'విశ్వంభర' అసలు శత్రువు ఆలస్యం కాదు!

‘విశ్వంభర’ ఎందుకు లేట్ అవుతోంది అన్న డౌట్ చాలాకాలంగా ఉంది. వీఎఫ్ఎక్స్ పనులు, రిలీజ్ డేట్ మార్పులు, కొత్త అప్డేట్ ఎప్పుడు అన్న ప్రశ్నలు కూడా కొత్తవి కావు. కానీ ఇప్పుడు ఈ సినిమాకు లేట్ కంటే పెద్ద ఇబ్బంది ఇంకోటి కనిపిస్తోంది. అదే ఆడియన్స్ మైండ్‌లో సినిమా మెల్లగా వెనక్కి వెళ్లిపోవడం. ఒకప్పుడు చిరంజీవి లైనప్‌లో ఎక్కువగా మాట్లాడుకున్న ప్రాజెక్ట్ ఇదే. ఇప్పుడు మాత్రం బర్త్‌డే దగ్గరపడుతున్నా చర్చ మొత్తం మరో సినిమాల వైపు తిరిగిపోయింది.

‘విశ్వంభర’ మొదలైనప్పుడు ఫాంటసీ బ్యాక్‌డ్రాప్, భారీ సెట్స్, చిరు కొత్త లుక్ అంటూ మంచి బజ్ వచ్చింది. టీజర్ కూడా బయటకు వచ్చింది. ఆ తర్వాతే వీఎఫ్ఎక్స్ మీద వివిధ రకాల కామెంట్స్ వచ్చాయి. మేకర్స్ కూడా విజువల్స్‌పై మళ్లీ పని చేస్తున్నట్లు వార్తలు వచ్చాయి. అప్పటినుంచి సినిమా నుంచి పెద్దగా కొత్త కంటెంట్ రాకపోవడంతో ఆ మొదటి హీట్ కూడా తగ్గిపోయింది.

ఇంతలో చిరంజీవి ‘మన శంకర వరప్రసాద్ గారు’తో మరో సినిమా పూర్తి చేసి రిలీజ్ కూడా చేసేశాడు. ఆ సినిమా మంచి రిజల్ట్ ఇవ్వడంతో చిరు మీద టాక్ మళ్లీ అక్కడికి వెళ్లింది. ఇప్పుడు బాబీతో చేస్తున్న కొత్త సినిమా కూడా వేగంగా ముందుకు వెళ్తోంది. టైటిల్, గ్లింప్స్, రిలీజ్ ప్లాన్ అంటూ ఆ ప్రాజెక్ట్ నుంచే ఎక్కువ అప్డేట్స్ వస్తున్నాయి. దీంతో ‘విశ్వంభర’ మధ్యలో ఎక్కడో ఆగిపోయిన సినిమాలా కనిపించే పరిస్థితి వచ్చింది.

ఇక్కడే అసలు సమస్య ఉంది. సినిమా ఆలస్యం అవ్వడం ఒక్కటే పెద్ద విషయం కాదు. కానీ ఆ గ్యాప్‌లో మరో రెండు ప్రాజెక్ట్స్ ముందుకు వచ్చేస్తే ప్రేక్షకుడి ఫోకస్ సహజంగానే మారిపోతుంది. ఒకప్పుడు ‘విశ్వంభర’ అంటే చిరు నుంచి వస్తున్న పెద్ద ఫాంటసీ సినిమా అనే ఇమేజ్ ఉండేది. ఇప్పుడు అదే సినిమాను మళ్లీ ఆ స్థాయిలో మాట్లాడించాలంటే ఒక్క రిలీజ్ డేట్ పోస్టర్ సరిపోదేమో.

ఈసారి టీమ్ నుంచి ఏదైనా అప్డేట్ వస్తే కొత్త విజువల్స్‌తోనే సినిమా మీద మళ్లీ ఇంట్రెస్ట్ తెచ్చుకోవాల్సి ఉంటుంది. ఎందుకంటే మొదటి టీజర్ గురించి వచ్చిన మాటలు ఇంకా చాలామందికి గుర్తున్నాయి. ఇప్పుడు అదే ప్రపంచాన్ని ఎంత బెటర్‌గా మార్చారో చూపిస్తేనే కథ మళ్లీ మొదలవుతుంది. లేదంటే ఇంకో డేట్ చెప్పినా కొన్ని రోజులు మాట్లాడుకుని మళ్లీ సైలెంట్ అయ్యే ఛాన్స్ ఉంటుంది.

అందుకే ‘విశ్వంభర’కు ఇప్పుడు అసలు శత్రువు లేట్ కాదు. ప్రేక్షకులు సినిమా గురించి మాట్లాడటం మానేయడమే పెద్ద సమస్య. చిరు బర్త్‌డే సమయంలో బాబీ సినిమా హడావుడి మధ్య ‘విశ్వంభర’ కూడా గట్టిగా గుర్తు చేస్తేనే మళ్లీ దాని మీద ఫోకస్ వస్తుంది. రిలీజ్ ఎప్పుడు అన్నదానికంటే ముందు.. ఈ సినిమా ఇంకా ఎందుకు వెయిట్ చేయాలి అన్న ఫీలింగ్ ఆడియన్స్‌లో తిరిగి రావాలి.