కోలీవుడ్‌లో ఇదో కొత్త స్ట్రాటజీనా?

కోలీవుడ్‌లో సినిమా ప్రమోషన్ విధానం గణనీయంగా మారుతున్న సంకేతాలు కనిపిస్తున్నాయి. ఒకప్పుడు సినిమా మొద‌లైన రోజు నుంచి ప్రతి షెడ్యూల్‌కు సంబంధించిన ఫొటోలు, వీడియోలు, లొకేషన్ అప్‌డేట్లు బయటకు వచ్చేవి. ఇప్పుడు మాత్రం కొంతమంది డైరెక్ట‌ర్లు పూర్తిగా భిన్నమైన వ్యూహాన్ని అనుసరిస్తున్నారు. షూటింగ్ పూర్తయ్యే వరకు ప్రాజెక్ట్‌ను గోప్యంగా ఉంచడం, చివరి దశలో ఫస్ట్ లుక్‌తో ఒక్కసారిగా అనౌన్స్ చేయడమ‌నే ధోరణి పెరుగుతోంది. తాజాగా విజయ్ సేతుపతి- బాలాజీ తారణీతరన్ కాంబినేషన్‌లో వస్తున్న బత్తా చుట్టూ ఏర్పడిన డిస్క‌ష‌న్ ఈ మార్పును స్పష్టంగా చూపిస్తోంది.

ఇండస్ట్రీ వర్గాల అభిప్రాయం ప్రకారం ఈ సైలెంట్ ప్రొడక్షన్ మోడల్‌కు మెయిన్ రీజ‌న్ లీక్ కల్చర్. సోషల్ మీడియా, ఫ్యాన్ పేజీలు, యూట్యూబ్ ఛానెళ్ల వేగం పెరగడంతో సినిమా షూటింగ్‌కు సంబంధించిన సమాచారం నిమిషాల్లో వైరల్ అవుతోంది. దీంతో కథ, పాత్రలు, లుక్స్, కీలక సన్నివేశాలు ముందుగానే బయటకు వచ్చే ప్రమాదం ఉంది. అందుకే కొన్ని టీమ్స్ షూటింగ్‌ను చాలా లిమిటెడ్ ఇన్ఫ‌ర్మేష‌న్ తో నిర్వహిస్తూ, అఫీషియ‌ల్ అనౌన్స్‌మెంట్ వచ్చే వరకు ప్రాజెక్ట్‌ను సీక్రెట్‌గా ఉంచుతున్నాయి.

ఇందులో మరో ఇంట్రెస్టింగ్ అంశం సర్‌ప్రైజ్ మార్కెటింగ్. నెలల తరబడి చిన్నచిన్న అప్‌డేట్లు ఇవ్వడం కంటే, ఒక్క ఫస్ట్ లుక్ పోస్టర్‌తోనే భారీ డిస్క‌ష‌న్‌ను క్రియేట్ చేయ‌డం ఇప్పుడు మరింత ఇంపాక్ట్‌ఫుల్ స్ట్రాట‌జీగా మారుతోంది. ప్రేక్షకులకు కొత్తదనం అనిపించడం, సోషల్ మీడియాలో ఆర్గానిక్‌గా ట్రెండ్ కావడం, మీడియా దృష్టి ఒక్కసారిగా ప్రాజెక్ట్‌పై కేంద్రీకరించడం ఈ మోడల్‌కు ఉన్న ప్రధాన ప్రయోజనాలుగా విశ్లేషకులు భావిస్తున్నారు.

ఈ నేపథ్యంలో డైరెక్ట‌ర్- హీరో కాంబినేషన్లు కూడా బ్రాండ్‌లుగా మారుతున్నాయనే డిస్క‌ష‌న్ బలపడుతోంది. తమిళ సినిమాల్లో మణిరత్నం- కమల్ హాసన్, వెట్రిమారన్- ధనుష్ వంటి కాంబినేషన్లకు ప్రత్యేకమైన గుర్తింపు ఉన్నట్లే, బాలాజీ తారణీతరన్- విజయ్ సేతుపతి జోడీ కూడా అలాంటి నమ్మకాన్ని సంపాదించిందనే అభిప్రాయం వ్యక్తమవుతోంది. వీరిద్దరూ కలిసి చేసిన నడువుల కొంజం పక్కత కానోమ్, సీతాకాథి సినిమాలు కమర్షియల్ స‌క్సెస్‌తో పాటు విమర్శకుల ప్రశంసలు కూడా అందుకున్నాయి. అందుకే ఈ కాంబినేషన్‌లో కొత్త సినిమా వస్తుందనే వార్తే ప్రేక్షకుల్లో ఆసక్తిని పెంచుతోంది.

ఓటీటీ యుగంలో కంటెంట్‌కు ఉన్న వాల్యూ పెరగడం, ప్రమోషన్ ఖర్చులను సమర్థవంతంగా వినియోగించాల్సిన అవసరం, సోషల్ మీడియా ప్రభావం వంటి అంశాలు కలిపి కోలీవుడ్‌లో కొత్త మార్కెటింగ్ సంస్కృతికి దారితీస్తున్నాయి. ముందుగానే ప్రతి విషయాన్ని వెల్లడించే కాలం నుంచి, చివరి వరకు సీక్రెట్ గా ఉంచి ఒక్కసారిగా ప్రేక్షకుల ముందుకు తీసుకువచ్చే వ్యూహం వైపు కోలీవుడ్ ఇండ‌స్ట్రీ వేగంగా అడుగులు వేస్తోందని చెప్పవచ్చు.