బాలీవుడ్ కొత్తగా ఆలోచించడం మానేసిందా?

ఒక సినిమా ప్రేక్షకులను మెప్పించి మంచి వసూళ్లు సాధిస్తే.. ఆ కథకు కొనసాగింపుగా మరో మూవీని తెరకెక్కించడం ఇప్పుడు కామన్ అయిపోయింది. ఇప్పటికే ప్రేక్షకులకు పరిచయమైన పాత్రలు, కథలు కావడంతో సీక్వెల్స్‌ పై మొదటి నుంచే అంచనాలు ఏర్పడుతున్నాయి. అయితే ఇదే సమయంలో కొత్త కథలను వెతికే ప్రయత్నం తగ్గిపోయి.. బాలీవుడ్ సక్సెస్ ఫార్ములాలపైనే ఆధారపడుతోందా? అనే ప్రశ్న వినిపిస్తోంది.

ఒక సినిమా సక్సెస్ అయిన తర్వాత దానికి సీక్వెల్‌ ప్రకటించడం వల్ల నిర్మాతలకు కొన్ని బెనిఫిట్స్ ఉంటాయి. ఫస్ట్ పార్ట్ తో పాత్రలు, స్టోరీ వరల్డ్ ప్రేక్షకులకు పరిచయమవుతాయి. దీంతో రెండో భాగానికి ప్రత్యేకంగా అవగాహన కల్పించాల్సిన అవసరం తక్కువగా ఉంటుంది. టైటిల్‌ వినగానే ప్రేక్షకులకు సినిమా ఏ తరహాలో ఉంటుందో కూడా అర్థమవుతుంది. ఇక సోషల్‌ మీడియాలో ఫస్ట్‌ లుక్‌, టీజర్‌, ట్రైలర్‌ విడుదల చేసినప్పటి నుంచే చర్చ మొదలవుతుంది.

బాలీవుడ్‌ లో ఒకప్పుడు సినిమా కథ పూర్తయితే అక్కడితో ముగిసేది. ఇప్పుడు మాత్రం పాత్రలకు మరో కథను రాసి.. వాటిని కొనసాగిస్తున్నారు. ఒక సినిమా సక్సెస్‌ అయితే దానికి సీక్వెల్‌, అది హిట్‌ అయితే మరో భాగం.. ఇలా ఫ్రాంచైజీగా మార్చే ప్రయత్నాలు పెరుగుతున్నాయి. క్రైమ్‌, యాక్షన్‌, కామెడీ, హారర్‌ వంటి జానర్లలో ఆ ట్రెండ్‌ ఎక్కువగా కనిపిస్తోంది. ప్రేక్షకులకు ఇప్పటికే తెలిసిన ప్రపంచంలోకి మరోసారి తీసుకెళ్లడం ద్వారా థియేటర్లలో ఆసక్తిని పెంచాలని మేకర్స్ భావిస్తున్నారు.

ఇక్కడే అసలు సమస్య మొదలవుతోంది. మొదటి సినిమా విజయం సాధించిందనే కారణంతో రెండో భాగాన్ని తెరకెక్కిస్తే సరిపోతుందా? అనే ప్రశ్న తలెత్తుతోంది. సీక్వెల్‌ లో కథ, పాత్రలు, కొత్తగా లేకపోతే ప్రేక్షకులు నిరాశ చెందే అవకాశం ఉంది. మొదటి భాగంలో పనిచేసిన అంశాలనే రెండో భాగంలో కూడా చూపిస్తే.. ప్రేక్షకులకు అది పాత అనుభూతినే ఇస్తుంది. ముఖ్యంగా ఓటీటీలు, సోషల్‌ మీడియా కారణంగా ప్రపంచవ్యాప్తంగా ఎన్నో రకాల కథలను చూసే అవకాశం ప్రేక్షకులకు లభిస్తోంది. దీంతో సాధారణ కథలతో వారిని మెప్పించడం అంత ఈజీ కాదు.

కొత్త కథతో సినిమా చేయడం అంటే నిర్మాతలకు ఎక్కువ రిస్క్‌. హీరో ఎవరు? కథ ఎలా ఉంటుంది? ప్రేక్షకులు అంగీకరిస్తారా? అనే ప్రశ్నలకు ముందుగానే సమాధానం ఉండదు. అదే సీక్వెల్‌ అయితే మొదటి భాగం విజయాన్ని ఆధారంగా చేసుకుని కొంత మేరకు అంచనా వేయవచ్చు. అందుకే సీక్వెల్స్‌ వైపు మేకర్స్‌ మొగ్గు చూపుతున్నారని చర్చ జరుగుతోంది. అయితే రిస్క్‌ తగ్గించుకోవడం కోసం తీసిన సీక్వెల్‌.. కథలో రిస్క్‌ తీసుకోకపోతే మాత్రం అదే సినిమాకు మైనస్‌ గా మారొచ్చు.

ప్రేక్షకులు సీక్వెల్స్‌ ను తిరస్కరించడం లేదు. కానీ ప్రతి సీక్వెల్‌ను ఆదరిస్తారని కూడా చెప్పలేం. మొదటి భాగంతో ఏర్పడిన అంచనాలను అందుకోవడంతో పాటు.. కొత్త కథ, కొత్త ఎమోషన్‌, కొత్త అనుభూతిని అందించినప్పుడే రెండో భాగం ఆకట్టుకుంటుంది. అందుకే బాలీవుడ్‌ ముందున్న అసలు సవాలు సీక్వెల్స్‌ చేయాలా? వద్దా? అనేది కాదు. సీక్వెల్‌ చేస్తున్నా.. అందులో కొత్తగా ఏం చూపించాలి? అనేదే. హిట్ సినిమాలపై నమ్మకం మంచిదే.. కానీ అదే సమయంలో కొత్త కథలకు అవకాశం ఇవ్వకపోతే బాలీవుడ్‌ క్రియేటివిటీపై ప్రశ్నలు తలెత్తే అవకాశం ఉంది.