ఎన్టీఆర్‌కు మళ్లీ లాంగ్ వెయిట్

ఒకప్పుడు ఎన్టీఆర్ నుంచి ఏడాదికి ఒకటి, కొన్ని సందర్భాల్లో రెండు సినిమాలు కూడా వచ్చేవి. ‘నాన్నకు ప్రేమతో’, ‘జనతా గ్యారేజ్’ ఒకే ఏడాది రావడం, ఆ తర్వాత ‘జై లవకుశ’, ‘అరవింద సమేత’ వరుసగా రావడం చూసిన ఫ్యాన్స్‌కు ఇప్పుడు వెయిటింగ్ పెరిగింది. భారీ సినిమాలు ఎంచుకుంటున్న కొద్దీ ఎన్టీఆర్ ఒక్కో రిలీజ్ మధ్య గ్యాప్ కూడా ఆటోమేటిక్‌గా పెరుగుతోంది.

‘అరవింద సమేత’ 2018 అక్టోబర్‌లో వచ్చింది. ఆ తర్వాత రాజమౌళి ‘RRR’ కోసం ఎన్టీఆర్ చాలా కాలం కేటాయించారు. ఆ సినిమా 2022లో వచ్చినా రామ్ చరణ్‌తో కలిసి చేసిన ప్రాజెక్ట్. సోలో హీరోగా చూస్తే ‘దేవర’ కోసం ఏకంగా ఆరు సంవత్సరాలు వెయిట్ చేయాల్సి వచ్చింది. ఎన్టీఆర్ కూడా అప్పట్లో ఇదే విషయాన్ని చెప్పుకుంటూ రిలీజ్ ముందు నర్వస్‌గా ఉన్నానని అన్నారు.

‘దేవర’ వచ్చిన తర్వాత పరిస్థితి కాస్త మారుతుందని అనిపించింది. 2025లో ‘వార్ 2’తో బాలీవుడ్‌లోకి వెళ్లారు. హృతిక్ రోషన్‌తో కలిసి చేసిన ఆ సినిమా ఎన్టీఆర్ కెరీర్‌కు కొత్త మార్కెట్ ఇచ్చింది. కానీ తెలుగు ఆడియన్స్ పూర్తిగా ఎన్టీఆర్ మీద నడిచే మరో సినిమా కోసం మాత్రం మళ్లీ వెయిట్ చేయాల్సిందే.

ప్రశాంత్ నీల్ దర్శకత్వంలో చేస్తున్న ‘డ్రాగన్’ను 2027 జూన్ 11కు రిలీజ్ చేస్తున్నట్లు మేకర్స్ ఇప్పటికే ప్రకటించారు. అంటే ‘దేవర’ నుంచి దాదాపు రెండు సంవత్సరాల ఎనిమిది నెలల తర్వాత ఎన్టీఆర్ మరో భారీ సోలో సినిమాతో వస్తారు. ఒకప్పుడు ఏడాదికో సినిమా చేసిన హీరోకు ఇప్పుడు ఒక్కో ప్రాజెక్ట్‌కే రెండు, మూడు సంవత్సరాలు పడుతున్నాయి.

దీనికి కారణం కూడా క్లియర్‌గానే కనిపిస్తోంది. ‘RRR’ తర్వాత ఎన్టీఆర్ చేస్తున్న సినిమాల స్కేల్ పూర్తిగా మారిపోయింది. ‘దేవర’ పాన్ ఇండియా రిలీజ్, ‘వార్ 2’ YRF స్పై యూనివర్స్, ఇప్పుడు ప్రశాంత్ నీల్ ‘డ్రాగన్’.. ఒక్కో సినిమా భారీ సెటప్‌తోనే వస్తోంది. షూటింగ్ టైమ్‌తో పాటు వీఎఫ్‌ఎక్స్, పాన్ ఇండియా ప్రమోషన్స్ కూడా ఎక్కువ సమయం తీసుకుంటున్నాయి.

అందుకే ఇప్పుడు ఎన్టీఆర్ కెరీర్‌లో లాంగ్ గ్యాప్ కొత్త విషయం కాదు. అసలు మారిన విషయం ఆయన సినిమాల కౌంట్. ఒకప్పుడు తక్కువ గ్యాప్‌లో వరుసగా సినిమాలు ఇచ్చిన ఎన్టీఆర్ ఇప్పుడు ఒక్కో ప్రాజెక్ట్‌కు ఎక్కువ టైమ్ ఇస్తున్నారు. ‘డ్రాగన్’ తర్వాత కూడా ఇదే ప్యాటర్న్ కొనసాగితే సంవత్సరానికి ఒక సినిమా రావడం కూడా కష్టమే.