గెట‌ప్ తో షాకివ్వ‌నున్న మాస్ మ‌హారాజా

మాస్ మహారాజా రవితేజ మరోసారి తన డిఫరెంట్ స్క్రీన్ ప్రెజెన్స్‌తో ప్రేక్షకులను ఆశ్చర్యపరచేందుకు సిద్ధమవుతున్నార‌నే వార్త ఇప్పుడు టాలీవుడ్ వర్గాల్లో హాట్ టాపిక్‌గా మారింది. ఇప్పటికే ఎన్నో సినిమాల్లో విభిన్న గెటప్స్, ప్రత్యేకమైన బాడీ లాంగ్వేజ్‌తో అభిమానులను అలరించిన రవితేజ, ఇప్పుడు ఇరుముడి సినిమాలో పూర్తిగా కొత్త లుక్‌లో కనిపించనున్నట్టు సమాచారం. ముఖ్యంగా ఈ సినిమాలో ఒక కీలకమైన ఎపిసోడ్‌లో ఆయన వృద్ధుడి పాత్రలో కనిపించబోతున్నార‌నే టాక్ ఇండస్ట్రీలో బలంగా వినిపిస్తోంది.

ఈ వార్త బయటకు రావడంతో సోషల్ మీడియాలో రవితేజ అభిమానులు భారీగా స్పందిస్తున్నారు. మాస్ మహారాజా మరోసారి రిస్క్ తీసుకుంటున్నాడు, ఈ గెటప్ సినిమాకే హైలైట్ అవుతుందంటూ కామెంట్లు చేస్తున్నారు. గతంలో విక్రమార్కుడు, రాజా ది గ్రేట్, డిస్కో రాజా, క్రాక్ వంటి సినిమాల్లో తన ఎనర్జీతో పాటూ ప్రత్యేకమైన లుక్స్‌తో ఆకట్టుకున్న రవితేజ, ఇప్పుడు ఇరుముడిలో మరింత కొత్త గెట‌ప్ లో కనిపించనున్నార‌నే ఆసక్తి పెరుగుతోంది.

ఇరుముడి సినిమాను యంగ్ డైరెక్ట‌ర్ శివ నిర్వాణ తెరకెక్కిస్తున్నారు. ఎమోష‌న్స్ ను బలంగా చూపించడంలో ప్రత్యేక గుర్తింపు పొందిన శివ నిర్వాణ, ఈసారి రవితేజ కోసం పూర్తిగా భిన్నమైన కథను సిద్ధం చేసినట్టు తెలుస్తోంది. ఇరుముడి కథలో ఎమోష‌న్స్, యాక్షన్, కుటుంబ సంబంధాల మేళవింపు ఉండబోతుందని సమాచారం. అందులో భాగంగానే రవితేజ వృద్ధుడి గెటప్ సినిమాలో కీలక మలుపు తీసుకురానుందట. ప్రస్తుతం ఈ సినిమా షూటింగ్ చివరి దశకు చేరుకున్నట్టు తెలుస్తోంది. మిగిలిన కొన్ని కీలక సన్నివేశాలు, సాంగ్ షూటింగ్ పూర్తైన తర్వాత పోస్ట్ ప్రొడక్షన్ వ‌ర్క్స్ ను వేగంగా ప్రారంభించేందుకు మేకర్స్ ప్లాన్ చేస్తున్నారని టాక్. ఈ సినిమాను ప్రముఖ నిర్మాణ సంస్థ మైత్రీ మూవీ మేక‌ర్స్ భారీ స్థాయిలో నిర్మిస్తోంది. నిర్మాణ విలువల విషయంలో ఎలాంటి రాజీ పడకుండా సినిమా రూపొందిస్తున్నట్టు ఇండస్ట్రీ వర్గాలు చెబుతున్నాయి.

ఇక హీరోయిన్‌గా ప్రియా భ‌వానీ శంక‌ర్ నటిస్తుండగా, ఆమె పాత్ర కూడా కథలో చాలా ప్రాధాన్యత కలిగినదిగా ఉండబోతుందని సమాచారం. రవితేజ- ప్రియా భవానీ శంకర్ జోడీ స్క్రీన్‌పై ఫ్రెష్ ఫీల్ ఇవ్వబోతుందని అభిమానులు భావిస్తున్నారు. మరోవైపు మ్యూజిక్ డైరెక్ట‌ర్ జీవీ ప్ర‌కాష్ కుమార్ ఈ సినిమాకు సంగీతం అందిస్తున్నారు. ఎఎమోష‌న‌ల్ సీన్స్ కు బలమైన బ్యాక్‌గ్రౌండ్ స్కోర్, మాస్ ఆడియన్స్‌ను ఆకట్టుకునే పాటలు ఈ సినిమాకు ప్రత్యేక ఆకర్షణగా నిలవనున్నాయని తెలుస్తోంది. ప్రస్తుతం మేకర్స్ సినిమా రిలీజ్ డేట్ పై కూడా చర్చలు జరుపుతున్నట్టు సమాచారం. అక్టోబర్‌లో రిలీజ్ చేసే ఆలోచనతో పాటు, అవసరమైతే డిసెంబర్ ఫెస్టివల్ సీజన్‌ను కూడా టార్గెట్ చేసే అవకాశం ఉందని సినీ వర్గాలు చెబుతున్నాయి. మొత్తంగా చూస్తే ఇరుముడితో రవితేజ మరోసారి తనలోని నటుడిని కొత్త కోణంలో చూపించబోతున్నార‌నే సంకేతాలు కనిపిస్తున్నాయి. ముఖ్యంగా వృద్ధుడి గెటప్‌పై వస్తున్న వార్తలు నిజమైతే, ఇది ఆయన కెరీర్‌లో మరో గుర్తుండిపోయే పాత్రగా నిలిచే అవకాశం ఉందని అభిమానులు భావిస్తున్నారు.