వ‌ర్కింగ్ అవ‌ర్స్ పై మెజార్టీ న‌టుల అభిప్రాయం ఏంటి?

ప్రస్తుతం భారతీయ చలనచిత్ర పరిశ్రమలో వర్కింగ్ అవర్స్ అంశం తీవ్ర చర్చనీయాంశంగా మారింది. ఒకప్పుడు పగలు, రాత్రి తేడా లేకుండా షిఫ్టులు చేసే పద్ధతి ఉండేది. కానీ నేడు నటీనటులు తమ పని గంటల విషయంలో స్పష్టంగా కచ్చితంగా ఉంటున్నారు. మెజారిటీ నటులు, ముఖ్యంగా కొత్త తరం తారలు రోజుకు 8 నుండి 10 గంటల పని గంటలను మాత్రమే ప్రాధాన్యతగా భావిస్తున్నారు. అపరిమితమైన పని గంటలు నటనలోని సహజత్వాన్ని , ఆరోగ్యాన్ని దెబ్బతీస్తాయని అభిప్రాయపడుతున్నారు. చాలా మంది అగ్రశ్రేణి నటులు పని వేళల పట్ల ముందే ఒప్పందాలను ఖరారు చేసుకుంటున్నారు.

షూటింగ్ సెట్స్‌లో గంటల తరబడి నిరీక్షణ, చివరి నిమిషంలో మార్పులు ,అనవసరమైన ఆలస్యాల వల్ల సమయం వృధా అవుతుందని ఇది నటుల మానసిక ఒత్తిడికి దారితీస్తుందని వాదిస్తున్నారు. క్రియేటివ్ పని అనేది యంత్రం లా సాగేది కాదని తగినంత విశ్రాంతి ఉంటేనే నటుడు కెమెరా ముందు ఉత్తమమైన ప్రతిభను ప్రదర్శించగలడని మెజారిటీ నటులు నమ్ముతున్నారు. అయితే ఈ విషయంలో నటులకు - నిర్మాతలకు మధ్య తరచుగా విభేదాలు తలెత్తుతోన్న సంగ‌తి తెలిసిందే. భారీ బడ్జెట్ చిత్రాల్లో షెడ్యూల్స్ కీలకం కాబట్టి నిర్మాతలు పనులను త్వరగా ముగించాలని ఆశిస్తారు.

రాత్రి వేళల్లో చేసే షూటింగ్ , క్లైమాక్స్ యాక్షన్ సన్నివేశాల సమయంలో పని గంటలను పెంచాల్సి రావడం సర్వసాధారణం. దీనివల్ల నటులు అలసటకు గురవుతున్నారని సరైన ప్రణాళిక లేని షూటింగ్‌లు వ్యక్తిగత జీవితాన్ని కూడా ప్రభావితం చేస్తున్నాయని అసంతృప్తి వ్యక్తం చేస్తున్నారు. ప్రస్తుతం ఉన్న టెక్నాలజీ, ప్రీ-ప్రొడక్షన్ పనుల వల్ల షూటింగ్ వేళలను పక్కాగా ప్లాన్ చేసుకోవడం సాధ్యమేనని నిపుణులు చెబుతున్నారు. మెజారిటీ నటులు ప్రొడక్టివిటీని కోరుకుంటున్నారు .కానీ ప‌ని గంటల సంఖ్యను పెంచడం వల్ల ప్రయోజనం లేదని భావిస్తున్నారు.

సెట్స్‌లో పనిని వేగవంతం చేయడానికి సాంకేతిక లోపాలను తగ్గించడానికి దర్శక, నిర్మాతలు ముందుగానే స్పష్టమైన ప్రణాళికను సిద్ధం చేసుకుంటే పని గంటల వివాదానికి ముగింపు పలకవచ్చని నటులు సూచిస్తున్నారు.

ఈ విషయంలో నటీమణుల ఆందోళన మరికొంత భిన్నంగా ఉంది. మేకప్, కాస్ట్యూమ్స్, ఇతర సన్నద్ధత కోసం వారు వెచ్చించే సమయం చాలా ఎక్కువగా ఉంటుంది. ఆ సమయాన్ని కూడా పని గంటలుగా పరిగణనలోకి తీసుకోవాలని వారు కోరుతున్నారు. పరిశ్రమలో నటీనటుల సంక్షేమం కోసం క్రమబద్ధీకరించిన వర్కింగ్ అవర్స్ విధానాన్ని తీసుకురావాలని మెజారిటీ సంఘాలు కూడా వాదిస్తున్నాయి. ఇది కేవలం సౌకర్యం కోసం మాత్రమే కాదు. నాణ్యమైన కంటెంట్‌ను ప్రేక్షకులకు అందించడానికి కూడా అవసరమని నమ్ముతున్నారు.

టాలీవుడ్ సహా ఇతర సినీ పరిశ్రమల్లో వర్కింగ్ అవర్స్ అనేది సంక్లిష్టమైన సవాలుగా మారింది. నటుల ఆరోగ్యం, సృజనాత్మకత , నిర్మాతల ఆర్థిక ప్రయోజనాల మధ్య సమతుల్యతను సాధించడం తక్షణ అవసరం. పారద ర్శకమైన పని వేళలు, ముందుగానే సిద్ధం చేసుకున్న ప్రణాళికలు , పరస్పర గౌరవం ఉంటేనే ఒత్తిడి లేని వాతావరణంలో అద్భుతమైన చిత్రాలను తెరకెక్కించే అవకాశం ఉంటుందన్న‌ది వాస్త‌వం.