క్రిస్టోఫర్ నోలన్ మ్యాజిక్ ఇదే.. ఎందుకు ఒకసారి చూస్తే సరిపోదు?

సినిమా చూసిన తర్వాత థియేటర్ నుంచి బయటకు వస్తాం.. కథేంటి? అసలు దర్శకుడేం చెప్పాలనుకున్నాడు? అనే ఆలోచన మొదలవుతుంది. కొన్ని సినిమాలు ఎంటర్టైన్మెంట్ మాత్రమే ఇస్తాయి.. మరికొన్ని చిత్రాలు మన ఆలోచనలను వెంటాడుతూనే ఉంటాయి. క్రిస్టోఫర్ నోలన్ సినిమాలు రెండో టైప్ కు చెందుతాయి. అందుకే ఆయన సినిమాలను ఒకసారి చూసి పక్కన పెట్టడం కంటే.. మరోసారి చూడాలనే ఆసక్తి ఆడియన్స్ లో కనిపిస్తుంది.

హాలీవుడ్‌ లో ఎంతో మంది దర్శకులు ఉన్నప్పటికీ, నోలన్‌ కు ప్రత్యేకమైన గుర్తింపు రావడానికి కారణం ఆయన కథ చెప్పే విధానం. సాధారణ కథను కూడా అసాధారణ అనుభూతిగా మార్చడం ఆయన స్పెషాలిటీ. ప్రేక్షకుడిని కేవలం సినిమా చూసే వ్యక్తిగా కాకుండా.. కథలో భాగంగా మార్చడం నోలన్ స్టైల్. ఆయన సినిమాల్లో మొదటి సారి చూసినప్పుడు కథ, విజువల్స్, రోల్స్ పైకి దృష్టి వెళ్తుంది.

కానీ రెండోసారి చూసినప్పుడు చిన్న చిన్న విషయాలు, దాచిన అర్థాలు, ముందుగానే ఇచ్చిన సిగ్నల్స్ కనిపిస్తాయి. ఇదే ఆయన సినిమాల స్పెషాలిటీ. ప్రతి సీన్ వెనుక ఒక ఉద్దేశం ఉండటం వల్ల ప్రేక్షకులు మళ్లీ ఆ వరల్డ్ లోకి వెళ్లాలని అనుకుంటారు. ఇన్‌ సెప్షన్ ఇందుకు మంచి ఉదాహరణ. కలల ప్రపంచం నేపథ్యంలో తెరకెక్కిన ఈ సినిమా మొదటిసారి చూసినప్పుడు ఆసక్తికరంగా అనిపిస్తుంది.

రెండోసారి చూసినప్పుడు కథలోని లేయర్స్, పాత్రల ఎమోషన్స్ మరింత క్లియర్ గా అర్థమవుతాయి. అలాగే ఇంటర్‌ స్టెల్లార్లో సైన్స్‌ తోపాటు హ్యూమన్ రిలేషన్స్ ను చూపించిన విధానం ప్రేక్షకులను మరోసారి ఆలోచించేలా చేస్తుంది. నోలన్ సినిమాల్లో మరో ముఖ్యమైన అంశం టైమ్‌ తో ఆయన చేసే ప్రయోగాలు. పాస్ట్, ప్రెజెంట్, ఫ్యూచర్ ను కలిపి కథ చెప్పే విధానం సాధారణ ప్రేక్షకుడికి కొత్త ఎక్స్పీరియన్స్ ఇస్తుంది. మొదటిసారి అర్థం చేసుకునేందుకు ప్రయత్నించే ప్రేక్షకులు.. తర్వాత కథను ఆస్వాదించడం మొదలుపెడతారు.

ఇక ఆయన సినిమాల్లో విజువల్ ఎఫెక్ట్స్ ఉన్నప్పటికీ, అవి కేవలం ఆకట్టుకోవడానికి మాత్రమే ఉపయోగించరు. కథకు అవసరమైన చోట మాత్రమే వాడటం నోలన్ ప్రత్యేకత. భారీ సెట్లు, రియల్ లొకేషన్లు, నేచురల్ సీన్స్ సన్నివేశాలు ప్రేక్షకుడికి సినిమా చూస్తున్నామనే ఫీలింగ్ కంటే.. ఒక అనుభవాన్ని పొందుతున్నామనే ఫీలింగ్ ఇస్తాయి. అందుకే నోలన్ సినిమాలకు రిపీట్ ఆడియన్స్ ఎక్కువగా ఉంటారు. సినిమా గురించి స్నేహితులతో చర్చించడం, కొత్త విషయాలు తెలుసుకోవడం, మరోసారి చూసి అర్థం చేసుకోవడం.. ఇవన్నీ ఆయన సినిమాల ఎఫెక్ట్ ను చూపిస్తాయి.

ది ఒడిస్సీ విషయంలో కూడా ఇదే మ్యాజిక్ కనిపిస్తోంది. భారీ యాక్షన్ అంశాలు లేకపోయినా, కథనం, మేకింగ్, నోలన్ టేకింగ్‌ పై ఉన్న నమ్మకం ప్రేక్షకులను థియేటర్లకు తీసుకొస్తోంది. దర్శకుడి పేరే ఒక బ్రాండ్‌ గా మారడానికి కారణం ఇదే. సాధారణంగా సినిమాలు విడుదలైన కొన్ని రోజులకు ప్రభావం తగ్గిపోతుంది. కానీ నోలన్ చిత్రాలు మాత్రం విడుదల తర్వాత కూడా చర్చల్లో ఉంటాయి. ప్రతిసారి కొత్త అనుభూతిని ఇవ్వడం.. ఆలోచింపజేయడం.. ఇదే నోలన్ మ్యాజిక్. అందుకే ఆయన సినిమాలను ఒక్కసారి చూస్తే సరిపోదు.. మళ్లీ మళ్లీ చూడాలనిపిస్తుంది.