పవన్తో మరో సినిమా.. దిల్ రాజు ప్రయత్నాలు ఫలిస్తాయా?
పవన్ కళ్యాణ్తో మరో సినిమా చేయాలనే ఉద్దేశంతోనే ఇటీవల కలిశానని నిర్మాత దిల్ రాజు స్పష్టం చేశారు. గతంలో వీరిద్దరి కాంబినేషన్లో వచ్చిన ‘వకీల్ సాబ్’ మంచి అనుభూతిని ఇచ్చిందని, మళ్లీ మంచి సినిమా చేయాలని భావిస్తున్నట్లు తెలిపారు. అయితే కథ, దర్శకుడు ఇంకా ఖరారు కాలేదు. రాజకీయ బాధ్యతల నేపథ్యంలో పవన్ నాలుగు నెలల్లో షూటింగ్ పూర్తి చేసేలా ప్లాన్ చేస్తున్నారనే ప్రచారం జరుగుతోంది. అన్ని వివరాలు సిద్ధమైన తర్వాతే సినిమా ప్రకటిస్తామని దిల్ రాజు చెప్పారు.
By: M Prashanth | 14 Nov 2026 10:00 PM ISTపవన్ కళ్యాణ్ రాజకీయాల్లో బిజీగా ఉన్నప్పటికీ కొత్త సినిమాల కోసం నిర్మాతలు ప్రయత్నిస్తూనే ఉన్నారు. అయితే డిప్యూటీ సీఎం బాధ్యతల మధ్య షూటింగ్కు ఎక్కువ రోజులు కేటాయించడం పవన్కు అంత ఈజీ కాదు. ఇప్పటికే 'OG' సీక్వెల్ కోసం అభిమానులు ఎదురుచూస్తున్నారు. ఈ సమయంలో పవన్తో మరో సినిమా చేయడానికి నిర్మాత దిల్ రాజు ముందుకొచ్చారు. ఇటీవల జరిగిన వీళ్ల భేటీ కూడా ఇందుకోసమేనని తెలిసింది.
దిల్ రాజు తన భార్య తేజస్వినితో కలిసి పవన్ కళ్యాణ్ను కలిశారు. ఆ ఫొటోలు బయటకు రావడంతో కొత్త సినిమాపై వార్తలు మొదలయ్యాయి. శుక్రవారం జరిగిన 'రామాయణం', 'సీన్' సక్సెస్ ప్రెస్మీట్లో దిల్ రాజు కూడా ఈ విషయాన్ని ప్రస్తావించారు. పవన్తో సినిమా చేయాలనే ఉద్దేశంతోనే కలిశానని చెప్పారు. ఇద్దరూ నవ్వుతూ ఉన్న ఫొటోలే సమావేశం ఎలా జరిగిందో చెబుతాయంటూ ఒక హింట్ అయితే ఇచ్చారు.
గతంలో పవన్తో దిల్ రాజు 'వకీల్ సాబ్' నిర్మించారు. హిందీ చిత్రం 'పింక్' రీమేక్గా వచ్చిన ఆ సినిమాకు వేణు శ్రీరామ్ దర్శకత్వం వహించారు. పవన్ రాజకీయాల్లోకి వెళ్లిన తర్వాత కొంత గ్యాప్ తీసుకుని నటించిన సినిమా కూడా అదే. మళ్లీ పవన్తో మంచి సినిమా చేయాలని అప్పటి నుంచే అనుకుంటున్నట్లు దిల్ రాజు చెప్పారు. అయితే ఈసారి ఎలాంటి కథతో ముందుకు వెళ్తారనేది ఇంకా ఖరారు కాలేదు.
మరోవైపు పవన్ కోసం దర్శకులు, కథలను వెతుకుతున్నట్లు ఇండస్ట్రీలో వార్తలు వస్తున్నాయి. గతంలో వంశీ పైడిపల్లి దర్శకత్వంలో పవన్తో సినిమా చేయడానికి దిల్ రాజు ప్రయత్నించినట్లు ప్రచారం జరిగింది. అయితే ప్రస్తుతం వంశీ పైడిపల్లి సల్మాన్ ఖాన్ సినిమాతో బిజీగా ఉన్నారు. దీంతో పవన్ కొత్త ప్రాజెక్ట్కు మరో దర్శకుడిని తీసుకుంటారా అనే విషయంలో కూడా రకరకాల ప్రచారాలు జరుగుతున్నాయి.
ఇక పవన్ కొత్త సినిమాను నాలుగు నెలల్లో పూర్తి చేయాలనే ఆలోచనలో ఉన్నట్లు కూడా వార్తలు వస్తున్నాయి. నెలకు పది నుంచి పదిహేను రోజుల చొప్పున షూటింగ్కు సమయం ఇవ్వొచ్చని చెబుతున్నారు. ఈ షెడ్యూల్ నిజమైతే ముందుగానే స్క్రిప్ట్, లొకేషన్లు, ఇతర నటీనటుల కాల్షీట్లను సిద్ధం చేసుకోవాల్సి ఉంటుంది. ప్రస్తుతం దిల్ రాజు బ్యానర్లో 'ఎల్లమ్మ', 'రౌడీ జనార్ధన', 'దేత్తడి' సినిమాలతో పాటు హిందీలో అక్షయ్ కుమార్, సల్మాన్ ఖాన్ ప్రాజెక్టులు కూడా ఉన్నాయి. వీటిలో సల్మాన్ సినిమాను వంశీ పైడిపల్లి తెరకెక్కిస్తున్నారు. పవన్తో సినిమా విషయంలో మాత్రం అన్నీ సిద్ధమైన తర్వాతే అధికారికంగా ప్రకటిస్తామని దిల్ రాజు క్లారిటీ ఇచ్చారు.
