ముఠామేస్త్రి రీ-రిలీజ్‌కు రెడీ.. ఈసారి క్వాలిటీ జాగ్రత్త మేస్త్రి!

టాలీవుడ్ మెగాస్టార్ చిరంజీవి పుట్టినరోజు ఇంకో పదకొండు రోజుల్లో రాబోతోంది. ఈ సందర్భంగా మెగా అభిమానుల్లో ఆశలు, అంచనాలు ఆకాశాన్ని తాకుతున్నాయి. 'మెగా 158' నుంచి టీజర్ వస్తుందని థమన్, బాబీ ఇప్పటికే హింట్ ఇచ్చేశారు. ఇక 'విశ్వంభర' సినిమా విడుదల తేదీని కూడా అక్టోబర్ 16న అధికారికంగా ప్రకటించే అవకాశం ఉందని ప్రచారం జరుగుతోంది. కానీ, వీటన్నింటితో పాటు అభిమానులను అలరించేందుకు మెగాస్టార్ కల్ట్ క్లాసిక్ సినిమా 'ముఠామేస్త్రి' రీ-రిలీజ్‌కు సిద్ధమవుతుండటం ఇప్పుడు పెద్ద హాట్ టాపిక్‌గా మారింది. ఆ విశేషాలు చూద్దాం..

ఆగస్ట్ 21న థియేటర్లలోకి 'ముఠామేస్త్రి':

ఆగస్ట్ 21న 'ముఠామేస్త్రి' చిత్రాన్ని రీ-రిలీజ్ చేయడానికి నిర్వాహకులు ఏర్పాట్లు చేస్తున్నారు. 1993లో వచ్చిన ఈ సినిమా అప్పట్లో బాక్సాఫీస్ వద్ద రికార్డు కలెక్షన్లు సాధించింది. చిరంజీవి రాజకీయ రంగప్రవేశంపై తీవ్రమైన చర్చ నడుస్తున్న సమయంలో వచ్చి, ఆయనను ఎమ్మెల్యేగా, మంత్రిగా చూపించిన ఈ చిత్రం అభిమానులకు బాగా కనెక్ట్ అయింది. ఇక ఇప్పుడు మరోసారి ఈ మాస్ వినోదాన్ని వెండితెరపై చూసేందుకు ఫ్యాన్స్ ఎంతో ఆత్రుతగా ఎదురుచూస్తున్నారు.

క్వాలిటీ విషయంలో జాగ్రత్తలు తప్పనిసరి:

గతంలో చిరంజీవి నటించిన 'ఘరానా మొగుడు', 'జగదేకవీరుడు అతిలోకసుందరి', 'గ్యాంగ్ లీడర్' చిత్రాలను రీ-రిలీజ్ చేసినప్పుడు సరైన క్వాలిటీ లేక అభిమానులు తీవ్ర అసంతృప్తి చెందారు. ప్రింట్లు సరిగా లేకపోవడం ఆ అనుభూతిని దెబ్బతీసింది. అయితే 'కొదమసింహం' చిత్రాన్ని మాత్రం అద్భుతమైన 4K నాణ్యతతో రీమాస్టర్ చేశారు. ఇక ఇప్పుడు 'ముఠామేస్త్రి' విషయంలో కూడా అదే తరహా క్వాలిటీ జాగ్రత్తలు తీసుకోవాలని అభిమానులు కోరుకుంటున్నారు.

ప్రమోషన్లకు భలే అవకాశం:

ఆగస్ట్ 22న 'శంకర్ దాదా ఎంబీబీఎస్' కూడా థియేటర్లలోకి వస్తున్నప్పటికీ, అది ఇప్పటికే ఒకసారి రీ-రిలీజ్ అయింది కాబట్టి ఫ్యాన్స్ ఫోకస్ 'ముఠామేస్త్రి' పైనే ఉంది. ఇక ఈ చిత్రంలో నటించిన మీనా, రోజా, బ్రహ్మానందం, బాబు మోహన్ వంటి ప్రముఖ నటులంతా అందుబాటులోనే ఉన్నారు. వీరందరితో వీడియో బైట్లు, ప్రత్యేక ప్రమోషన్ ఈవెంట్లు ప్లాన్ చేస్తే సినిమాకు మరింత ఊపు వస్తుంది.

మెగాస్టార్ చిరంజీవి పుట్టినరోజు వేడుకలకు 'ముఠామేస్త్రి' రీ-రిలీజ్ ఒక మంచి ఆరంభం కానుంది. అయితే కేవలం థియేటర్లలో వేయడమే కాకుండా, క్వాలిటీ విజన్, సరైన పబ్లిసిటీతో వస్తే మాత్రం ఈ సినిమా మరోసారి బాక్సాఫీస్ వద్ద సరికొత్త రికార్డులను సృష్టించడం ఖాయం.