Begin typing your search above and press return to search.

రావిపూడి.. ఎన్టీఆర్‌తో ఏం ప్లాన్ చేస్తున్నవయ్యా..?

‘RRR’ తర్వాత భారీ సినిమాలతో బిజీ అయిన ఎన్టీఆర్, అనిల్ రావిపూడితో పూర్తిస్థాయి కామెడీ ఎంటర్‌టైనర్ చేయనున్నారు. కళ్యాణ్ రామ్ నిర్మిస్తున్న ఈ సినిమా ద్వారా తారక్ కామెడీ టైమింగ్ మరోసారి చూడొచ్చు. అనిల్ రావిపూడి వేగంగా సినిమాలు పూర్తి చేసే దర్శకుడు కావడంతో ఎన్టీఆర్ సినిమాల మధ్య గ్యాప్ తగ్గే అవకాశం ఉందనే అంచనాలు మొదలయ్యాయి. ప్రస్తుతం తారక్ ‘డ్రాగన్’ షూటింగ్‌లో బిజీగా ఉన్నారు.

By:  M Prashanth   |   14 Nov 2026 9:55 PM IST
రావిపూడి.. ఎన్టీఆర్‌తో ఏం ప్లాన్ చేస్తున్నవయ్యా..?
X

ఒకప్పుడు ఎన్టీఆర్ సినిమాల మధ్య పెద్దగా గ్యాప్ ఉండేది కాదు. ఏడాదికి రెండు సినిమాలు వచ్చిన సందర్భాలు కూడా ఉన్నాయి. కానీ 'RRR' నుంచి పరిస్థితి మారిపోయింది. భారీ బడ్జెట్ సినిమాలు, ఎక్కువ రోజుల షూటింగ్, పోస్ట్ ప్రొడక్షన్ కారణంగా ఒక్కో సినిమాకు చాలా సమయం పడుతోంది. అభిమానులు కూడా తారక్ నుంచి మరిన్ని సినిమాలు రావాలని కోరుకుంటున్నారు. ఇలాంటి సమయంలో ఎన్టీఆర్ తీసుకున్న కొత్త నిర్ణయం కాస్త ఆశ్చర్యంగానే ఉంది.





తారక్ తన తదుపరి సినిమాల్లో ఒకదాన్ని అనిల్ రావిపూడితో చేయబోతున్నారు. ఎన్టీఆర్ ఆర్ట్స్ బ్యానర్‌పై కళ్యాణ్ రామ్ నిర్మించనున్న ఈ ప్రాజెక్ట్‌ను అధికారికంగా ప్రకటించారు. అంతేకాదు, ఇది పూర్తిస్థాయి కామెడీ ఎంటర్‌టైనర్ అని కూడా చెప్పేశారు. ఎన్టీఆర్ స్వయంగా ఈ సినిమా నవ్వుల పండుగలా ఉంటుందని ట్వీట్ చేశారు. దీంతో చాలాకాలం తర్వాత తారక్‌ను సరదా పాత్రలో చూసే అవకాశం రాబోతోంది.





అనిల్ రావిపూడి స్పీడ్ గురించి ప్రత్యేకంగా చెప్పనవసరం లేదు. ఏళ్ల తరబడి ఒకే ప్రాజెక్ట్‌పై పనిచేయకుండా కొన్ని నెలల్లోనే సినిమా పూర్తి చేసి విడుదల చేస్తుంటారు. 'సంక్రాంతికి వస్తున్నాం', 'మన శంకర వరప్రసాద్ గారు' సినిమాల విషయంలోనూ ఇదే జరిగింది. ఇప్పుడు ఎన్టీఆర్‌తో కూడా అలాంటి ప్లానింగ్ ఉంటే తారక్ నుంచి తక్కువ గ్యాప్‌లో మరో సినిమా వచ్చే అవకాశం ఉంది.





ముఖ్యంగా ఎన్టీఆర్ కామెడీ టైమింగ్ గురించి చెప్పుకోవాలి. 'అదుర్స్'లో చారి పాత్ర, 'బృందావనం'లో కామెడీ సన్నివేశాలు ఇప్పటికీ అభిమానులకు నచ్చుతాయి. కానీ ఇటీవల 'దేవర', 'RRR' వంటి సినిమాల్లో యాక్షన్, ఎమోషన్స్‌కే ఎక్కువ ప్రాధాన్యం దక్కింది. మరోవైపు ప్రశాంత్ నీల్‌తో చేస్తున్న 'డ్రాగన్' కూడా భారీ యాక్షన్ సినిమానే. దీంతో రావిపూడి సినిమాలో తారక్ కామెడీని ఎంతవరకు ఉపయోగించుకుంటారనేది చూడాలి.

అయితే రావిపూడి సినిమాల్లో కామెడీతో పాటు హీరో ఇమేజ్‌కు తగ్గ మాస్ సీన్లు కూడా ఉంటాయి. బాలకృష్ణతో 'భగవంత్ కేసరి', మహేష్ బాబుతో 'సరిలేరు నీకెవ్వరు', చిరంజీవితో 'మన శంకర వరప్రసాద్ గారు' చేసిన అనుభవం ఉంది. ఇప్పుడు ఎన్టీఆర్‌తో సినిమా కావడంతో కామెడీకి ఎంత ప్రాధాన్యం ఇస్తారు, మాస్ ఎలివేషన్స్ ఎంతవరకు ఉంటాయనేది కూడా ముఖ్యం.

ప్రస్తుతం ఎన్టీఆర్ 'డ్రాగన్' షూటింగ్‌తో బిజీగా ఉన్నారు. త్రివిక్రమ్‌తో పౌరాణిక నేపథ్యంలోని సినిమా కూడా ప్రకటించారు. ఈ రెండు భారీ ప్రాజెక్టుల మధ్య రావిపూడి సినిమా ఎప్పుడు మొదలవుతుందనేది ఇంకా తెలియదు. మరోవైపు అనిల్ రావిపూడి వెంకటేష్, కళ్యాణ్ రామ్‌లతో చేస్తున్న 'జనవరి 12 విడుదల' సంక్రాంతికి రానుంది. ఆ సినిమా పూర్తయ్యాక ఎన్టీఆర్ ప్రాజెక్ట్‌కు సంబంధించిన షూటింగ్ ప్లాన్ బయటకు రావచ్చు.