శివాజీ కామెంట్స్.. మారుతి అలా అన్నారేంటి?

టాలీవుడ్ నటుడు శివాజీ ఇటీవల చేసిన కామెంట్స్ వివాదాస్పదంగా మారిన విషయం తెలిసిందే. హీరోయిన్స్ డ్రెస్సింగ్ పై ఆయన చేసిన వ్యాఖ్యలు తీవ్ర దుమారాన్ని రేపాయి. ఇప్పటికే అనేక మంది సినీ ప్రముఖులు రెస్పాండ్ అయ్యారు. కొందరు శివాజీపై మండిపడుతుండగా.. మరికొందరు ఆయనకు సపోర్ట్ గా మాట్లాడుతున్నారు.

ఇప్పుడు శివాజీ చేసిన కామెంట్స్ పై డైరెక్టర్ మారుతి స్పందించారు. పాన్ ఇండియా స్టార్ ప్రభాస్ ప్రధాన పాత్రలో మారుతి తెరకెక్కిస్తున్న ది రాజా సాబ్ మూవీ.. మరికొద్ది రోజుల్లో విడుదల కానుంది. దీంతో ఇప్పుడు ఆయన వరుస ఇంటర్వ్యూలు ఇస్తున్నారు. ఆ సమయంలో సినిమాకు సంబంధించిన పలు విషయాలను పంచుకుంటున్నారు.

తాజాగా ఓ ఇంటర్వ్యూలో శివాజీ వ్యాఖ్యలతో రేగిన వివాదంపై మాట్లాడారు మారుతి. ఆ మధ్య హైదరాబాద్ లోని ఓ మాల్‌ లో జరిగిన ది రాజా సాబ్ మూవీ సాంగ్ లాంచ్ ఈవెంట్ లో హీరోయిన్ నిధి అగర్వాల్‌ కు ఎదురైన చేదు అనుభవాన్ని ప్రస్తావిస్తూ తాను వ్యాఖ్యలు చేశానని శివాజీ స్వయంగా ప్రెస్ మీట్ లో వెల్లడించారు.

ఇప్పుడు ఆయన చెప్పిన మాటల్లో కొంత మంచి ఉద్దేశం ఉందని, అయితే చెప్పాల్సిన విషయాన్ని కాస్త కఠినంగా, నేరుగా చెప్పడంతో వివాదం పెద్దదైందని మారుతి అన్నారు. మాటల తీరులో కాస్త సంయమనం పాటించి ఉంటే, చెప్పాలనుకున్న సందేశం మరింత స్పష్టంగా, అర్థవంతంగా చేరేదని ఆయన ఓ ఇంటర్వ్యూలో అభిప్రాయపడ్డారు.

రాజా సాబ్ ఈవెంట్‌ లో నిధి అగర్వాల్‌ కు జరిగిన ఘటనకు తాను ప్రత్యక్ష సాక్షినని మారుతి తెలిపారు. ఆ సమయంలో కొందరు ప్రవర్తన పట్ల శివాజీ ఆందోళన వ్యక్తం చేశారని, హీరోయిన్ల భద్రతపై చర్చ రావాలన్న ఉద్దేశంతో ఆయన అలా మాట్లాడి ఉండవచ్చని మారుతి పేర్కొన్నారు. ప్రతి ఒక్కరికి తన అభిప్రాయాన్ని వ్యక్తపరచే హక్కు ఉందని, అయితే ఆ అభిప్రాయాన్ని ఎలా చెప్పాలన్నది ముఖ్యమని అన్నారు.

ఇప్పుడు మారుతి కామెంట్స్ పై సోషల్ మీడియాలో అంతా డిస్కస్ చేసుకుంటున్నారు. శివాజీ వ్యాఖ్యలకు పరోక్షంగా మద్దతు ఇస్తున్నట్లుగా మారుతి మాట్లాడారని పలువురు అభిప్రాయపడ్డారు. ముఖ్యంగా నిధి అగర్వాల్‌ కు దర్శకుడు బహిరంగంగా అండగా నిలవాల్సిందని కొందరు నెటిజన్లు అభిప్రాయపడుతున్నారు.

శివాజీ మాటల్లో మంచి ఉద్దేశం ఉందని చెప్పడం కన్నా, హీరోయిన్ ఎదుర్కొన్న ఇబ్బంది ఖండిస్తూ క్లియర్ గా మాట్లాడాల్సిందని అంటున్నారు. సినీ ఇండస్ట్రీలో మహిళల సెక్యూరిటీ పై క్లియర్ మెసేజ్ ఇవ్వలసిన బాధ్యత దర్శకులదేనని చెబుతున్నారు. దీంతో మళ్లీ మారుతి తన కామెంట్స్ పై ఏమైనా క్లారిటీ ఇస్తారేమో వేచి చూడాలి.