Begin typing your search above and press return to search.

మృత్యువు అంచుల నుంచి కాజల్ అగర్వాల్‌కు తప్పిన ప్రమాదం..!

‘ఇండియన్ 2’ షూటింగ్ సమయంలో జరిగిన భారీ క్రేన్ ప్రమాదం నుంచి తృటిలో ప్రాణాలతో బయటపడ్డానని కాజల్ అగర్వాల్ గుర్తుచేసుకున్నారు. చెన్నైలోని ఈవీపీ ఫిల్మ్ సిటీలో 100 అడుగుల క్రేన్ కూలిన సమయంలో ఎవరో తనను టెంట్ నుంచి బయటకు లాగి కాపాడారని తెలిపారు. వెంటనే తన సిబ్బందిని ఆరా తీసినా, వారెవరూ తనను కాపాడలేదని చెప్పడంతో ఆ వ్యక్తి ఎవరో ఇప్పటికీ తెలియలేదని వెల్లడించారు. ఈ ప్రమాదంలో ముగ్గురు మరణించగా, మరో తొమ్మిది మంది గాయపడ్డారు.

By:  Priya Chowdhary Nuthalapti   |   20 Nov 2026 12:15 PM IST
మృత్యువు అంచుల నుంచి కాజల్ అగర్వాల్‌కు తప్పిన ప్రమాదం..!
X

సినిమా షూటింగ్ సమయంలో జరిగే ప్రమాదాలు నటీనటులతో పాటు చిత్ర బృందాన్ని కూడా తీవ్ర ఆందోళనకు గురిచేస్తుంటాయి. అలాంటి భయంకరమైన అనుభవాన్ని ప్రముఖ హీరోయిన్ కాజల్ అగర్వాల్ తాజాగా గుర్తుచేసుకున్నారు. కమల్ హాసన్ నటించిన ఇండియన్ 2 సినిమా షూటింగ్ సమయంలో జరిగిన భారీ క్రేన్ ప్రమాదం నుంచి తాను తృటిలో ప్రాణాలతో బయటపడ్డానని ఆమె వెల్లడించారు. అంతేకాదు, ప్రమాదం సమయంలో తనను ఎవరో వెనక్కి లాగి కాపాడినట్లు అనిపించిందని చెప్పి అందరినీ ఆశ్చర్యపరిచారు.

చెన్నై సమీపంలోని ఈవీపీ ఫిల్మ్ సిటీలో 'ఇండియన్ 2' చిత్రీకరణ జరుగుతున్న సమయంలో ఈ ఘటన చోటుచేసుకుంది. రాత్రి వేళ కీలకమైన యాక్షన్ సన్నివేశాన్ని చిత్రీకరిస్తుండగా, దాదాపు 100 అడుగుల ఎత్తున్న భారీ క్రేన్ ఒక్కసారిగా కుప్పకూలింది. ఈ ప్రమాదంలో ముగ్గురు ప్రాణాలు కోల్పోగా, మరో తొమ్మిది మంది గాయపడ్డారు. అప్పట్లో ఈ ఘటన సినీ పరిశ్రమలో తీవ్ర విషాదాన్ని నింపింది.

తాజాగా ఓ ఇంటర్వ్యూలో ఈ ప్రమాదం గురించి మాట్లాడిన కాజల్ అగర్వాల్, ఆ క్షణాలను గుర్తుచేసుకుంటూ భావోద్వేగానికి గురయ్యారు. ప్రమాదం జరిగిన సమయంలో తాను మానిటర్ దగ్గర ఇతర చిత్ర బృంద సభ్యులతో కలిసి కూర్చున్నానని తెలిపారు. సినిమాలో తన పాత్ర కోసం అప్పటికే 80 ఏళ్ల వృద్ధురాలిగా కనిపించేలా ప్రత్యేక మేకప్ వేసుకున్నానని చెప్పారు.

అయితే, ఒక్కసారిగా అక్కడున్న వారంతా పరుగులు తీయడం ప్రారంభించారని, అసలు ఏం జరిగిందో తెలియక తాను కూడా వారి వెనుక పరుగెత్తానని కాజల్ వివరించారు. ఆ క్రమంలో ఒక టేబుల్‌ను ఢీకొట్టిన ఆమె, అందరూ ఎందుకు పరుగులు తీస్తున్నారో తెలుసుకోవడానికి వెనక్కి తిరిగి చూశారు. అంతే.. తన వైపు భారీ క్రేన్ కూలిపడుతూ కనిపించిందని వెల్లడించారు.

ఆ దృశ్యాన్ని చూసిన వెంటనే కాజల్ ఒక్కసారిగా భయంతో కదలలేని స్థితికి చేరుకున్నారట. ఏం చేయాలో అర్థం కాని సమయంలో ఎవరో తనను గట్టిగా పట్టుకుని అక్కడి టెంట్ నుంచి బయటకు లాగారని తెలిపారు. మరుక్షణంలోనే భారీ క్రేన్ తన పక్కనే కూలిపోయిందని గుర్తుచేసుకున్నారు. ఆ సమయంలో భయంతో వణికిపోయానని, చుట్టుపక్కల ఎవరూ కనిపించలేదని చెప్పారు.

తనను కాపాడిన వ్యక్తి ఎవరో తెలుసుకోవాలని వెంటనే తన సిబ్బందిని అడిగినప్పటికీ, వారెవరూ తన దగ్గరికి రాలేదని సమాధానం ఇచ్చారట. దీంతో తనను ఆ సమయంలో ఎవరు బయటకు లాగారనే విషయం ఇప్పటికీ అంతుచిక్కని ప్రశ్నగానే మిగిలిపోయిందని కాజల్ తెలిపారు.