బండ్ల గణేష్ కుమార్తె నిశ్చితార్థ వేడుక: సంప్రదాయం- ప్రేమల కలయిక

టాలీవుడ్ ప్రముఖ నిర్మాత బండ్ల గణేష్ ఇంట్లో పెళ్లి బాజాలు మోగనున్నాయి. ఆయన కుమార్తె జనని బండ్ల, సూర్యతేజ చిలుకూరిల నిశ్చితార్థ వేడుక అత్యంత వైభవంగా తెలుగు సంప్రదాయాల నడుమ జరిగింది. కుటుంబ సభ్యులు.. అత్యంత సన్నిహితుల సమక్షంలో జరిగిన ఈ వేడుకలో ఆత్మీయత, అనురాగం ఉట్టిపడ్డాయి. కొత్త జీవితంలోకి అడుగుపెడుతున్న ఈ యువ జంటను చూసి బండ్ల కుటుంబం ఎంతో మురిసిపోయింది.

ఈ వేడుకలో భాగంగా నిర్వహించిన పసుపు కుంకుమ కార్యక్రమం ప్రత్యేక ఆకర్షణగా నిలిచింది. మన తెలుగు సంస్కృతిలో ఏ శుభకార్యానికైనా పసుపు కుంకుమలు అత్యంత పవిత్రమైనవి. ఈ శాస్త్రోక్తమైన విధివిధానాలతో జనని -సూర్యతేజ జంట‌ నూతన ప్రయాణం మంగళకరంగా ప్రారంభమైంది. నిశ్చితార్థ వేడుక అంతటా తెలుగు ఇంటి ఆడపడుచుల సందడి.. పెద్దల ఆశీర్వచనాలు ప్రతిధ్వనించాయి. నిశ్చితార్థ వేడుక‌లో మెగాస్టార్ చిరంజీవి- సురేఖ దంప‌తులు, సుస్మిత కొణిదెల‌, కె.రాఘ‌వేంద్ర‌రావు, బ్ర‌హ్మానందం, కోన వెంక‌ట్, శివాజీ త‌దిత‌రులు అటెండ‌య్యారు. ఈ వేడుక‌కు ఇరు తెలుగు రాష్ట్రాల ముఖ్య‌మంత్రులు నారా చంద్ర‌బాబు నాయుడు, రేవంత్ రెడ్డి కూడా హాజ‌రు కానున్నార‌ని స‌మాచారం.

నిశ్చితార్థం సందర్భంగా జనని బండ్ల సాంప్రదాయ దుస్తుల్లో ఎంతో కళాత్మకంగా కనిపించారు. తన తండ్రి బండ్ల గణేష్ వెన్నంటే ఉండి ఈ వేడుకను జరిపించగా.. తండ్రీకూతుళ్ల మధ్య అనుబంధం అక్కడి వారిని ఆకట్టుకుంది. తండ్రిగా ఆయన ముఖంలో కనిపించిన గర్వం, సంతోషం ఈ వేడుకలోని భావోద్వేగాలను మరింత పెంచాయి. ఈ మధుర క్షణాలు సోషల్ మీడియాలో వైరల్ అవుతూ అభిమానులను అలరిస్తున్నాయి.

బండ్ల గణేష్ టాలీవుడ్‌లో ఎన్నో బ్లాక్‌బస్టర్ చిత్రాలను అందించిన మెగా నిర్మాత‌. వ్యక్తిగత జీవితంలో కుటుంబ విలువలకే పెద్దపీట వేస్తారు. జనని కూడా తన తండ్రి అడుగుజాడల్లో నడుస్తూ.. త‌మ‌ నిర్మాణ సంస్థలో కీలక బాధ్యతలు నిర్వహిస్తున్నారు. తెర వెనుక ఉండి ఎన్నో క్రియేటివ్ ప్రాజెక్టులకు జ‌న‌ని వెన్నుముకగా నిలిచారు. ఇప్పుడు యువ‌నిర్మాత‌ వ్యక్తిగత జీవితంలో ఒక కీల‌క ఘ‌ట్టాన్ని చేరుకోవడంపై ఇండస్ట్రీ వర్గాలు హర్షం వ్యక్తం చేస్తున్నాయి.

ప్రస్తుతం సోషల్ మీడియాలో #జ‌న‌ని సూర్య ప్ర‌యాణం అనే హ్యాష్‌ట్యాగ్ ట్రెండ్ అవుతోంది. సినీ ప్రముఖులు, అభిమానులు ఈ జంటకు పెద్ద ఎత్తున శుభాకాంక్షలు తెలుపుతున్నారు. జనని - సూర్యతేజల భవిష్యత్తు సుఖసంతోషాలతో నిండి ఉండాలని.. కొత్త జంట‌ మరిన్ని విజయాలు అందుకోవాలని అందరూ ఆశీర్వదిస్తున్నారు.