ఇద్దరు స్టార్లు ఉన్నా.. మినిమం ఓపెనింగ్స్ లేవు

అక్షయ్ కుమార్, సైఫ్ అలీఖాన్ కలిసి నటించిన హైవాన్ బాక్సాఫీస్ దగ్గర గట్టిగానే తడబడుతోంది. సినిమా బడ్జెట్ దాదాపు రూ.125 కోట్లని ట్రేడ్ వర్గాలు చెబుతున్నాయి. కానీ నాలుగు రోజులు పూర్తయ్యేసరికి ఇండియా గ్రాస్ రూ.9.11 కోట్ల దగ్గరే ఉంది. మొదటి రోజు రూ.3 కోట్లకు పైగా వచ్చినా, శని ఆదివారాల్లో పెరగాల్సిన వసూళ్లు తగ్గిపోయాయి. సోమవారం అయితే కోటి రూపాయలు కూడా రాలేదు.

పెద్ద సినిమాకు మొదటి రోజు తక్కువ వచ్చినా వీకెండ్‌లో పికప్ అయ్యే అవకాశం ఉంటుంది. హైవాన్‌కు అది కూడా జరగలేదు. శనివారం, ఆదివారం రెండు రోజులూ ముందు రోజు కంటే వసూళ్లు తగ్గాయి. సోమవారం ఆక్యుపెన్సీ కూడా ఏడు శాతం లోపే నమోదైంది. రూ.125 కోట్ల వరకు ఖర్చు చేసిన సినిమాకు మొదటి నాలుగు రోజుల్లోనే ఇలాంటి పరిస్థితి రావడం బయ్యర్లను ఇబ్బందిలో పడేసేదే.

అక్షయ్ కుమార్‌కు ఒకప్పుడు సినిమా ఎలా ఉన్నా మొదటి రోజు ఓపెనింగ్ వచ్చేది. గత కొన్నేళ్లుగా మాత్రం ఆ పరిస్థితి లేదు. ఒక సినిమా మంచి నంబర్లు తెస్తే, వెంటనే మరో సినిమా చాలా తక్కువ ఓపెనింగ్‌తో మొదలవుతోంది. సైఫ్ అలీఖాన్ కూడా ఉండటంతో హైవాన్‌కు కనీసం వీకెండ్ వరకు ప్రేక్షకులు వస్తారని అనుకున్నారు. కానీ ఇద్దరి పేర్లు కూడా ఈసారి బాక్సాఫీస్ ను కదిలించలేకపోయాయి.

ఈమధ్య స్టార్స్ ఉన్నా కూడా ప్రేక్షకులు పెద్ద హీరో సినిమా అని వెంటనే థియేటర్‌కు వెళ్లడం లేదు. ట్రైలర్ నచ్చాలి, పాటలు లేదా కథ మీద ఆసక్తి రావాలి. మొదటి రోజు టాక్ తేడాగా ఉంటే రెండో రోజు నుంచే ప్రభావం కనిపిస్తోంది. హైవాన్‌కు కూడా రిలీజ్ ముందు పెద్దగా హైప్ రాకపోవడం, వచ్చిన తర్వాత టాక్ బలంగా లేకపోవడంతో ఎఫెక్ట్ వసూళ్ల మీద పడింది.

బడ్జెట్ ఎక్కువగా ఉన్న సినిమాలకు ఇలాంటి ఓపెనింగ్ మరింత ఇబ్బంది. చిన్న సినిమా రూ.10 కోట్లు చేసినా పెట్టుబడిలో పెద్ద భాగం వెనక్కి రావచ్చు. హైవాన్ మాత్రం థియేటర్ల నుంచే ఇంకా చాలా దూరం వెళ్లాలి. మొదటి నాలుగు రోజుల్లోనే షోలు తగ్గడం కూడా తర్వాతి వారం రన్‌పై ప్రభావం చూపించే అవకాశం ఉంది. ఇంకా సినిమా థియేటర్లలో ఉంది కాబట్టి ఫుల్ రన్ ఎంత దగ్గర ఆగుతుందో చూడాలి. కానీ మొదటి వీకెండ్ పూర్తయ్యాక కూడా రూ.10 కోట్ల ఇండియా గ్రాస్ అందుకోలేకపోవడం మాత్రం హైవాన్‌కు పెద్ద దెబ్బ. మిగతా రోజుల్లో ఎంతో కొంత నిలబడితేనే నష్టాలు తగ్గుతాయి.