ఈ కాంబో క్లిక్ అయితే… కార్తీకి తెలుగు మార్కెట్ గ్యారంటీ!

తమిళ హీరో అయినప్పటికీ తెలుగులో మన లోకల్ స్టార్‌లా కలిసిపోయారు కార్తీ. ఊపిరి సినిమాతో ఇక్కడి వారి మనసులు గెలుచుకున్న ఈ టాలెంటెడ్ యాక్టర్, ఇప్పుడు ఏకంగా బ్యాక్-టు-బ్యాక్ స్ట్రెయిట్ తెలుగు సినిమాలతో బాక్సాఫీస్ పై దండయాత్రకు సిద్ధమయ్యారు. ముఖ్యంగా మాస్ డైరెక్టర్ బోయపాటి శ్రీనుతో సినిమా అంటే అంచనాలు ఆకాశాన్ని తాకుతున్నాయి. కార్తీ కెరీర్‌లోనే ఇదొక బిగ్గెస్ట్ మాస్టర్ స్ట్రోక్ అవుతుందో లేదో ఇప్పుడు టాలీవుడ్‌లో హాట్ టాపిక్. ఆ వివరాలు చూద్దాం..

కార్తీ మార్క్ కంటెంట్.. బోయపాటి మార్క్ మాస్!:

సాధారణంగా కార్తీ సినిమాలు అంటే కథలో ఏదో ఒక వైవిధ్యం ఉంటుంది. కానీ బోయపాటి శ్రీను సినిమా అంటే థియేటర్లలో సౌండ్ బాక్సులు బద్దలైపోవాల్సిందే. ఇక ఈ ఇద్దరి కాంబినేషన్ వినడానికి వింతగా ఉన్నా, సెట్ అయితే మాత్రం బాక్సాఫీస్ దగ్గర వసూళ్ల వర్షం కురవడం గ్యారంటీ. కార్తీలో మనం ఇప్పటివరకు చూడని ఒక ‘ఊర మాస్’ యాంగిల్‌ను బయటకు తీయడానికి బోయపాటి స్కెచ్ వేస్తున్నట్లు సమాచారం.

రిస్క్ తీసుకుంటున్నారా?:

తమిళ హీరోలు సాధారణంగా సెటిల్డ్ పర్ఫార్మెన్స్ ఇష్టపడతారు. కానీ బోయపాటి సినిమాల్లో ఉండే ‘లౌడ్’ మాస్ ఎలిమెంట్స్ కార్తీకి కొత్త. అయితే, ఒకవేళ ఈ సినిమా క్లిక్ అయితే మాత్రం కార్తీకి బి, సి సెంటర్లలో తిరుగులేని ఇమేజ్ వస్తుంది. ఇక తమిళంలో కూడా కార్తీని ఒక కొత్త మాస్ యాంగిల్‌లో చూసే అవకాశం అక్కడి ఆడియన్స్‌కు దక్కుతుంది.

టాలీవుడ్‌కు ‘ బెస్ట్’ హీరో:

ప్రస్తుతం మన పెద్ద హీరోలందరూ పాన్ ఇండియా ప్రాజెక్టులతో బిజీగా ఉండటం వల్ల సినిమాల మధ్య గ్యాప్ ఎక్కువవుతోంది. ఇక ఈ గ్యాప్‌ను భర్తీ చేయడానికి నిర్మాతలు కార్తీని బెస్ట్ ఆప్షన్‌గా భావిస్తున్నారు. ఇక సితార ఎంటర్టైన్మెంట్స్, వాల్ పోస్టర్ సినిమా వంటి పెద్ద బ్యానర్లు ఆయనతో సినిమాలు చేయడానికి ఇదే ప్రధాన కారణం. కార్తీకి తెలుగులో ఉన్న క్రేజ్, ఆయన వేగంగా షూటింగ్ పూర్తి చేసే విధానం నిర్మాతలకు పెద్ద ప్లస్ పాయింట్.

వరుస ప్రాజెక్టులతో బిజీ:

కళ్యాణ్ శంకర్ దర్శకత్వంలో సినిమా ఇప్పటికే మొదలైపోగా, వచ్చే ఏడాది ‘HIT 4’ కోసం శైలేష్ కొలనుతో కార్తీ చేతులు కలపబోతున్నారు.ఇక వీటితో పాటు వివేక్ ఆత్రేయతో కూడా చర్చలు జరుగుతున్నాయి. అంటే, కార్తీ ఇకపై కేవలం డబ్బింగ్ సినిమాలతోనే కాకుండా, పక్కా లోకల్ హీరోగా ఇక్కడ జెండా పాతేయాలని డిసైడ్ అయిపోయారు.

కార్తీ తన నటనతో తెలుగు ప్రేక్షకులను ఎప్పుడో మెప్పించారు, కానీ ఇప్పుడు చేస్తున్న ఈ ప్రయోగాలు ఆయన మార్కెట్‌ను మరో స్థాయికి తీసుకెళ్లేలా ఉన్నాయి. ముఖ్యంగా బోయపాటి సినిమా వర్కవుట్ అయితే, తెలుగు గడ్డపై కార్తీకి మరో పదేళ్ల వరకు తిరుగుండదు. మన తమిళ్ తమ్ముడు కార్తీ టాలీవుడ్ బాక్సాఫీస్ దగ్గర ఎలాంటి వండర్స్ క్రియేట్ చేస్తారో చూడాలి..