భారతీయ సినిమా ప్రయాణం.. గ్లోబల్ విజయాల వరకూ అద్భుత కథ!

మన భారతదేశ చరిత్ర కేవలం రాజులు, యుద్ధాలకే పరిమితం కాలేదు. సాంకేతికత, కళలు, సాహసాలు మరియు అంతర్జాతీయ వేదికలపై మన దేశం సాధించిన అపూర్వ ఘనతలతో మన చరిత్ర ఎంతో గొప్పగా నిలిచింది. నేటి తరానికి మన దేశ గొప్పదనం, తొలి అడుగుల వెనుక ఉన్న కఠిన శ్రమ తెలిస్తే అది ఎంతో ప్రేరణనిస్తుంది. భారతీయ సినిమా మొదలుకొని గ్లోబల్ విజయాల వరకు మన దేశం సాధించిన కొన్ని చారిత్రక మైలురాళ్ల విశేషాలు మీ కోసం..

భారత చలనచిత్ర పితామహుడు, తొలి టాకీ సినిమా:

అమెరికా వంటి దేశాల నుంచి బైస్కోపులు దిగుమతి అవుతున్న రోజుల్లో, వెండితెరపై మన దేవుళ్లను చూడాలనే కల కన్నారు ధుండిరాజ్ గోవింద్ ఫాల్కే. ఎన్నో ప్రయోగాలు చేసి భారతీయ చలనచిత్ర రంగానికి ఆద్యుడై దాదాసాహెబ్ ఫాల్కేగా చరిత్రలో నిలిచారు. ఆయన చూపిన బాటలో నడిచి, 1931 మార్చి 14న దేశంలోనే మొట్టమొదటి టాకింగ్ మూవీగా 'ఆలం ఆరా' తెరకెక్కించారు. ఇక మాస్టర్ విఠల్, జుబేదా నటించిన ఈ చిత్రం భారతీయ సినిమా చరిత్రలో ఒక సువర్ణాధ్యాయం.

మొట్టమొదటి మహిళా ఉపాధ్యాయురాలు, పాలకురాలు :

చదువే ఆయుధంగా మార్చుకుని సమాజంలో మార్పు తెచ్చిన మహోన్నత వ్యక్తి సావిత్రిబాయి ఫూలే. తన భర్త జ్యోతిరావు ఫూలేతో కలిసి 1848లో పూణేలో బాలికల కోసం తొలి పాఠశాలను ప్రారంభించి భారతదేశపు తొలి మహిళా ఉపాధ్యాయురాలిగా సేవలందించారు. ఇక రాజకీయ చరిత్రలోనూ మన మహిళల సత్తా చాటుతూ.. 1236 నుంచి 1240 వరకు ఢిల్లీ సుల్తానేట్‌ను పరిపాలించిన తొలి ముస్లిం మహిళా పాలకురాలుగా రాజియా సుల్తాన్ నిలిచారు.

అంతరిక్షం నుంచి విశ్వ సుందరి కిరీటాల వరకు:

అమెరికా అంతరిక్ష సంస్థ నాసాకు చెందిన 'కొలంబియా స్పేస్ షటిల్' ద్వారా 1997లో అంతరిక్షంలోకి అడుగుపెట్టి తొలి భారతీయ సంతతి మహిళగా కల్పనా చావ్లా చరిత్ర సృష్టించారు. అలాగే ప్రపంచ వేదికలపై మన వనితలు తమ అందంతో పాటు ప్రతిభను చాటారు. కేవలం 18 ఏళ్ల వయసులో సుష్మితా సేన్ మొట్టమొదటి 'మిస్ యూనివర్స్' కిరీటాన్ని గెలుచుకోగా, 1966లో రీటా ఫారియా మొదటి 'మిస్ వరల్డ్' టైటిల్ సాధించి ఆసియాలోనే ఆ ఖ్యాతి పొందిన తొలి మహిళగా నిలిచారు.

తొలి ఆధార్ కార్డు నుంచి అండర్‌గ్రౌండ్ మెట్రో వరకు :

ప్రపంచంలోనే అతిపెద్ద డిజిటల్ గుర్తింపు అయిన మన దేశ ఆధార్ కార్డును మొదటగా మహారాష్ట్రలోని టెంబ్లీ గ్రామానికి చెందిన రంజనా సోనావానే అందుకున్నారు. ఇక రవాణా రంగంలో విప్లవం సృష్టిస్తూ భారతదేశంలోనే మొదటిసారిగా కోల్‌కతాలో అండర్‌గ్రౌండ్ మెట్రో రైలు సర్వీస్ ప్రారంభమై దక్షిణ ఆసియాలోనే రికార్డ్ సృష్టించింది. ఇక ఇలా ప్రతి రంగంలోనూ మన దేశం ఎన్నో అడుగులు ముందుకు వేసింది.

ఇక ఇలాంటి గొప్ప చరిత్ర, ఎంతోమంది సాహసులు వేసిన అడుగులే నేడు మనల్ని ఈ స్థానంలో నిలబెట్టాయి. ఇక మన దేశం సాధించిన ఈ చారిత్రక విజయాలను తెలుసుకుంటూ, యువత తాము కూడా నూతన సంచలనాలు సృష్టించేందుకు ఈ ప్రయాణాన్ని ఒక గొప్ప స్ఫూర్తిగా తీసుకోవాలి.