Begin typing your search above and press return to search.

దుల్కర్.. హీరోయిన్లకు ఇదేం క్రేజ్!

దుల్కర్ సల్మాన్ తెలుగు సినిమాలు పలువురు హీరోయిన్లకు మంచి గుర్తింపు తెచ్చిపెట్టాయి. ‘మహానటి’తో కీర్తి సురేష్, ‘సీతారామం’తో మృణాల్ ఠాకూర్‌కు కెరీర్‌లో కీలక విజయాలు దక్కాయి. ఇప్పుడు ‘ఆకాశంలో ఒక తార’తో సాత్విక వీరవల్లిని పరిచయం చేస్తున్నారు. పవన్ సాధినేని దర్శకత్వంలో తెరకెక్కిన ఈ సినిమా నవంబర్ 20న విడుదల కానుంది. ఇందులో కల్పన అనే యువతి పాత్రకు ప్రాధాన్యం ఉండనుంది.

By:  M Prashanth   |   19 Nov 2026 8:34 AM IST
దుల్కర్.. హీరోయిన్లకు ఇదేం క్రేజ్!
X

మలయాళ స్టార్ దుల్కర్ సల్మాన్‌కు తెలుగులో మంచి ఫాలోయింగ్ ఉన్న సంగతి తెలిసిందే. అయితే ఆయన చేసిన కొన్ని తెలుగు సినిమాలను చూస్తే హీరోయిన్లకు కూడా గట్టిగానే పేరొచ్చింది. ముఖ్యంగా మహానటి, సీతారామం సినిమాలు కీర్తి సురేష్, మృణాల్ ఠాకూర్ కెరీర్లలో ఎంత పెద్ద విజయాలు అందించాయో తెలిసిందే. ఇప్పుడు ఆకాశంలో ఒక తారతో మరో కొత్త హీరోయిన్‌ను ప్రేక్షకులకు పరిచయం చేస్తున్నారు.

'మహానటి'లో దుల్కర్ జెమినీ గణేశన్‌గా నటించగా, కీర్తి సురేష్ సావిత్రి పాత్రలో కనిపించారు. సినిమా మొత్తం కీర్తి పాత్ర చుట్టూనే తిరిగింది. ఆమె నటనకు జాతీయ అవార్డు కూడా దక్కింది. దుల్కర్ కూడా తన పాత్రతో మెప్పించినప్పటికీ కీర్తికి ఆ సినిమా కెరీర్‌లోనే పెద్ద గుర్తింపు తీసుకొచ్చింది. ముఖ్యంగా సావిత్రి పాత్ర కోసం ఆమె పడిన కష్టం, నటనకు ప్రేక్షకుల నుంచి భారీ ప్రశంసలు వచ్చాయి.

ఇక 'సీతారామం'లో మృణాల్ ఠాకూర్‌కు దక్కిన క్రేజ్ కూడా మామూలుగా లేదు. అప్పటివరకు హిందీలో సినిమాలు చేసిన మృణాల్, తెలుగులో తొలి చిత్రంతోనే మంచి ఫ్యాన్ బేస్ సంపాదించుకున్నారు. సీతామహాలక్ష్మి పాత్రలో ఆమె లుక్, ఎక్స్‌ప్రెషన్స్, దుల్కర్‌తో కెమిస్ట్రీ సినిమాకు బాగా కలిసొచ్చాయి. ఆ సినిమా తర్వాత తెలుగులో మృణాల్‌కు వరుస అవకాశాలు వచ్చాయి. దుల్కర్ రామ్ పాత్ర ఎంత గుర్తుండిపోయిందో మృణాల్ సీత పాత్ర కూడా అంతే గుర్తుండిపోయింది.

అయితే 'లక్కీ భాస్కర్'లో పరిస్థితి కొంచెం వేరు. కథ మొత్తం దుల్కర్ పోషించిన భాస్కర్ పాత్ర చుట్టూ నడిచింది. మీనాక్షి చౌదరి ఆయన భార్యగా కనిపించారు. పెద్దగా గ్లామర్‌కు అవకాశం లేకపోయినా కుటుంబ బాధ్యతలు, భర్తతో వచ్చే సన్నివేశాల్లో మంచి నటన చూపించారు. ముఖ్యంగా హీరో పాత్రను మాత్రమే ఎలివేట్ చేయకుండా హీరోయిన్‌కు కూడా కథలో ఉపయోగపడే సన్నివేశాలు ఉండటం దుల్కర్ తెలుగు సినిమాల్లో కనిపిస్తోంది.

ఇప్పుడు 'ఆకాశంలో ఒక తార'లో సాత్విక వీరవల్లి హీరోయిన్‌గా పరిచయమవుతున్నారు. పవన్ సాధినేని దర్శకత్వంలో తెరకెక్కిన ఈ సినిమాలో ఆమె కల్పన అనే గ్రామీణ యువతి పాత్ర చేస్తున్నారు. అంతరిక్షంలోకి వెళ్లాలనే కల ఉన్న అమ్మాయి ప్రయాణం కథలో ప్రధానంగా ఉండబోతోంది. దుల్కర్ కృష్ణ అనే పాత్రలో ఆమెకు అండగా నిలిచే వ్యక్తిగా కనిపించనున్నారు. దీంతో మరోసారి హీరోయిన్ పాత్రకు మంచి ప్రాధాన్యం ఉన్న కథను దుల్కర్ ఎంచుకున్నట్లు కనిపిస్తోంది.

ఈ సినిమాలో శ్రుతిహాసన్ కూడా కీలక పాత్రలో కనిపించనున్నారు. సాత్వికకు ఇదే తొలి సినిమా కావడంతో ప్రమోషన్లలో కూడా ఆమెకు మంచి ప్రాధాన్యం ఇస్తున్నారు. లైట్‌బాక్స్ మీడియా నిర్మించిన ఈ చిత్రాన్ని స్వప్న సినిమా, గీతా ఆర్ట్స్ సమర్పిస్తున్నాయి. నవంబర్ 20న విడుదల కానున్న సినిమాకు ఇప్పటికే యూఏ సర్టిఫికెట్ వచ్చింది. తెలుగు రాష్ట్రాల్లో పెయిడ్ ప్రీమియర్ల కోసం కూడా బుకింగ్స్ ప్రారంభించారు.