అనీష్ కోసం నాగ్, తారక్, చరణ్.. కారణమిదే..
'ఇట్లు అర్జున' సినిమాకు నాగార్జున, ఎన్టీఆర్, రామ్ చరణ్ నుంచి లభించిన సపోర్ట్ కలలాగా ఉందని హీరో అనీష్ తెలిపారు. ఈ ప్రోత్సాహంతో తనపై బాధ్యత పెరిగిందన్నారు. తమన్ సంగీతం సినిమాకు ప్రధాన బలమని, అనస్వర రాజన్‌తో నటించడం మంచి అనుభవమని చెప్పారు. నాగార్జున సమర్పణలో ఈ చిత్రం నవంబర్ 13న విడుదల కానుంది.
By: M Prashanth | 12 Nov 2026 9:45 AM IST
ఒక కొత్త హీరో సినిమాకు పెద్ద స్టార్స్ సపోర్ట్ దొరకడం అంత ఈజీ కాదు. కానీ 'ఇట్లు అర్జున' హీరో అనీష్‌కు మాత్రం తొలి సినిమాకే నాగార్జున, ఎన్టీఆర్, రామ్ చరణ్ నుంచి మంచి సపోర్ట్ లభించింది. వీళ్లంతా తన సినిమా కోసం ముందుకు రావడం ఇప్పటికీ కలలాగే అనిపిస్తోందని అనీష్ చెప్పారు. ఈ సపోర్ట్ వల్ల సంతోషంతో పాటు తనపై బాధ్యత కూడా పెరిగిందని ఓ ఇంటర్వ్యూలో తెలిపారు.
ముఖ్యంగా నాగార్జున సినిమా చూసిన తర్వాతే ప్రజెంట్ చేయడానికి అంగీకరించారని అనీష్ చెప్పారు. ఆయనకు కథ, సినిమా చాలా నచ్చాయని తెలిపారు. రామ్ చరణ్, అఖిల్ వంటి హీరోలు కెరీర్‌లో కొంతకాలం తర్వాత ఛాలెంజింగ్ పాత్రలు చేశారని, అనీష్ మాత్రం తొలి సినిమాకే అలాంటి పాత్ర ఎంచుకున్నారని నాగార్జున గతంలో ప్రశంసించారు.
ఇక ఎన్టీఆర్ కూడా 'ఇట్లు అర్జున' ట్రైలర్ విడుదల చేసి చిత్రబృందాన్ని అభినందించారు. సినిమా చూసిన తారక్ చాలా పాజిటివ్‌గా స్పందించారని అనీష్ తెలిపారు. రామ్ చరణ్ కూడా ప్రీరిలీజ్ వేడుకకు హాజరై సపోర్ట్ ఇచ్చారు. తనకు ఎన్టీఆర్, రామ్ చరణ్, అల్లు అర్జున్ సహా చాలామంది హీరోలు ఇన్‌స్పిరేషన్ అని అనీష్ చెప్పారు. అలాంటి స్టార్స్ తన తొలి సినిమాను ప్రోత్సహించడం చాలా ఆనందంగా ఉందన్నారు.
ఈ సినిమాలో తమన్ సంగీతం గురించి కూడా అనీష్ ప్రత్యేకంగా మాట్లాడారు. మూగవాడి ప్రేమకథ కావడంతో మ్యూజిక్ చాలా ముఖ్యమని, అందుకే తమన్‌ను ఈ సినిమాకు మెయిన్ హీరోగా భావిస్తున్నామని చెప్పారు. సినిమా కోసం తమన్ ఎంతో కష్టపడ్డారని, ఈ ప్రయాణంలో తనకు సోదరుడిలా దగ్గరయ్యారని తెలిపారు. ఇప్పటికే పాటలకు మంచి రెస్పాన్స్ వచ్చిందని, బ్యాక్‌గ్రౌండ్ స్కోర్ కూడా ప్రేక్షకులకు నచ్చుతుందని నమ్మకం వ్యక్తం చేశారు.
హీరోయిన్ అనస్వర రాజన్‌తో కలిసి నటించడం మంచి అనుభవమని అనీష్ చెప్పారు. ఆమెకు ఇప్పటికే నటనలో అనుభవం ఉందని, సెట్స్‌లో చాలా ఫ్రెండ్లీగా ఉండేవారని తెలిపారు. బ్రహ్మాజీ, వెన్నెల కిషోర్ కూడా సినిమాలో కీలక పాత్రలు చేశారని వివరించారు. ప్రతి పాత్రకు కథలో ప్రాధాన్యం ఉంటుందని, ప్రేక్షకులు వాటిని ఎంజాయ్ చేస్తారని చెప్పారు.
దర్శకుడు మహేష్ ఉప్పల రూపొందించిన 'ఇట్లు అర్జున'ను వెంకీ కుడుముల తన వాట్ నెక్స్ట్ ఎంటర్‌టైన్‌మెంట్స్ బ్యానర్‌పై నిర్మించారు. నాగార్జున సమర్పణలో నవంబర్ 13న సినిమా విడుదల కానుంది. ఈ వారం పలు సినిమాలు వస్తున్నప్పటికీ తమ సినిమాపై ప్రేక్షకులు ఆసక్తి చూపిస్తున్నారని అనీష్ సంతోషం వ్యక్తం చేశారు. లవ్ స్టోరీ, యాక్షన్‌తో మంచి థియేటర్ ఎక్స్‌పీరియన్స్ ఇస్తామని నమ్మకంగా చెప్పారు.