బ్రేకప్ రూమర్స్‌కు స్టార్ హీరోయిన్ చెక్..ఆ ఫొటోలు షేర్ చేస్తూ క్లారిటీ!

ఒకరిని ఒకరు అన్ ఫాలో అయితే చాలు.. ఇక వాళ్లకి బ్రేకప్ అనే స్థాయిలో సోషల్ మీడియాలో ప్రజలు కొనసాగుతున్నారు. ఈ క్రమంలో టీవీ నటి జియా శంకర్ తన వ్యక్తిగత జీవితంపై వస్తున్న వార్తలకు ఫుల్ స్టాప్ పెట్టారు. కాబోయే భర్త కరణ్ ధనక్‌తో విడిపోయారంటూ వస్తున్న ప్రచారంలో నిజం లేదని ఆమె తెలియజేశారు. తాజాగా కరణ్‌తో కలిసి ఉన్న కొన్ని ఫొటోలను సోషల్ మీడియాలో షేర్ చేస్తూ తమ బంధం గురించి ఆసక్తికర విషయాలను వెల్లడించారు.

కొన్ని రోజులుగా జియా శంకర్, కరణ్ ధనక్ మధ్య ఏదో సమస్య ఉందంటూ సోషల్ మీడియాలో వార్తలు వచ్చాయి. ముఖ్యంగా జియా తన ఇన్‌స్టాగ్రామ్‌లో కరణ్‌ను అన్‌ఫాలో చేయడంతో ఈ ప్రచారం మరింత పెరిగింది. అంతేకాకుండా ఆమె షేర్ చేసిన కొన్ని పరోక్ష పోస్టులు కూడా అభిమానుల్లో అనుమానాలను పెంచాయి. దీంతో ఈ జంట తమ నిశ్చితార్థాన్ని రద్దు చేసుకున్నారనే వార్తలు వినిపించాయి.

అయితే తాజాగా జియా ఈ వార్తలపై స్పందించారు. కరణ్‌తో కలిసి ఉన్న సంతోషకరమైన క్షణాలను అభిమానులతో పంచుకున్నారు. ప్రేమలో ఉన్నంత మాత్రాన ప్రతిదీ సులభంగా ఉండదని ఆమె తన పోస్టులో పేర్కొన్నారు.

కలిసి జీవించడం అనేది బాలీవుడ్ సినిమాలో చూపించినంత అందంగా ఉండదని జియా అన్నారు. ప్రతి జంట మధ్య ప్రేమతో పాటు చిన్న చిన్న గొడవలు, అభిప్రాయ భేదాలు కూడా ఉంటాయని వివరించారు. తాము కూడా అలాంటి పరిస్థితులను ఎదుర్కొంటున్నామని, ఒకరినొకరు అర్థం చేసుకుంటూ ముందుకు సాగుతున్నామని తెలిపారు.

తాము పరిపూర్ణమైన జంట కాదని, ప్రేమించుకుని ఒకరినొకరు తెలుసుకునే సాధారణ మనుషులమని జియా చెప్పారు. కరణ్ తనకు కాబోయే భర్త మాత్రమే కాకుండా మంచి స్నేహితుడు కూడా అని వెల్లడించారు. జీవితంలో కలిసి ఎదగాలని, తమ బంధాన్ని మరింత బలంగా మార్చుకోవాలని కోరుకుంటున్నట్లు తెలిపారు.

తన వ్యక్తిగత విషయాలను సోషల్ మీడియాలో పంచుకునే విషయంలో ఇకపై జాగ్రత్తగా ఉంటానని జియా పేర్కొన్నారు. తన పోస్టుల ఆధారంగా ఎవరూ అనవసరమైన ఊహాగానాలు చేయకూడదని కోరారు. కరణ్‌తో తన సంబంధం గురించి వస్తున్న వార్తల్లో ఎలాంటి నిజం లేదని స్పష్టం చేశారు.

ఈ ఏడాది ఆగస్టులో జియా కరణ్‌తో తన నిశ్చితార్థాన్ని ప్రకటించారు. తాజా పోస్టుతో జియా శంకర్ తన ప్రేమ బంధంపై వస్తున్న బ్రేకప్ వార్తలకు చెక్ పెట్టినట్లయింది.