పాత్ర కోసం సిగ‌రెట్ కాల్చ‌డం నేర్చుకున్న క‌రిష్మాక‌పూర్!

తొంభైల కాలంలో బాలీవుడ్ వెండితెరను ఊపేసిన క‌రిష్మా క‌పూర్ ఓటీటీ వేదికగా డిజిటల్ ప్రపంచంలోకి `బ్రౌన్` అనే క్రైమ్ డ్రామా సిరీస్‌తో రీలాంచ్ అయిన సంగ‌తి తెలిసిందే . దశాబ్దాల కాలం తర్వాత కెమెరా ముందుకు రావడం క‌రిష్మాపై ఎలాంటి మానసిక ఒత్తిడిని తెచ్చిందో సిరీస్ రచయిత మయూఖ్ ఘోష్ తాజాగా ఓ ఇంటర్వ్యూలో వెల్లడించారు. కరిష్మా కపూర్ వంటి అగ్ర నటి సుదీర్ఘ విరామం తర్వాత పునరాగమనం చేస్తున్నప్పుడు ప్రేక్షకుల నుండి పరిశ్రమ నుండి భారీ అంచనాలు ఉండటం సహజం. ఈ క్రమంలో క‌రిష్మ పాత ఇమేజ్‌ను పక్కనబెట్టి సరికొత్త కోణంలో తనను తాను ఆవిష్కరించుకోవాల్సిన ఒత్తిడిని ఎదుర్కొన్నారు.

గ్లామరస్ పాత్రలకు కేరాఫ్ అడ్రస్‌గా నిలిచిన క‌రిష్మ‌ బ్రౌన్ సిరీస్‌లో కోల్‌కతా నేపథ్యంలో సాగే మధ్య వయస్కురాలైన జీవితంలో ఎన్నో కష్టాలను అనుభవించిన డార్క్ పోలీస్ ఆఫీసర్ రీటా బ్రౌన్ పాత్రను పోషించడం పెద్ద సాహసమనే చెప్పాలి. ఈ విలక్షణమైన పాత్రకు న్యాయం చేయడం కోసం కరిష్మా కపూర్ పడిన కష్టం చూపిన అంకితభావం అసాధారణమైనవని మయూఖ్ ఘోష్ కొనియాడారు. `క‌రిష్మ నిజజీవితంలో పొగతాగే అలవాటు లేక‌పోయినా? కేవలం పాత్రలోని గాఢతను, రీటా బ్రౌన్ మానసిక స్థితిని తెరపై సహజంగా పండించడం కోసం కరిష్మా ప్రత్యేకంగా సిగరెట్ కాల్చడం నేర్చుకున్నారు.

ఒక నటిగా సాంప్రదాయ పరిమితులను దాటి పాత్ర డిమాండ్ చేసిన ప్రతి అంశాన్ని అలవర్చుకోవడానికి క‌రిష్మ‌ వెనుకాడలేదు. అలాగే రీటా బ్రౌన్ పాత్రకు అవసరమైన బాడీ లాంగ్వేజ్, కోల్‌కతా స్థానిక వాతావరణానికి సరిపోయేలా మాట్లాడే శైలిని పట్టుకోవడానికి కూడా కరిష్మా ఎంతో శ్రమించారు. నటనలో సీనియారిటీని పక్కనబెట్టి ఓ విద్యార్థిలా ప్రతి విషయాన్ని నేర్చుకుంటూ సెట్స్‌లో అందరినీ ఆశ్చర్యపరిచారు. ఈ పాత్ర కోసం క‌రిష్మ‌ మేకప్ లేకుండా న‌టించ‌డం మ‌రో విశేషం` అన్నారు. డిజిటల్ విప్లవం తర్వాత ఓటీటీ ప్లాట్‌ఫారమ్‌లు కరిష్మా కపూర్ వంటి సీనియర్ నటీమణులకు రెండవ ఇన్నింగ్స్ ప్రారంభించడానికి అద్భుతమైన అవకాశాలను కల్పిస్తున్నాయి.

కమర్షియల్ సినిమాల ఫార్ములా సూత్రాలకు భిన్నంగా, నటనకు ప్రాధాన్యమున్న ఇలాంటి పాత్రలు పోషించ‌డం తన అదృష్టమని కరిష్మా కూడా పేర్కొన్నారు. కరిష్మా కపూర్ సాధించిన ఈ పరిణామం రాబోయే రోజుల్లో రీఎంట్రీ ఇవ్వాలనుకునే ఎందరో సీనియర్ నటీనటులకు స్ఫూర్తిగా నిలుస్తుంది. గతంలో ఉన్న స్టార్ ఇమేజ్ భారాన్ని మోయకుండా కథను , పాత్రను నమ్మి ముందుకు సాగితే ప్రేక్షకులు ఎప్పుడూ ఆదరిస్తారని క‌రిష్మా క‌పూర్ నిరూపించారు.