మాతృత్వం పై ప్రేమ.. విమర్శలు ఎదుర్కొంటున్న హీరోయిన్స్!

సినిమా రంగంలో గ్లామర్ వెనుక ఎన్నో కష్టాలు ఉంటాయి. ముఖ్యంగా మాతృత్వాన్ని పొందిన హీరోయిన్లకు తమ వృత్తిపరమైన బాధ్యతలు, వ్యక్తిగత జీవితం మధ్య సమతుల్యత సాధించడం సవాలుగా మారుతోంది. దీపికా పదుకొనే, రాధికా ఆప్టే వంటి నటీమణులు తమ పిల్లల కోసం పని గంటలను తగ్గించుకోవాలని చేసిన వ్యాఖ్యలు ప్రస్తుతం సోషల్ మీడియాలో చర్చనీయాంశమయ్యాయి. తల్లిగా తమ బాధ్యతను నెరవేర్చాలనే తపన ఒకవైపు, నెటిజన్ల విమర్శలు మరోవైపు వీరిని వార్తల్లో నిలుపుతున్నాయి.

పని గంటలపై గళం విప్పిన హీరోయిన్స్ :

ఇటీవలే తల్లయిన దీపికా పదుకొనే, రాధికా ఆప్టే వంటి స్టార్లు షూటింగ్ సెట్స్‌లో సుదీర్ఘ పని గంటల గురించి చేసిన వ్యాఖ్యలు పెద్ద దుమారాన్నే రేపాయి. తమ బిడ్డతో గడపడానికి సమయం కావాలని, పని ఒత్తిడి తగ్గించాలని వారు కోరడంపై నెటిజన్లు భిన్నంగా స్పందిస్తున్నారు. దీని కోసం వారు బిగ్ ప్రాజెక్ట్స్ ను సైతం పక్కన పెట్టారు. ఐతే కోట్లు తీసుకునేటప్పుడు లేని ఇబ్బంది, పని చేసేటప్పుడు ఎందుకు? అంటూ కొందరు విమర్శిస్తుంటే, మరికొందరు మాత్రం వారి మాతృత్వపు ప్రేమను సమర్థిస్తున్నారు. పని ప్రదేశాల్లో తల్లులకు అనువైన వాతావరణం ఉండాలని వారు కోరుకోవడం సమంజసమే అయినప్పటికీ, సినిమా నిర్మాణ వ్యయం పెరిగిపోతున్న తరుణంలో ఈ డిమాండ్లు మేకర్స్‌కు తలనొప్పిగా మారుతున్నాయి అన్నది మరో వాదన.

ఈ జాబితాలో ప్రముఖంగా వినిపించే మరో పేరు అనుష్క శర్మ. విరాట్ కోహ్లీ సతీమణిగా, స్టార్ హీరోయిన్‌గా గుర్తింపు పొందిన అనుష్క, తన పిల్లల (వామిక, అకాయ్) కోసం సినిమాలకు దాదాపు దూరంగా ఉంటోంది. ఆమె కూడా గతంలో షూటింగ్ షెడ్యూల్స్ విషయంలో కఠినమైన నిబంధనలు పాటించడంతో విమర్శలు ఎదుర్కొంది. తన బిడ్డకు ఇచ్చే సమయం కంటే కెరీర్ ముఖ్యం కాదని ఆమె స్పష్టం చేసింది. దీపికా, రాధికా ఆప్టే కూడా ఇప్పుడు అదే బాటలో నడుస్తూ, పని కంటే మాతృత్వానికే పెద్ద పీట వేస్తున్నారు. ఇలా హీరోయిన్లు తమ పని వేళల విషయంలో రాజీ పడకపోవడం వల్ల పరిశ్రమలో కొత్త చర్చలకు దారితీస్తోంది.

నటీమణులు అయినా, సామాన్య మహిళలైనా మాతృత్వంలోని మాధుర్యాన్ని ఆస్వాదించాలని అనుకోవడం సహజం. అయితే, ప్రొఫెషనల్ రంగంలో ఉన్నప్పుడు బాధ్యతలను కూడా విస్మరించకూడదనేది విమర్శకుల వాదన. దీపికా, రాధికా ఆప్టే మరియు అనుష్క శర్మ వంటి వారు తమ సెలబ్రిటీ హోదాను ఉపయోగించి పని ప్రదేశాల్లో మార్పు కోరుతున్నారు. ఈ వివాదాలు ఎలా ఉన్నా, ఒక తల్లిగా వారు తమ పిల్లల కోసం పడే తపనను తక్కువ చేసి చూడలేం. రాబోయే రోజుల్లో సినీ పరిశ్రమ మాతృత్వానికి ఇచ్చే గౌరవం, పని గంటల మధ్య ఎలాంటి సమతుల్యతను సాధిస్తుందో వేచి చూడాలి అంటున్నారు సినీ విశ్లేషకులు.