిర్దిష్ట రాజకీయ పార్టీకి కట్టుబడి లేనని స్పష్టం చేశారు. ప్రజలచే ఎన్నుకోబడిన నాయకులు లేదా ముఖ్యమంత్రి, ప్రధానమంత్రులు మంచి పనులు చేసినప్పుడు ఒక పౌరుడిగా వారికి మద్దతు ఇవ్వడం తన బాధ్యత అని నమ్ముతానని.. ఆన్‌లైన్‌లో ఉద్దేశపూర్వకంగా చేసే విమర్శలను తాను పట్టించుకోనని వెల్లడించారు.

తన సినీ ప్రయాణం గురించి మాట్లాడుతూ... నటుడిగా ప్రతి పాత్రకు కట్టుబడి ఉండటమే తన ప్రాథమిక బాధ్యత అని మాధవన్ పేర్కొన్నారు. `రాకెట్రీ` చిత్రంలో నంబి నారాయణన్ భక్తిభావాన్ని నిజాయితీగా చూపించినట్లే.. తన త‌దుప‌రి ప్రాజెక్ట్‌లలో పాత్రల స్వభావాన్ని బట్టి అంతే సహజంగా నటిస్తానని వివరించారు. కథలకు, పాత్రలకు రాజకీయ రంగు పులమాల్సిన అవసరం లేదని... భారతదేశంలోని మంచి విషయాలను ప్రపంచానికి చాటి చెప్పడం ఏమాత్రం నేరం కాదని ఆయన సగర్వంగా ప్రకటించారు.

మాధవన్ నటిస్తున్న తదుపరి చిత్రం GDN (జి.డి. నాయుడు బయోపిక్) ఆగస్టు 7న ప్రేక్షకుల ముందుకు రానుంది. `ఎడిసన్ ఆఫ్ ఇండియా`గా పేరొందిన ప్రముఖ ఆవిష్కర్త గోపాల్‌స్వామి దొరైస్వామి నాయుడు జీవిత ఆధారంగా కృష్ణకుమార్ రామకుమార్ తెరకెక్కించిన ఈ చిత్రంలో సత్యరాజ్, ప్రియమణి, జయరామ్, దుషారా విజయన్, వినయ్ రాయ్, యోగి బాబు వంటి భారీ తారాగణం నటించింది. `ధురంధర్` చిత్రం తర్వాత వస్తున్న ఈ ప్రతిష్టాత్మక బయోపిక్‌పై సినీ ప్రియుల్లో భారీ అంచనాలు నెలకొన్నాయి.