కమల్ హాసన్ బర్త్‌డే ట్రీట్.. అదిరిపోయిన సండియర్ ఫస్ట్ లుక్!
కమల్ హాసన్ పుట్టినరోజు సందర్భంగా ఆయన కొత్త సినిమా 'సండియర్' ఫస్ట్ లుక్ పోస్టర్‌ను చిత్రబృందం విడుదల చేసింది. ఎస్.యు. అరుణ్ కుమార్ దర్శకత్వం వహిస్తున్న ఈ చిత్రానికి అనిరుధ్ రవిచందర్ సంగీతం అందిస్తున్నారు. రక్తపు మరకలతో కారులో కనిపిస్తున్న కమల్ లుక్ ఆకట్టుకుంటోంది. గతంలో 'విరుమాండి' సినిమాకు కూడా ఇదే టైటిల్‌ను అనుకున్నప్పటికీ, చివరకు మార్చిన విషయం తెలిసిందే.
By: Priya Chowdhary Nuthalapti | 6 Nov 2026 6:45 PM IST
కోలీవుడ్ స్టార్ హీరో, విశ్వనటుడు కమల్ హాసన్ అభిమానులకు అదిరిపోయే గిఫ్ట్ వచ్చేసింది. నవంబర్ 7న కమల్ హాసన్ పుట్టినరోజు సందర్భంగా ఆయన నటిస్తున్న కొత్త సినిమా ఫస్ట్ లుక్ పోస్టర్‌ను చిత్రబృందం విడుదల చేసింది. ఈ సినిమాకు సండియర్ అనే పవర్‌ఫుల్ టైటిల్‌ను ఖరారు చేశారు. ఈ పోస్టర్ ప్రస్తుతం సోషల్ మీడియాలో అందరి దృష్టిని ఆకర్షిస్తోంది.
ఈ సినిమాకు ఎస్.యు. అరుణ్ కుమార్ దర్శకత్వం వహిస్తున్నారు. సిద్దార్థ్ హీరోగా వచ్చిన చిత్తా, విక్రమ్ నటించిన వీర ధీర సూరన్ వంటి సినిమాలతో అరుణ్ కుమార్ మంచి గుర్తింపు తెచ్చుకున్నారు. ఇప్పుడు ఆయన కమల్ హాసన్‌తో కలిసి సినిమా చేస్తుండటంతో ఈ ప్రాజెక్టుపై భారీ అంచనాలు ఏర్పడ్డాయి.
ఇక విడుదలైన ఫస్ట్ లుక్ చూస్తే సినిమా ఏ స్థాయిలో ఉండబోతుందో అర్థమవుతోంది. కారులో రక్తపు మరకలతో కనిపిస్తున్న కమల్ హాసన్ లుక్ చాలా ఇంటెన్స్‌గా ఉంది. ఆయన ముఖంలో కనిపిస్తున్న సీరియస్ నెస్, పోస్టర్‌లోని డార్క్ లుక్ సినిమాపై ఆసక్తిని పెంచుతున్నాయి. ముఖ్యంగా యాక్షన్, ఎమోషన్స్ కలగలిపిన కథతో ఈ సినిమా ఉండబోతుందనే అంచనాలు మొదలయ్యాయి. ఇక్కడ మరో ఆసక్తికరమైన విషయం కూడా ఉంది. గతంలో కమల్ హాసన్ నటించిన విరుమాండి సినిమాకు మొదట సండియర్ అనే టైటిల్‌నే అనుకున్నారు. అయితే అప్పటి పరిస్థితుల కారణంగా చివరి నిమిషంలో ఆ పేరును విరుమాండిగా మార్చారు. ఇప్పుడు ఇన్నేళ్ల తర్వాత అదే పేరుతో మరో సినిమాతో ప్రేక్షకుల ముందుకు వస్తుండటం విశేషం.
ఈ సినిమాకు అనిరుధ్ రవిచందర్ సంగీతం అందిస్తున్నారు. ప్రముఖ యాక్షన్ కొరియోగ్రాఫర్లు అన్బరివ్ ఈ చిత్రానికి పనిచేస్తున్నారు.