చదువు, మస్తీ కలగలిపి... స్టార్ హీరో కొత్త డిజిటల్ ప్రయత్నం!

బాలీవుడ్ సూపర్‌స్టార్ సల్మాన్ ఖాన్ డిజిటల్ ప్రపంచంలోకి సరికొత్త అవతారంలో అడుగుపెట్టారు. సాధారణంగా స్టార్ హీరోలు యూట్యూబ్ వేదికలను సినిమా ప్రమోషన్లకు, వ్యక్తిగత వ్లాగ్స్‌కు మాత్రమే పరిమితం చేస్తారు. కానీ భాయ్‌జాన్ మాత్రం ఇందుకు పూర్తి భిన్నంగా చిన్నారులలో విద్యాబుద్ధులు , నైతిక విలువలను పెంపొం దించేందుకు ప్రత్యేక డిజిటల్ పాఠశాలను ప్రారంభించి ఆశ్చర్యపరిచారు. ఈ కొత్త యూట్యూబ్ ఛానెల్ విశేషాలు .. టార్గెట్ ఆడియన్స్ గురించి సల్మాన్ చేసిన వ్యాఖ్యలు నెట్టింట వైర‌ల్ అవుతున్నాయి.

ఈ కొత్త యూట్యూబ్ ఛానెల్ ద్వారా సల్మాన్ అభిమానులను, ప్రేక్షకులను అలరించేందుకు సరికొత్త ప్రయోగానికి శ్రీకారం చుట్టారు. పిల్లల కోసం ప్రత్యేకమైన కంటెంట్‌ను అందించే వినూత్న ఉద్దేశంతో `బీయింగ్ సల్మాన్ ఖాన్` పేరుతో డిజిటల్ వేదికను ప్రారంభించారు. `మొదటి నుంచి ప్రారంభిద్దాం... ఇది నా అధికారిక యూట్యూబ్ ఛానెల్. ఇక్కడ మీకు ఏ నుంచి జెడ్ వరకు అన్నీ దొరుకుతాయి` అంటూ అభిమానులను ఆహ్వానించారు. ఈ ఛానెల్ ప్రారంభించిన నిమిషాల్లోనే పెద్ద ఎత్తున స్పందన లభించడం విశేషం.

అయితే ఈ ఛానెల్‌లో వస్తున్న కంటెంట్ పెద్దలకు కాకుండా చిన్న పిల్లల కోసం రూపొందించినట్లు సల్మాన్ స్పష్టం చేశారు. `నా యూట్యూబ్ ఛానెల్‌ను చూస్తున్నందుకు ధన్యవాదాలు. ఈ కంటెంట్ ప్రస్తుతం మీకు నచ్చకపోవచ్చు. కానీ ఇది మీ చిన్న పిల్లల కోసం అని మీరు అర్థం చేసుకుంటారని ఆశిస్తున్నాను` అంటూ పోస్ట్ రాశారు.

పిల్లల పెంపకంలో విద్య ఎంత ముఖ్యమో తనదైన శైలిలో వివరించారు. కొద్దిపాటి సరదా, ప్రేమ, కుటుంబ విలువలతో పాటు పిల్లలకు విద్య కూడా ఎంతో అవసరమని సల్మాన్ పేర్కొన్నారు. `కొద్దిగా మస్తీతో పాటు ప్రేమ, కుటుంబం , పిల్లలకు చదువు కూడా ముఖ్యం కదా?` అని అభిమానులను ప్రశ్నించారు.

ఈ ఛానెల్‌లో ఇప్పటివరకు విడుదల చేసిన వీడియోలలో సల్మాన్ ఖాన్ వినూత్న రీతిలో కనిపించారు. ఒక ఉపాధ్యాయుడిగా , విద్యార్థిగా తానే స్వయంగా ద్విపాత్రాభినయం చేస్తూ... పిల్లలకు శరీర భాగాలు, మంచి అలవాట్లు, మర్యాదలు వంటి అంశాలను సులభంగా అర్థమయ్యేలా వివరిస్తున్నారు. స‌ల్మాన్ సినిమాల విషయానికి వ‌స్తే.. అపూర్వ లఖియా దర్శకత్వంలో తెరకెక్కుతున్న `మాతృభూమి` చిత్రంలో నటిస్తున్నారు. అలాగే వంశీ పైడిప‌ల్లి ద‌ర్శ‌క‌త్వంలో ఓ సినిమా చేస్తున్నారు. రియాలిటీ షో `బిగ్ బాస్` హోస్ట్‌గా వ్యవహరిస్తూ బిజీగా ఉన్నారు.