బడ్జెట్ తగ్గించడానికి నిర్మాతల బెస్ట్ రూట్
సెట్స్, లొకేషన్స్, వీఎఫ్ఎక్స్, ఇతర నటీనటులు, ప్రమోషన్స్ కోసం మరో పెద్ద మొత్తం కావాలి. అందుకే ఇప్పుడు కొందరు నిర్మాతలు హీరో పేమెంట్ విషయంలో పాత ఫార్ములా నుంచి బయటకు వస్తున్నారు.
By: M Prashanth | 2 Sept 2026 9:00 PM IST
పెద్ద హీరో సినిమా మొదలుపెట్టే సమయంలో నిర్మాతకు మొదటి భారమే రెమ్యునరేషన్. హీరోకు భారీ మొత్తం ముందే కమిట్ చేస్తే షూటింగ్ మొదలయ్యేలోపే బడ్జెట్లో పెద్ద భాగం లాక్ అవుతుంది. సెట్స్, లొకేషన్స్, వీఎఫ్ఎక్స్, ఇతర నటీనటులు, ప్రమోషన్స్ కోసం మరో పెద్ద మొత్తం కావాలి. అందుకే ఇప్పుడు కొందరు నిర్మాతలు హీరో పేమెంట్ విషయంలో పాత ఫార్ములా నుంచి బయటకు వస్తున్నారు.
మొత్తం రెమ్యునరేషన్ ఒకేసారి ఇవ్వకుండా మినిమమ్ పేమెంట్తో సినిమా మొదలుపెట్టి, తర్వాత లాభాల్లో వాటా ఇవ్వడం ఒక పద్ధతి. ఇంకొన్ని సందర్భాల్లో నైజాం, సీడెడ్, ఓవర్సీస్ లాంటి ఏరియా హక్కుల్లో ఒకటి హీరోకు ఇవ్వొచ్చు. దీంతో షూటింగ్ సమయంలో నిర్మాత చేతిలో ఎక్కువ క్యాష్ ఉంటుంది. సినిమా పూర్తయ్యే వరకు అవసరమైన ఖర్చులను మేనేజ్ చేయడం కూడా కొంత సులభమవుతుంది.
రవితేజ ‘ఇరుముడి’ విషయంలో ఇలాంటి డీల్ జరిగినట్టు ఇండస్ట్రీలో టాక్ వచ్చింది. రెగ్యులర్ రెమ్యునరేషన్ కంటే తక్కువ తీసుకుని నైజాం హక్కులు తన దగ్గర ఉంచుకున్నాడని వార్తలు వచ్చాయి. సినిమా బాగా ఆడటంతో ఆ ఏరియా నుంచి వచ్చే ఆదాయం అతనికి మంచి లెక్కగా మారే అవకాశం ఉంది. అంటే ఫిక్స్డ్ జీతం బదులు సినిమా ఫలితంతో తన సంపాదనను లింక్ చేసుకున్నట్టు.
ఇలాంటి మార్పులు రావడానికి బిజినెస్ పరిస్థితులు కూడా ఒక కారణం. కొన్ని సంవత్సరాల క్రితం పెద్ద సినిమాలకు ఓటీటీ, శాటిలైట్, హిందీ హక్కుల నుంచి ముందుగానే భారీ డీల్స్ వచ్చేవి. ఇప్పుడు ప్రతి సినిమాకు అదే స్థాయిలో డబ్బు రావడం లేదు. సినిమా రిలీజ్కు ముందే మొత్తం బడ్జెట్ రికవర్ అవుతుందనే నమ్మకం తగ్గినప్పుడు నిర్మాత మొదట్లోనే ఖర్చును కంట్రోల్ చేయాలని చూస్తాడు.
అయితే సినిమా పెద్ద హిట్ అయితే హీరోకు ఇచ్చిన షేర్ కూడా పెరుగుతుంది. ఏరియా హక్కులు ముందే ఇచ్చేస్తే అక్కడ వచ్చిన అదనపు లాభం నిర్మాతకు పూర్తిగా రాదు. కానీ సినిమా తేడా కొడితే మాత్రం నిర్మాత మొదట్లో పెట్టాల్సిన భారీ రెమ్యునరేషన్ భారాన్ని తప్పించుకున్నట్టే. అందుకే ఈ డీల్లో లాభం, రిస్క్ ఇద్దరికీ ఉంటాయి.
ఇలాంటి పద్ధతి వల్ల కొన్ని సినిమాలు పెద్దగా రిస్క్ లేకుండా ముందుకు వెళ్లే ఛాన్స్ ఉంటుంది. హీరో రెమ్యునరేషన్ కోసం రూ.20 లేదా రూ.30 కోట్లు ముందే సిద్ధం చేయాల్సిన పరిస్థితి లేకపోతే, నిర్మాత ఆ డబ్బును షూటింగ్కు ఉపయోగించవచ్చు. ముఖ్యంగా మిడ్ రేంజ్ బడ్జెట్ సినిమాల్లో ఈ ఫార్ములా వర్కవుట్ అయితే, రాబోయే రోజుల్లో మరికొందరు హీరోలు కూడా ఇలాంటి డీల్స్ వైపు వెళ్లే అవకాశం ఉంది.