క్యామియోలను దాచిపెట్టిన నెల్సన్.. బాక్సాఫీస్ కోసం కొత్త స్ట్రాటజీ?

జైలర్2 చుట్టూ వినిపిస్తున్న అతిపెద్ద డిస్క‌ష‌న్ క్యామియో పాత్రల గురించే. ఒకటి రెండు కాదు, దాదాపు ఎనిమిది మంది స్టార్లు ప్రత్యేక పాత్రల్లో కనిపించనున్నారనే ప్రచారం సినీ వర్గాల్లో బలంగా వినిపిస్తోంది. అయితే ఈసారి ఆసక్తికరమైన అంశం క్యామియోల నెంబ‌ర్ కాదు, వాటిని నెల్సన్ దిలీప్ కుమార్ ఎలా ఉపయోగిస్తున్నారనేదే. ముఖ్యంగా రిలీజ్ వరకు ఈ క్యామియోల‌ను పూర్తిగా సీక్రెట్‌గా ఉంచే ప్రయత్నం జరుగుతోందన్న సమాచారం ఇండస్ట్రీలో చర్చనీయాంశంగా మారింది.

ఇటీవలి కాలంలో పెద్ద సినిమాల ప్రమోషన్స్‌లో కీలకమైన పాత్రలను ముందుగానే రివీల్ చేయడం సాధారణంగా మారింది. కానీ జైలర్2 విషయంలో మాత్రం దీనికి భిన్నమైన వ్యూహం కనిపిస్తోంది. టీజర్, ట్రైలర్, పోస్టర్లలో ప్రధాన కథను మాత్రమే హైలైట్ చేసి, క్యామియోలను దాచిపెట్టడం ద్వారా ప్రేక్షకుల్లో ఆసక్తిని చివరి వరకు నిలబెట్టాలనేది మేకర్స్ ఆలోచనగా కనిపిస్తోంది. థియేటర్‌లో సర్ప్రైజ్ ఎలిమెంట్‌ను ఎక్స్‌పీరియెన్స్ చేసేలా చేయడం ద్వారా మొద‌టి రోజు నుంచే సోషల్ మీడియాలో భారీ డిస్క‌ష‌న్ మొదలవుతుందనే అంచనాలు ఉన్నాయి.

ఈ స్ట్రాట‌జీ వెనుక మ‌రో కమర్షియల్ యాంగిల్ కూడా కనిపిస్తోంది. తెలుగు, తమిళ, కన్నడ, హిందీ మార్కెట్లలో గుర్తింపు ఉన్న నటులను స్పెష‌ల్ రోల్స్ లో తీసుకోవడం ద్వారా ప్రతి ప్రాంతంలో సినిమాకు ఎక్స్‌ట్రా బజ్ తీసుకురావచ్చనే లెక్కలున్నాయి. అంటే క్యామియో అనేది కేవలం స్టార్ వాల్యూ కోసం కాకుండా, మార్కెట్ రీచ్ పెంచే సాధనంగా కూడా మారుతోంది. ఒక్కో మార్కెట్‌కు ఒక్కో స్టార్ ఉంటే ఆ ప్రాంత ప్రేక్షకుల్లో సినిమా పట్ల సహజంగానే ఆసక్తి పెరిగే అవకాశం ఉంది.

అయితే ఎన్ని క్యామియోలున్నా అసలు పరీక్ష మాత్రం కథ దగ్గరే ఉంటుంది. క్యామియోలు కేవలం ఫ్యాన్స్‌కు విజువల్ ట్రీట్‌గా మిగిలిపోతాయా, లేక కథను మలుపు తిప్పే కీలక పాత్రలుగా నిలుస్తాయా అనేది రిలీజ్ తర్వాతే తేలుతుంది. జైలర్ మొదటి భాగంలో స్పెష‌ల్ క్యారెక్ట‌ర్లు కథలో ఇంపాక్ట్ ను చూపించాయి. జైల‌ర్2 లో కూడా అదే స్థాయిలో వాటికి నేరేటివ్ వాల్యూ ఉంటేనే ఈ స్ట్రాట‌జీ పూర్తిగా సక్సెస్ అయినట్లు భావించాలి. చూస్తుంటే నెల్సన్ దిలీప్ కుమార్ క్యామియోలను కేవలం ప్రచార ఆయుధంగా కాకుండా, ప్రమోషన్స్‌లో సైలెంట్ వెపన్‌గా ఉపయోగిస్తున్నట్లు కనిపిస్తోంది. రిలీజ్ వరకు రహస్యాన్ని కాపాడగలిగితే, జైలర్ 2కు సర్ప్రైజ్ మార్కెటింగ్ అనే కొత్త మోడల్‌ను నెలకొల్పే అవకాశం కూడా లేకపోలేదు.