బాలీవుడ్‌లో ఆదర్శ భర్త ఎవరు?

బాలీవుడ్ చలనచిత్ర పరిశ్రమలో ప్రేమ.. పెళ్లిళ్లు బంధాలు ఎప్పుడూ వార్తల్లో నిలుస్తూనే ఉంటాయి. అనేక మంది నటీనటులు జీవిత భాగస్వాములను ఆదర్శంగా కొనియాడుతుంటారు. అయితే ఈ తరం స్టార్లలో నిజమైన ఆదర్శ భర్త ఎవరు అనే ప్రశ్న ఎదురైనప్పుడు చాలామంది ప్రస్తుత తరం హీరోల పేర్లు చెబుతుంటారు. కానీ బాలీవుడ్ నటి ఈషా డియోల్ మాత్రం ఈ విషయంలో ఏమాత్రం ఆలోచించకుండా తన తండ్రి.. హి-మాన్ ధర్మేంద్ర పేరే చెప్పి ఆశ్చర్యపరిచారు.

ఓ ప్రత్యేక ఇంటర్వ్యూలో పాల్గొన్న ఈషా డియోల్‌కు బాలీవుడ్ పరిశ్రమ మొత్తంలో ఆదర్శవంతమైన భర్త ఎవరు?” అనే ప్రశ్న ఎదురైంది. దానికి ఆమె క్షణం కూడా ఆలోచించకుండా చిరునవ్వుతో తండ్రి ధర్మేంద్ర పేరును వెల్లడించారు. తల్లి డ్రీమ్ గర్ల్ హేమమాలిని పట్ల తండ్రి చూపించే ప్రేమాభిమానాలు.. బాధ్యతాయుతమైన ప్రవర్తనే ఆయన్ని అత్యుత్తమ భర్తగా నిలబెట్టాయని గర్వంగా పంచుకున్నారు.

ధర్మేంద్ర - హేమమాలినిల దాంపత్య బంధం బాలీవుడ్‌లోనే అత్యంత అరుదైనదిగానూ.. ఆదర్శవంతమైనదిగానూ పేరొందింది. ఎన్నో ఏళ్లుగా ఒకరికొకరు తోడుగా నిలుస్తూ జీవితంలోని కష్టసుఖాల్లోనూ పరస్పర గౌరవాన్ని కాపాడుకోవడం వారి ప్రత్యేకత అని ఈషా పేర్కొన్నారు. ఒక భర్తగా తన తల్లికి ఆయన ఇచ్చిన గౌరవం.. రక్షణ.. అనంతమైన ప్రేమ తర్వాతి తరాలకు మార్గదర్శకమని అభిప్రాయపడ్డారు.

తమ కుటుంబంలో తండ్రి ధర్మేంద్ర పాత్ర కథానాయకుడిగానే కాకుండా.. కుటుంబ వ్యవస్థకు బలమైన పునాదిగా నిలిచిందని ఈషా తెలిపారు. హేమమాలిని వ్యక్తిగత, రాజకీయ జీవితంలో సాధించిన విజయాల వెనుక ధర్మేంద్ర ప్రోత్సాహం ఎంతో ఉందని.. భార్య ఎదుగుదలను చూసి గర్వపడే భర్త దొరకడం ఎంతో అదృష్టమని కొనియాడారు. ఈ గుణాలే ఆయ‌న్ని నిజమైన ఆదర్శ భర్తగా మార్చాయన్నారు.

నేటి కాలంలో బంధాలు, అనుబంధాలు చిన్న చిన్న కారణాలకే విచ్ఛిన్నమవుతున్న తరుణంలో ధర్మేంద్ర - హేమమాలిని దంపతుల జీవితం ఎంద‌రికో స్ఫూర్తిదాయకమని ఈషా వ్యాఖ్యానించారు. నటుడిగా వెండితెరపై కోట్ల మంది అభిమానాన్ని సంపాదించుకున్న తండ్రి నిజ జీవితంలో మంచి భర్తగా, బాధ్యతాయుతమైన తండ్రిగా సాధించిన విజయమే తమకు ఎంతో విలువైనదని భావోద్వేగంగా వెల్లడించారు.

చివరగా ఒక మహిళ భాగస్వామిలో వెతుక్కునే అన్ని మంచి గుణాలు, నిబద్ధత తన తండ్రిలోనే పుష్కలంగా ఉన్నాయని ఈషా ముగించారు. అందుకే బాలీవుడ్‌లో ఎంతమంది నటులు ఉన్నా? భర్త అనే స్థానానికి నిలువెత్తు రూపం తన తండ్రి ధర్మేంద్ర మాత్రమేనని కుండబద్దలు కొట్టినట్లు స్పష్టం చేశారు.