ఏ ఇంటికైనా కాంపౌండ్ వాల్ నాన్న.. మూవీ చూశాక అమ్మాయిలందరికీ కన్నీళ్లు: నరేష్

సీనియర్ నటుడు వీకే నరేష్, నటి వాసుకి కీలక పాత్రల్లో నటిస్తున్న చిత్రం బ్యూటీ. అంకిత్ కొయ్య, నీలఖి హీరో హీరోయిన్లుగా జేఎస్ఎస్ వర్ధన్ దర్శకత్వం వహిస్తున్న ఆ సినిమాను విజయ్ పాల్ రెడ్డి అడిదల, ఉమేష్ కుమార్ బన్సల్ సంయుక్తంగా నిర్మిస్తున్నారు. ప్రస్తుతం రిలీజ్ కు ఏర్పాట్లు చేస్తున్నారు. ఇప్పటికే విడుదల చేసిన టీజర్, ట్రైలర్, సాంగ్స్ అందరినీ ఆకట్టుకున్నాయి. మూవీపై మంచి బజ్ క్రియేట్ చేశాయి. సెప్టెంబర్ 19వ తేదీన సినిమా రిలీజ్ కానుండగా.. ప్రమోషన్స్ లో స్పీడ్ పెంచారు మేకర్స్. తాజాగా నరేష్, వాసుకి మీడియాతో మాట్లాడారు. సినిమా గురించి మాట్లాడుతూ పలు ఇంట్రెస్టింగ్ కామెంట్స్ చేశారు.

సినిమా సోల్, థీమ్ మూవీకి బ్యూటీ అని నరేష్ తెలిపారు. సుబ్బు రాసిన కథను దర్శకుడు వర్ధన్ అందంగా మలిచారని కొనియాడారు. "ఇటీవల ఎంటర్టైన్మెంట్, ఎమోషన్స్ కలిసి ఉన్న సినిమాలు తగ్గాయి. ఇందులో ఆ రెండూ ఉన్నాయి. ప్రేక్షకులకు సినిమాటిక్ లిబర్టీ తీసుకుంటే నచ్చట్లేదు. ఆర్గానిక్ గా ఉండాలి. అలా ఉంటేనే నచ్చుతుంది. ఇటీవల ఒక ఇంటర్వ్యూలో ఓ మూవీ ఆర్గానిక్ గా లేదని మీకు అనిపిస్తే లక్ష రూపాయలు ఇస్తాను అని ఛాలెంజ్ చేశాను" అని తెలిపారు.

"ఇంటర్వెల్ టైమ్ లో ఆశ్చర్యపోతారు అందరూ. సెకండ్ హాఫ్ చెప్పాల్సిన అవసరం లేదు. నేటి రోజుల్లో మంచి సినిమా, చెడ్డ మూవీ అని కాదు వాళ్లు పెట్టే డబ్బులకు సంతృప్తి చెందుతున్నారా లేదా చూస్తున్నారు ఆడియన్స్. ఫ్యామిలీ మొత్తం కూర్చొని బ్యూటీ చూడొచ్చు. ప్రతి మూవీలో ఏదో ఒక చిన్న సమస్య ఉండొచ్చు. కానీ దీంట్లో ఏమి లేకుండా అంతగా వర్కౌట్ చేశారు. సినిమాకు వానర సెల్యులాయిడ్స్, జీ స్టూడియోస్ నుంచి నిమ్మకాయల ప్రసాద్, మారుతీ స్టూడియోస్ త్రిమూర్తులు. పర్ఫెక్ట్ గా తీశారు" అని తెలిపారు.

"సినిమాలో ప్రస్తుత జనరేషన్ తమను తాము చూసుకుంటారు. ఈ రోజుల్లో మ్యారేజ్ గురించి ఎవరూ ఆలోచించట్లేదు. అది ఒక కమిట్మెంట్. ఇప్పుడు లివ్ ఇన్ రిలేషన్, కలిసి ఎంజాయ్ చేసి విడిపోవడం అంతే. ఇప్పటి పిల్లలకు మనం ఏమి చెప్పలేం. ఫ్రెండ్ గా ఉండటమే చేయాలి. ఒక రియలిస్టిక్ కంటెంట్ ను అందంగా చూపించారు. వాసుకి మెథడ్ యాక్టింగ్ పీక్స్ లో చూపించింది. అందరి పర్ఫార్మెన్స్ లు ఆర్గానిక్ గా ఉంటాయి. సినిమాలో హీరోయిన్ పెర్ఫెక్ట్ కాస్ట్. చాలా అందంగా పెర్ఫార్మ్ చేసింది" అని చెప్పారు.

"అంకిత్ అద్భుతంగా పెర్ఫార్మ్ చేశాడు. సినిమాకు అతడే సర్ ప్రైజ్. మేము అతడి దగ్గర నేర్చుకోవాలి. హీరో - హీరోయిన్స్ పాత్రలతో సినిమా అనేది ఇప్పుడు జరగట్లేదు. ఇప్పుడు అన్ని లీడ్ రోల్స్ మాత్రమే. కథ విన్నప్పుడు నేను మెస్మరైజ్ అయ్యాను. నేను కథ విన్నాక మారుతీ గారిని చేయగలనా లేదా అని అడిగితే మీరు వంద శాతం పండిస్తారు అన్నారు. చిన్న అపార్ట్మెంట్ లో చాలా కష్టపడి షూట్ చేశాం. సినిమాలో కథ ఆడియన్స్ పాయింట్ నుంచి తీసుకెళ్లారు. అది కనెక్ట్ అవుతుంది" అని పేర్కొన్నారు.

"సినిమాలో ఏమన్నా తప్పులు ఉంటే నేను మీ ముందుకు వచ్చి నిలబడతాను. సాంగ్స్, బ్యాక్ గ్రౌండ్ చాలా బాగా ఇచ్చారు. చిన్న చిన్న లొకేషన్స్ లో కూడా అమేజింగ్ విజువల్స్ ఇచ్చాడు కెమెరామెన్. ఆర్ట్ డైరెక్టర్ ను కూడా మెచ్చుకోవాలి. కథను జర్నలిస్ట్ రాశాడు అంటే ఎంత రియాలిటీ ఉంటుందో చూడండి. నాకు కూతురు లేదు అనే లోటు ఎప్పుడూ ఉండేది. ఆ లోటు కాదు కానీ కూతురు ఉంటే ఇంత పెయిన్ పడేవాడినా అని సినిమాలో అనుభవించాను" అని తెలిపారు.

"ఇవాళ్టి పిల్లలు ఏదో చేస్తున్నారు, సూసైడ్ చేసుకుంటున్నారు. సినిమాలో ఆ అమ్మాయిని చూసి నేను ఆ పెయిన్ అనుభవించాను. చాలా సినిమాల్లో అమ్మకొడుకుల రిలేషన్ చూపించారు కానీ తండ్రి కూతుళ్ల రిలేషన్ చాలా తక్కువ సినిమాల్లో చూపించారు. మూవీ చూసి అమ్మాయిలకు వాళ్ల ఫాదర్ గుర్తొచ్చి కంట్లో నీళ్లు రాకపోతే నన్ను అడగండి. ఇంట్లో అన్ని అమ్మ అయితే ఇంటికి కాంపౌండ్ వాల్ లాంటివాడు నాన్న. ఆ ఎమోషనే బ్యూటీ" అని తెలిపారు.

ఎంత కావాలంటే అంత ఉంది: వాసుకి

సినిమాలో ఎంత ఎమోషన్ కావాలో అంత ఉంటుందని వాసుకి తెలిపారు. అయితే ఎంత రియాక్ట్ అవ్వాలో అంతే రియాక్ట్ అవ్వాలని కూడా చెప్పారు. "నాకు కూతురు ఉంది. ఇప్పుడు ఉన్న జనరేషన్ లో ప్రతి అమ్మాయి చేసేది మా అమ్మాయి చేస్తుంది. ఈ కథ విన్నప్పుడు చెప్పిన పాయింట్ ఒక తల్లిగా నాకు కనెక్ట్ అయింది. కథలో ఒక తల్లికి, అమ్మాయికి ఉండాల్సిన అవగాహన, బాధ్యత ఉన్నాయి" అని తెలిపారు.

"మదర్స్, పేరెంట్స్ గా మనం స్ట్రిక్ట్ గా ఉంటాం. కానీ పిల్లల పాయింట్ లో ఏముందో చూడాలి అని నా కూతురికి సినిమాను చూపించాను. జెన్యూన్ రివ్యూ ఇచ్చింది. ఇప్పటి పిల్లలకు ఏ సినిమా నచ్చుతుందో తెలీదు కానీ ఆమె బాగా కనెక్ట్ అయింది. నాకు తెలిసింది, తెలియంది సినిమాలో ఉన్నాయని, నేను ఇంకా జాగ్రత్తగా ఉండాలని చెప్పింది. తను డైరెక్టర్ కు కాల్ చేసి నేను సింగిల్ గా ఉంటాను. భయం ఉంటుంది. కానీ ఇప్పుడు మంచి అవగాహన వచ్చిందని థ్యాంక్స్ చెప్పింది" అని వాసుకి చెప్పారు.

"ఇప్పటి జనరేషన్ ను తిట్టి పెంచలేం. కేవలం మంచిగా చెప్పాలి. జనరేషన్ కు తగ్గట్టే మూవీ ఉంటుంది. సినిమాకు నరేష్ సర్ మెయిన్ పిల్లర్. సెకండ్ హాఫ్ లో వచ్చే ఫాదర్ ఎమోషన్ కు బాగా కనెక్ట్ అయ్యాను. నరేష్ గారిని ఆ పాత్రలో చూసి మా నాన్న గుర్తొచ్చారు. అంకిత్ చాలా సెన్సిబుల్ యాక్టర్. అందరి హీరోలా కాదు. కచ్చితంగా సక్సెస్ అవుతాడు. మూవీ కథ ఇప్పటి జనరేషన్ అమ్మాయిల అందరి చుట్టూ తిరుగుతుంది. సినిమా చూస్తే అమ్మాయిలు వాళ్ల తండ్రుల మధ్య ఉన్న సమస్యలు తీరిపోతాయి" అని తెలిపారు.