వ్య‌క్తిత్వం చంపుకుని దురంధ‌ర్- యానిమ‌ల్‌ లాంటివి చేయ‌లేను

బాలీవుడ్ మిస్టర్ పర్ఫెక్ట్ అమీర్ ఖాన్ మేనల్లుడిగా `జానే తూ యా జానే నా` వంటి సెన్సేషనల్ హిట్‌తో కెరీర్ ప్రారంభించిన ఇమ్రాన్ ఖాన్ ప్రయాణం ఆ త‌ర్వాత ఊహించ‌ని మ‌లుపులు తిరిగిన సంగ‌తి తెలిసిందే. న‌ట‌వార‌సుల్లో అత్యంత దుర‌దృష్ట నాయ‌కుడు అత‌డు. ఆరంభంలోనే వరుస విజయాలతో లవర్ బాయ్ ఇమేజ్ సొంతం చేసుకున్న ఈ యువ హీరో ఆ తర్వాత వరుస పరాజయాలతో డీలా ప‌డిపోవ‌డ‌మే గాక‌, వ్యక్తిగత జీవితంలోని ఒడిదుడుకుల వల్ల సుమారు పదేళ్ల పాటు వెండితెరకు దూరమయ్యారు. ముఖ్యంగా వైవాహిక జీవితంలో వచ్చిన కల్లోలం ఆయన కెరీర్‌పై తీవ్ర ప్రభావాన్ని చూపింది. అయితే సుదీర్ఘ విరామం తర్వాత ఇప్పుడు తన ద్వితీయ ఇన్నింగ్స్‌ను ప్రారంభించేందుకు ఇమ్రాన్ సిద్ధమవుతున్నారు.

ప్రస్తుతం తన స్నేహితురాలు లేఖ వాషింగ్టన్‌తో సహజీవనం చేస్తున్నాడ వార్తల్లో నిలుస్తున్న ఇమ్రాన్ ఖాన్, తన సెకండ్ ఇన్నింగ్స్ విషయంలో చాలా స్పష్టమైన అభిప్రాయాలతో ఉన్నారు. ఇటీవల ఒక ఇంటర్వ్యూలో అత‌డు మాట్లాడుతూ.. బాక్సాఫీస్ వద్ద ప్రస్తుతం ట్రెండ్‌లో ఉన్న దురంధర్, యానిమల్ వంటి అతిక్రూరమైన హింసతో కూడిన పాత్రలు తాను చేయలేనని కుండబద్దలు కొట్టారు. తెర నిండా రక్తం ఓడుతూ.. కోపంతో ఊగిపోయే రగ్గడ్ పాత్రలు పోషించడంపై తనకు ఏమాత్రం ఆసక్తి లేదని ఆయన స్పష్టం చేశారు. పరాజయాల నుంచి పాఠాలు నేర్చుకున్న ఇమ్రాన్.. కేవలం ట్రెండ్ కోసం తన వ్యక్తిత్వానికి విరుద్ధమైన సినిమాలు చేయనని చెబుతున్నారు.

సినిమాల్లో హింసను గ్లామరైజ్ చేయడం తనకు నచ్చదని.. సమాజానికి మేలు చేసే లేదా మనుషుల మధ్య ఉన్న సున్నితమైన సంబంధాలను ఆవిష్కరించే కథలకే తాను ప్రాధాన్యత ఇస్తానని ఇమ్రాన్ వివరించారు. ఈ క్రమంలోనే ఆయన సంచలన వ్యాఖ్యలు చేస్తూ.. అవసరమైతే ఎల్‌జిబిటిక్యూ+ కథాంశాలతో కూడిన చిత్రాల్లో నటించడానికి తాను సిద్ధంగా ఉన్నానని తెలిపారు. సమాజంలో అణచివేతకు గురవుతున్న వర్గాల గాథలను తెరపైకి తీసుకురావడం ద్వారా సినిమాకు ఒక అర్థం ఉంటుందని ఆయన నమ్ముతున్నారు. గతంలోని పరాభవాలు ఆయనను మరింత పరిణతి చెందిన నటుడిగా మార్చాయని ఈ మాటలే నిరూపిస్తున్నాయి.

ఇమ్రాన్ ఖాన్ ఆలోచనా దృక్పథంలో వచ్చిన ఈ మార్పు బాలీవుడ్ వర్గాల్లో చర్చనీయాంశంగా మారింది. అందరూ మాస్, యాక్షన్ సినిమాల వెంట పరుగులు తీస్తుంటే.. ఇమ్రాన్ మాత్రం కథలోని లోతును, సామాజిక బాధ్యతను వెతుకుతున్నారు. ముఖ్యంగా తన మేనమామ అమీర్ ఖాన్ లాగే వైవిధ్యమైన, ప్రయోగాత్మకమైన చిత్రాలతో ప్రేక్షకులను పలకరించాలని ఆయన భావిస్తున్నారు. ఈ ద్వితీయ ఇన్నింగ్స్‌లో కమర్షియల్ సక్సెస్ కంటే కూడా ఒక మంచి నటుడిగా.. విలక్షణమైన కథాంశాలను ఎంచుకునే వ్యక్తిగా గుర్తింపు పొందడమే తన లక్ష్యమని ఆయన మాటలను బట్టి అర్థమవుతోంది.

మొత్తానికి, వ్యక్తిగత జీవితంలోని ఇబ్బందులను అధిగమించి, కొత్త ఉత్సాహంతో కెరీర్‌ను పునర్నిర్మించుకునే పనిలో పడ్డారు ఇమ్రాన్ ఖాన్. లేఖ వాషింగ్టన్‌తో ఉన్న బంధం ఆయనకు మానసిక స్థిరత్వాన్ని ఇస్తుండగా, తను ఎంచుకోబోయే కొత్త తరహా కథలు ఆయనను మళ్లీ విజయపథంలో నిలుపుతాయని అభిమానులు ఆశిస్తున్నారు. హింసకు దూరంగా, సున్నితమైన భావోద్వేగాలకు దగ్గరగా సాగనున్న ఇమ్రాన్ ఖాన్ వర్షన్ 2.0 వెండితెరపై ఎలాంటి మ్యాజిక్ చేస్తుందో చూడాలి.