కోర్టులో ఇమ్రాన్ ఖాన్ క్షమాప‌ణ‌లు.. OCI కార్డ్‌హోల్డర్ల ప‌రిమితుల‌పై భారీ చర్చ

ప్రముఖ బాలీవుడ్ నటుడు, అమీర్ ఖాన్ మేన‌ల్లుడు ఇమ్రాన్ ఖాన్ `లీవ్ ఇండియా` నోటీసు సంచ‌ల‌నంగా మారిన సంగ‌తి తెలిసిందే. ఈ వ్యవహారంలో బాంబే హైకోర్టులో ఇమ్రాన్ ఇప్ప‌టికే బేషరతుగా క్షమాపణలు చెప్పడం.. కోర్టు విచారణ- తీర్పు సారాంశం ఇప్పుడు దేశవ్యాప్తంగా ఓవర్సీస్ సిటిజన్ ఆఫ్ ఇండియా (OCI) కార్డ్‌హోల్డర్ల రాజ్యాంగ హక్కులు, పరిమితులపై తీవ్రమైన విశ్లేషణాత్మక చర్చకు తెరలేపింది. అక్టోబర్ 10న ముంబైలోని ఆగస్ట్ క్రాంతి మైదాన్‌లో చీఫ్ ఎలక్షన్ కమిషనర్ జ్ఞానేష్ కుమార్‌కు వ్యతిరేకంగా నిర్వహించిన ధర్నా వద్ద ఇమ్రాన్ ఖాన్ కనిపించడమే ఈ వివాదానికి మూలకారణమైంది. దీని ఆధారంగా కేంద్ర ప్రభుత్వానికి చెందిన ఫారెనర్స్ రీజినల్ రిజిస్ట్రేషన్ ఆఫీస్ (ఎఫ్.ఆర్.ఆర్.ఓ) అక్టోబర్ 28 నాటికి దేశం విడిచి వెళ్లాలని నోటీసు ఇవ్వడం.. దానిని సవాల్ చేస్తూ ఇమ్రాన్ ఖాన్ బాంబే హైకోర్టును ఆశ్రయించడం ఈ కేసు తీవ్రతను తెలియజేస్తోంది.

తాజాగా సమర్పించిన అఫిడవిట్‌లో ఇమ్రాన్ ఖాన్ తాను ఎలాంటి డిమాండ్లు చేయలేదని.. అక్కడ ఏం జరుగుతుందో చూడటానికి ఒక ప్రేక్షకునిగా మాత్రమే వెళ్లానని స్పష్టం చేశారు. తన 42 ఏళ్ల వయస్సులో 40 ఏళ్లు భారతదేశంలోనే గడిపానని.. ఎప్పుడూ ఇక్కడి చట్టాలను, భారత రాజ్యాంగాన్ని అత్యున్నతంగా గౌరవించానని పేర్కొంటూ భవిష్యత్తులో నేరుగా గానీ, పరోక్షంగా గానీ ఎలాంటి నిరసన ప్రదర్శనల్లో పాల్గొననని కోర్టుకు హామీ ఇచ్చారు. అయితే చీఫ్ జస్టిస్ మహేష్ చంద్ర త్రిపాఠి- జస్టిస్ అద్వైత్ సేత్నా ధర్మాసనం ఈ కేసును విచారిస్తూ ఓవర్సీస్ పౌరుల చట్టపరమైన పరిమితులను స్పష్టంగా గుర్తుచేసింది. ఓసీఐ కార్డ్‌హోల్డర్లు విదేశీ పౌరుల కిందికే వస్తారని... భారత రాజ్యాంగంలోని ఆర్టికల్ 19 ప్రకారం భారత పౌరులకు లభించే శాంతియుతంగా నిరసన తెలిపే ప్రాథమిక హక్కులు వీరికి వర్తించవని కోర్టు తేల్చి చెప్పింది.

వాస్తవానికి OCI హోదా అనేది భారతీయ సంతతికి చెందిన విదేశీ పౌరులకు దేశంలో నివాసం ఉండేందుకు.. వ్యాపారాలు చేయడానికి .. ఆర్థికంగా స్థిరపడటానికి ఇచ్చే ఒక సదుపాయం మాత్రమే. దీని ద్వారా జీవితకాల మల్టిపుల్ ఎంట్రీ వీసాతో పాటు ఎన్‌ఆర్‌ఐలతో సమానంగా నివాస ఆస్తులను కొనుగోలు చేయడం, వైద్యం, న్యాయం, అకౌంటింగ్ వంటి వృత్తులను నిర్వహించే సదుపాయం లభిస్తుంది. అయితే విస్తృతమైన ఆర్థిక సదుపాయాలు లభించినా వారు చట్టపరంగా విదేశీ పౌరులుగానే ఉంటారు కాబట్టి వారికి భారతదేశంలో ఎలాంటి రాజకీయ హక్కులు ఉండవు. ఓటు వేసే హక్కు.. ఎన్నికల్లో పోటీ చేసే అవకాశం గానీ... రాజ్యాంగబద్ధ పదవులను చేపట్టే హక్కు వీరికి ఏమాత్రం ఉండవు.

అంతేకాకుండా OCI కార్డ్‌హోల్డర్లపై దేశ భద్రత, సార్వభౌమత్వాన్ని దృష్టిలో ఉంచుకుని కొన్ని నిర్దిష్ట ఆంక్షలు అమలులో ఉన్నాయి. వ్యవసాయ భూములు, తోటల భూములను కొనుగోలు చేయడంపై నిషేధంతో పాటు జర్నలిజం, పరిశోధనలు, మిషనరీ కార్యకలాపాలు చేయడం లేదా నిరసనల్లో భాగస్వాములు కావడం వంటి చర్యలకు కేంద్ర హోం మంత్రిత్వ శాఖ ముందస్తు అనుమతి తప్పనిసరి. ఇమ్రాన్ ఖాన్ కేసులో ఎన్నికల నిర్వహణ వంటి దేశ అంతర్గత రాజకీయ ప్రక్రియపై జరిగిన నిరసన వద్ద ప్రత్యక్షంగా కనిపించడం వల్ల చట్టపరంగా ఇబ్బందులు ఎదుర్కోవాల్సి వచ్చింది. ఒకవేళ ఇటువంటి నిరసనల్లో పాల్గొనాలనే బలమైన ఆసక్తి ఉంటే భారత పౌరసత్వం తీసుకోవాలని హైకోర్టు వ్యాఖ్యానించడం విశేషం.

అయితే ఇమ్రాన్ ఖాన్ చిన్ననాటి నుంచే భారతదేశంలో నివసిస్తూ ఇక్కడే తన వృత్తిపరమైన గుర్తింపును సాధించుకున్న నేపథ్యంలో కేంద్ర అధికారులు `వసుధైవ కుటుంబకం` సూత్రం ప్రకారం కొంత ఉదారతతో వ్యవహరించాలని కోర్టు అభిప్రాయపడింది. ప్రస్తుతం ఈ `లీవ్ ఇండియా` నోటీసుపై డిసెంబర్ 7 వరకు తాత్కాలిక స్టేను పొడిగించిన బాంబే హైకోర్టు.. తదుపరి విచారణలో ఎలాంటి నిర్ణయం తీసుకుంటుందనేది ఆసక్తికరంగా మారింది. ఏది ఏమైనా విదేశీ పౌరసత్వం కలిగిన ప్రముఖులు లేదా ఓసీఐ కార్డ్‌హోల్డర్లు నివాసముంటున్న దేశ చట్టాల పరిమితులను గ్రహించి నడుచుకోవాల్సిన అవసరాన్ని ఈ సంఘటన స్పష్టంగా ఎత్తిచూపుతోంది. అలాగే దేశ‌వ్యాప్తంగా ఓసీఐ కార్డ్ హోల్డ‌ర్ల ప‌రిమితులు.. ఎన్నారై హ‌క్కుల గురించి కూడా ఆస‌క్తిక‌ర చ‌ర్చ సాగుతోంది.