70వ ఫిలింఫేర్ అవార్డ్స్: సందడి చేసిన సినీ తారలు!

దక్షిణాది సినీ ఇండస్ట్రీలో అత్యంత ప్రతిష్టాత్మకమైన 70వ ఫిల్మ్‌ఫేర్‌ అవార్డుల వేడుక శనివారం రాత్రి కేరళలోని కొచ్చిలో అట్టహాసంగా జరిగింది. తారల మెరుపులు, అవార్డుల పంటతో ఈ వేడుక కనులవిందుగా సాగింది. ముఖ్యంగా టాలీవుడ్ నుంచి 'పుష్ప 2' సినిమా అవార్డుల వేటలో టాప్ గేర్‌లో నిలిచింది. ఐకాన్ స్టార్ అల్లు అర్జున్ తన నటనతో మరోసారి బ్లాక్ బస్టర్ హిట్ సాధించడమే కాదు, ఉత్తమ నటుడిగా అవార్డును కూడా గెలుచుకుని తన సత్తా చాటారు.

'పుష్ప 2' క్లీన్ స్వీప్.. బన్నీ ఖాతాలో మరో రికార్డు:

ఈ అవార్డుల వేడుకలో అందరి కళ్లు 'పుష్ప 2: ది రూల్' సినిమాపైనే ఉన్నాయి. ఊహించినట్టుగానే ఈ చిత్రం అవార్డుల పంట పండించింది. పుష్పరాజ్‌గా మాస్ పర్ఫార్మెన్స్ ఇచ్చిన అల్లు అర్జున్‌ను 'ఉత్తమ నటుడు' అవార్డు వరించింది. ఇక దీంతో మొత్తం 7 ఫిల్మ్‌ఫేర్ అవార్డులు అందుకున్న టాలీవుడ్ హీరోగా బన్నీ సరికొత్త రికార్డు సృష్టించారు. అంతేకాకుండా, ఈ చిత్రానికి దర్శకత్వం వహించిన సుకుమార్ 'ఉత్తమ దర్శకుడు'గా, దేవిశ్రీ ప్రసాద్ 'బెస్ట్ మ్యూజిక్ ఆల్బమ్' విజేతలుగా నిలిచారు. ఉత్తమ చిత్రంగా కూడా 'పుష్ప 2' నిలవడం విశేషం.

హీరోయిన్స్ హవా.. నివేదా, కాజల్ జోరు:

ఇక నటీమణుల విభాగంలో ఈసారి గట్టి పోటీ నెలకొంది. '35: చిన్నకథ కాదు' చిత్రంలో అద్భుతమైన నటన కనబరిచిన నివేదా థామస్‌కు 'ఉత్తమ నటి' అవార్డు దక్కింది. ఇక క్రిటిక్స్ విభాగంలో 'సత్యభామ' సినిమాకు గాను కాజల్ అగర్వాల్ ఉత్తమ నటిగా నిలిచారు. ఇక సహాయ నటి విభాగంలో 'గ్యాంగ్స్ ఆఫ్ గోదావరి'లో నటించిన అంజలిని అవార్డు వరించింది. కొత్త టాలెంట్‌ను కూడా ఫిల్మ్‌ఫేర్ ప్రోత్సహించింది. 'కమిటీ కుర్రోళ్లు' సినిమాతో మెరిసిన సందీప్ సరోజ్, నయన్‌ సారికలు ఉత్తమ పరిచయ నటీనటులుగా అవార్డులు అందుకోవడం విశేషం.

టెక్నికల్ అండ్ మ్యూజికల్ మాజిక్:

సంగీత పరంగా చూస్తే, గతేడాది జనాలను ఊపేసిన పాటలకే పట్టం కట్టారు. 'గుంటూరు కారం'లోని "కుర్చీ మడతపెట్టి" పాటకు శ్రీకృష్ణ బెస్ట్ సింగర్‌గా, శేఖర్ మాస్టర్ బెస్ట్ కొరియోగ్రాఫర్‌గా అవార్డులు అందుకున్నారు. ఇక 'దేవర'లోని "చుట్టమల్లె" పాటకు గాను శిల్పా రావుకు ఉత్తమ గాయని అవార్డు, రామజోగయ్య శాస్త్రికి ఉత్తమ రచయిత అవార్డు దక్కాయి. ఇక అంతేకాక 'కల్కి 2898 ఏడీ' సినిమాలో నటించిన బాలీవుడ్ లెజెండ్ అమితాబ్ బచ్చన్‌కు ఉత్తమ సహాయ నటుడు అవార్డు దక్కింది. ఇలా 2024 లో విడుదలైన గొప్ప సినిమాలన్నింటికీ ఈ వేడుకలో సరైన గుర్తింపు లభించింది.

మొత్తానికి 70వ ఫిల్మ్‌ఫేర్ వేడుక టాలీవుడ్ ప్రతిభను ప్రపంచానికి మరోసారి చాటి చెప్పింది. 'పుష్ప 2' జోరు చూస్తుంటే మున్ముందు ఈ చిత్రం మరిన్ని అంతర్జాతీయ అవార్డులను కూడా కొల్లగొట్టేలా కనిపిస్తోంది.