ర్యాంక్ కాదు.. ప్యాషన్ ముఖ్యం! వైర‌ల‌వుతున్న‌ కల్పిత్ వీర్వాల్ స్టోరీ

జేఈఈ మెయిన్స్‌లో చరిత్ర సృష్టించిన క‌ల్పిత్ వీర్వాల్ ఇప్పుడు సంగీత ప్రపంచంలో తనదైన ప్రయాణాన్ని ప్రారంభించడం విశేషం. 2017 ఏప్రిల్ 2న ప్రకటించిన ఫలితాల్లో 360కి 360 మార్కులు సాధించి ఆల్ ఇండియా ఫ‌స్ట్ ర్యాంక్ దక్కించుకున్న అతను, దేశవ్యాప్తంగా ఒక్కసారిగా సంచలనంగా మారాడు. సాధారణంగా ఇలాంటి విజయం తర్వాత ఐఐటీ, అక్కడి నుంచి కార్పొరేట్ ఉద్యోగం అనే మార్గమే చాలా మంది టాపర్స్ ఎంచుకునే దారి. అయితే కల్పిత్ మాత్రం ఈ సంప్రదాయ మార్గానికి భిన్నంగా ఆలోచించాడు.

ఉద్యోగ అవ‌కాశాల‌కే ప‌రిమిత‌మ‌వ‌లేదు

ఉదయ్‌పూర్‌కు చెందిన ఈ యంగ్ టాలెంట్, తనకు వచ్చిన గుర్తింపును కేవలం ఉద్యోగ అవకాశాలకే పరిమితం చేయకుండా, విభిన్న రంగాల్లో తన ఆసక్తులను అన్వేషించేందుకు ఉపయోగించుకున్నాడు. ఇదే ఆలోచన అతన్ని సాధారణ కెరీర్ ట్రాక్ నుంచి దూరంగా తీసుకెళ్లింది. ఐఐటీ తర్వాత కల్పిత్ చేసిన ప్రయాణం ఒకే దిశలో సాగలేదు. టీచ‌ర్ గా, మెంటర్‌గా.. స్టూడెంట్స్ కు మార్గదర్శనం చేయడం నుంచి ప్రారంభించి, వ్యాపారాలు పెట్ట‌డం, దేశవ్యాప్తంగా ప్రసంగాలు ఇవ్వడం, పెట్టుబడులు పెట్టడం, ప్రపంచాన్ని చుట్టి అనుభవాలను సేకరించడం వరకు అతని ప్రయాణం విస్తరించింది. ఈ విభిన్న అనుభవాలన్నీ అతని వ్యక్తిత్వాన్ని మరింత విస్తరించాయి.

సంగీతంలోకి అడుగుపెట్టిన క‌ల్పిత్

ఇదిలా ఉంటే, తాజాగా అతను సంగీత రంగంలో అడుగుపెట్టడం ప్రత్యేకంగా చర్చనీయాంశమైంది. ఒక అకడమిక్ టాపర్‌గా పేరు తెచ్చుకున్న వ్యక్తి సింగర్- సాంగ్‌రైటర్‌గా మారడం చాలా మందికి ఆశ్చర్యాన్ని కలిగించినా, అతని ఆలోచనా విధానాన్ని చూస్తే ఇది సహజమైన పరిణామంగా కనిపిస్తుంది. ఇటీవల నేను ఇన్వెస్టింగ్‌తో పాటు మ్యూజిక్‌పై ఎక్కువ దృష్టి పెట్టాను. ఈ ఏడాది నా పాటలు మరింత వినిపిస్తాయని క‌ల్పిత్ వెల్ల‌డిస్తూ ఓ నోట్ ను రిలీజ్ చేశాడు. సోషల్ మీడియాలో దానికి విభిన్న రెస్పాన్స్ వ‌స్తోంది. కొందరు అతన్ని సంప్రదాయాలను చెరిపేసిన వ్యక్తిగా ప్రశంసిస్తుండగా, మరికొందరు విద్యార్థులకు ఇది స్ఫూర్తిదాయకంగా ఉందని అభిప్రాయపడుతున్నారు. ముఖ్యంగా, టాపర్ అంటే కార్పొరేట్ ఉద్యోగమే టార్గెట్ అనే భావనను అతను సవాలు చేయడం విశేషం.

విజయం అనేది ఒక నిర్దిష్ట మార్గంలోనే సాధ్యమవుతుందని అనుకోవడం తప్పు అనే సందేశాన్ని క‌ల్పిత్ వీర్వాల్ క‌థ ఇస్తోంది. అత్యున్నత స్థాయిలో విద్యలో రాణించినా, వ్యక్తిగత ఆసక్తులు, సృజనాత్మకతను అనుసరించడం కూడా అంతే ముఖ్యమని అతను నిరూపించాడు. 360/360 సాధించి రికార్డు సృష్టించిన ఈ యువకుడు, ఇప్పుడు సంగీతంతో తన మనసును వ్యక్తపరచడం ద్వారా మరో కొత్త అధ్యాయాన్ని ప్రారంభించాడు. ర్యాంక్ మీ గమ్యాన్ని నిర్ణయించదు. మీ అభిరుచులు, మీ నిర్ణయాలే మీ భవిష్యత్తును నిర్మిస్తాయి అనే స‌త్యాన్ని అత‌ని ప్ర‌యాణం స్ప‌ష్టం చేస్తోంది.